藍田@八喜

前排有一晚冇煮飯，放工的時候，打俾袁生問佢想食咩，點知袁生話想食坦坦麵，但屋企附近得八喜有坦坦麵食，咁唯有叫袁生落去搵定位，雖然住宅區應該唔會好多人，但始終係星期六，唔多唔少都驚會多人，都係預防萬一好d

袁生就想食坦坦麵，咁我食咩好呢 ???

當我考慮緊食咩之際，見到隔離枱有人叫坦坦麵，發覺原來都幾大碗，咁袁太就提議，不如叫一碗麵，再加一個小菜，另外袁太想試下胡椒餅，都夠兩個人食喇，仲有叫左兩杯沙冰，真係涼到入心，初時感覺以為唔係叫左好多，但都食到好飽

之前袁太上網search過八喜都幾多唔好的評語，其實d食物都唔係咁差，整體上味道都唔錯 !

 

一坐低就問要咩茶，梗係鐡觀音喇，仲有個前菜添 !

兩個人一定夠食...

袁生想食的坦坦麵

外婆紅燒肉，味道唔錯，不過有少許鹹 !

 

袁太想試下胡椒餅，味道OK，但越食就越辣，胡椒味好勁 !

 

涼到入心的鳳梨沙冰，草莓沙冰 !

南瓜蕃茄排骨湯 <附食譜>

南瓜係袁太至愛的食物，最鐘意就係煲南瓜湯，其實以前係袁太廚房裡面係唔會有南瓜湯的出現架，因為袁生唔鐘意甜湯，何況南瓜煲的湯又甜又結結地，袁生又點會鐘意呢 ???

但我真係好鬼想飲南瓜湯，偶然先煲一次，袁生應該唔會唔俾面，不過煲之前都要通知袁生一聲，袁生雖然話OK，但又話可唔可以唔好煲咁甜，唔...都可以既，唯有唔用粟米，如果加左粟米一定超甜，咁不如用蕃茄，用蕃茄的酸味，唔知可唔可以中和到南瓜的甜味呢

而肉類方面，本來想買排骨，但好意外成個街市都冇排骨賣，唯有轉一轉去急凍店買排骨粒落去煲，應該都一樣，好喇 ! 煲左2小時，又係俾袁生試味的時候

袁生對今次南瓜湯評價係"唔錯，幾好味"，不過就好結，另外袁生話最好食係d排骨粒，梗係喇， 我專登買d半肥瘦的排骨，就算煲左2小時都依然好腍，一d都唔硬，而袁太就更加唔駛講，簡直超鐘意呢個南瓜湯 !

南乳焗雞 <附食譜>

真係焗雞焗上癮，自從袁太愛上焗雞之後，真係簡直餐餐都食雞，何況袁生又冇投訴，不過就算袁生冇投訴，都唔可以重複以前的焗雞食譜，因為袁生唔鐘意日日食重複的餸菜架，真係好鬼麻煩，所以袁太又要諗諗計，之前整過焗沙薑雞，魚露焗雞扒，海南雞，鮑汁煮雞都整過晒，咁今次整咩雞好呢 ??? 唔理喇，去街市買左雞先再算，買完半隻雞，經過雜貨鋪，見到呀姐入緊南乳，如果買包南乳番去用黎焗雞，唔知味道會係點呢 ???

 

平時南乳只會用黎炆蓮藕排骨，用黎整雞就真係未試過，真係好期待個味道，雖然焗雞係好方便，只要醃完放入焗爐焗完再斬件就可，但醃隻雞都唔知醃左幾多個鐘，今次呢個南乳雞，由於時間關係，只係醃左3小時，雖然都有南乳味，但就覺得唔係好夠，如果下次再整的話，最好醃夠佢一日就最好 !

今日人氣話題------有袁太廚房的post呀~~~

今日袁太同平時一樣，搭車的時候上下網，check下blog，點知發現今日"消暑狂想曲"有我袁太的post

真係覺得好突然同開心，睇真d原來係袁太之前post的西瓜皮食譜，亦都有好多blog友留言俾袁太，袁太係度多謝晒咁多位blog友，抽時間黎睇袁太所以分享的post，袁太會繼續努力，煮多d好餸，寫多d食譜同大家分享 !

狗狗食譜 <附乳酪三絲生菜卷食譜>

昨日係大暑，大家有冇買冬瓜煲冬瓜水或冬瓜湯呢 ???

袁太星期日就晨早去街市同d師奶呀婆爭冬瓜，煲左一大煲放係雪櫃，等袁生自己攞黎飲，大暑的日子，人就要買冬瓜消暑，咁狗狗呢 ???

其實狗狗都要消暑，何況好似BB呢d扁鼻狗，係好容易中暑，雖然BB平時就唔多出街，但做主人的我都要整d食物俾BB消下暑先得，夏天屋企雪櫃成日都有西瓜係度，上次用左西瓜皮煲水，大家知唔知原來西瓜皮對狗狗都有一定的消暑作用

所以可以用西瓜皮整一d消暑食物俾佢，袁太就諗到，不如整個生菜卷俾BB嘆下，材料除左有西瓜皮，青瓜，甘旬，仲有低脂乳酪，好健康

而且整的過程好簡單，袁太一路整，BB一路等，整左一條都急不及待俾BB試下

 

BB都不知幾鐘意，仲食唔停口，不過袁生話一下子唔好俾咁多，所以只俾左3條BB食，不過BB一定唔夠喉 !

五花茶 <附食譜>

心血來潮想煲呢個五花茶俾袁生飲，皆因平時袁生食煙多，又容易出汗，又食得多零食，又日日一至兩杯奶茶，性格又煩燥，郁d就扯晒火，所以袁太為免成袁生的爆發對象，就決定俾佢飲幾杯五花茶，下下火，清下熱氣都好，當袁太同袁生講煲d五花茶俾你下下火好冇呀 ???

袁生第一時間就問，出面大把地方有得賣，唔駛自己煲咁麻煩，唉...我知出面有得賣，但自己煲都係十幾蚊，份量仲好多添，你想飲幾多都得 !

煲左約1小時，驚袁生話苦，所以落多幾粒冰糖，味道啱啱好，袁生一口氣飲兩杯，其餘放係雪櫃雪凍俾佢自己攞黎飲，唔知飲左幾杯五花茶，袁生降唔降到火呢 ???

吉列魚柳拌柚子醋 <附食譜>

冰箱仲有一條急凍龍利柳，但又唔想整粟米斑塊喎，咁究竟整咩好呢 ???

袁生提議不如用黎炸，做吉列魚柳都唔錯，袁太覺得呢個提議都幾好，但係... 因為袁太以前都試過係屋企炸魚柳，但炸出黎又濃又硬，袁生話好難食，簡直係失敗之作，所以當袁生叫我整吉列魚柳的時候，我都有少少擔心，所以今次一定要好小心處理，一定要炸得好好睇睇，要令袁生大跌眼鏡，不過今次好好彩，經袁太努力下，居然炸得好靚，好脆

另外仲有之前係日本食品節買既柚子醋做汁料，袁生食完簡直大讚，話今次真係整得好好，好脆好好味，俾袁生咁讚法，真係好開心，成個人仲飄飄然 !

西瓜皮蜜棗水(凍)+西瓜皮豆乾炒雞粒

夏日炎炎的天熱，除左食雪糕，冰條外，生果方面莫過於一定係西瓜

大家每次食完西瓜，西瓜皮係咪一定會掉左佢呢 ???

袁太之前都係架，但後來發現原來西瓜皮好有用，其實之前都用過西瓜皮煲湯

真係覺得好好味架，但由於昨晚已經煲左湯，所以今日選擇用西瓜皮整兩個做法

下午的時候去街市買左1/4個西瓜，$18都好大舊

因為袁生平時食西瓜一定要袁太起左西瓜肉放係雪櫃

等佢食既時候可以好方便，袁太同西瓜起完果肉之後，就要諗下究竟用西瓜皮整咩好

掉左佢太浪費喇，所以又係打開雪櫃呢個八寶箱睇下有咩好材料

見到冰箱有雞扒同豆乾，如果將西瓜皮切粒一齊炒的話，唔知味道掂唔掂呢 ???

 一於試下先

當袁太將西瓜皮的一半份量切粒後，原來份量都幾多架

咁仲有一半西瓜皮又點算呢 ???

袁太教大家一個好簡單的做法，只需要西瓜皮同蜜棗

放晒落個煲到煲1 1/2小時，放涼後放入雪櫃雪凍，就成為西瓜皮蜜棗水

今次可以用盡晒d西瓜皮真係開心，而家天氣日日都咁熱，大家一定出好多汗

其實西瓜皮仲有迅速補充流失水份的功效架 !

左面一塊塊西瓜皮就係整"西瓜皮蜜棗水"(西瓜皮連外皮)

右面一粒粒西瓜皮就係整"西瓜皮豆乾炒雞粒"(西瓜皮要切去綠色外皮)

自家製少甜凍/熱豆漿

平時如果想飲豆漿多數都會係超市買

但袁太覺得出面買已經寫住低糖的豆漿都好甜，所以就決定自己整

其實以前都自己整過，不過係好多年前喇，而今次整的原因都係整俾袁生飲

因為袁生每朝番工前都會飲杯奶先出面口，但前幾日突然叫袁太買豆漿朝早飲喎

與其出去買，咁不如自己整，起碼無防腐劑，都健康d喇，同埋可以控制甜度

材料只需要一包黃豆就可以，仲可以整到好多杯添 ! 就算飲豆漿

袁生袁太都好唔同，袁生只係飲凍豆漿，袁太就飲熱豆漿

雖然袁生話過唔好整咁淡，但袁太都盡量落少d冰糖，飲咁甜做咩喎 !

涼拌榨菜蛋絲上海麵

星期一係袁太放假的日子，又冇地方去，都係留係屋企睇下電視做下家務

但下午個餐食咩好呢???雖然話一個人食咩都得，但都唔可以咁求其

但天氣咁鬼熱都冇咩胃口，突然我平時冇咩點用既腦閃左一閃

不如整涼拌麵，冰冰涼涼會容易入口好多

材料方面就用袁太鐘意食的食物，就係榨菜同上海麵喇

袁生一向都唔食呢兩樣野，所以平時都唔會係袁太廚房裡面出現

所以只有袁太一個開餐先可以買黎煮，而且整呢d涼拌，好快就有得食

食完真係有透心涼的感覺 !

蘋果汁青檸梳打 <附食譜>

前幾日整海南雞的醬汁時用剩一粒青檸，初時諗住用黎焗烏頭，點知袁生又話唔想食魚，唉...咁粒青檸點算好呢???

~呀~諗到，一於用黎整飲品，咁啱雪櫃有支雪碧，咪可以整青檸梳打囉，又見飯枱仲有兩個深色紅蘋果，如果將蘋果榨汁加埋落去青檸梳打內，唔知味道會係點既呢???

整好後，係時候俾袁生試下味，點知袁生第一句就問 "咩黎架，會唔會肚痛架"，我頂...頂...頂...你飲左先喇，睇下飲唔飲到入面有d咩材料???，估唔到袁生都幾叻，飲到入面有蘋果味，仲話味道唔錯，幾好飲 !

蒜蓉XO醬蒸鮑魚

街市成日都見到有鮑魚仔賣，但好似有d貴喎，成$178/斤

但又諗唔到煮咩餸好，不如買鮑魚仔做晚餐，袁生咁鐘意食海鮮

一定會鐘意鮑魚仔，我諗買8隻都夠，一於叫呀姐磅下幾多錢先

嘩...$56咋，俾我預期平左喎，咁點可以唔買呢，呀姐仲好好幫我洗乾淨，擦乾淨添

我番到屋企只要用水洗一洗就OK

咁我又多口問呀姐，我用黎蒸架，加咩材料好呀 ???

呀姐介紹我用XO醬加蒜蓉蒸已經好好味，OK，咁我就信呀姐

呀姐果然冇點我，咁樣蒸真係簡單又好味，連袁生都話味道唔錯 !

鯽魚湯~再encore~

自從上次煲左鯽魚湯俾袁生飲，唔知係咪心理作用呢 ???

袁生話飲完隻腳真係冇咁痛，何況我都幾鐘意飲魚湯，甜甜地，好味道

所以今次再用鯽魚煲湯

簡簡單單加白蘿蔔，瘦肉就可以，啖湯清清地，魚湯味好突出

反而好味過上次用冬瓜煲添呀，最緊要係袁生一向都鐘意白蘿蔔

除左飲左兩大碗外，仲好乖咁食左好多蘿蔔添，碗湯真係好味到連湯渣都唔想浪費 !

沙嗲香草焗金沙骨

袁太突然間好想食豬仔骨，但好奇怪走遍成個藍田區都唔見有得賣

咁點算呢 ???

真係好想食喎，最後一站行吉吉島睇下有冇，唉...點知都係冇

但無意中見到金沙骨，大大條價錢又唔貴，仲好似幾靚添

咁一於就轉用金沙骨

買左金沙骨番屋企後，就要決定用邊種方法去煮

諗黎諗去都係覺得用焗的方法係最好

而醬汁方面當然用袁生袁太都鐘意既沙嗲醬，不過今次係用沙嗲磚

係東南亞材料鋪買，係用黎食串燒個隻沙嗲磚，再加少少香草一齊焗

應該會好好味

~呀~最緊要加埋蔬菜墊底喎，蔬菜吸晒沙嗲的味道，好香呀，~Yummy~

准山杞子花膠湯

前幾日同袁生去吉吉島周圍行，見到有一包包的花膠卷，都係$39.9/包

雖然唔係靚花膠，但用黎煲湯或者煮餸應該都唔錯

不過其實袁生係唔鐘意花膠架，不過花膠含膠質，對於好似袁生咁膝頭痛的人

食多d膠質食物都有幫助，何況花膠對女性都好好喇，所以呢個湯水簡直啱晒我地

今次個花膠湯所配搭的材料，係吉吉島個呀姐教我煲架

有准山，有杞子，仲有雞腳

味道甜甜地，係超級好味，袁太飲左3碗，袁生都好乖飲左2碗 !





材料 : 准山<8塊>，花膠卷<18條>，杞子<適量>，雞腳<4隻>，瘦肉<$10>，蜜棗<2粒>

瘦肉飛水後切件雞腳去甲飛水後放入冰水30分鐘

花膠卷，准山，杞子洗淨備用

煲內放入適量水及蜜棗，待滾後加入瘦肉，准山用大火煲30分鐘

再加入花膠卷，雞腳煲至滾，轉慢火煲1 1/2小時

最後加入杞子煲15分鐘，下少許鹽調味即可

，

肉碎炒粒粒

炎炎夏日都唔知煮咩好，問袁生例牌 : 是但喇，妳話事喇 !

但次次叫我話事，煮完出黎又話我唔食呢樣唔食個樣

我頂，咁你又叫我話事，所以而家袁太諗到晚餐煮咩，都會打俾袁生講左先

費時又俾人話

最近放假係屋企睇電視，介紹炒粒粒，其實炒粒粒都幾好架

基本上將全部材料炒埋一碟就完成，真係好方便

而且炒粒粒的材料可以換自己鐘意食既野，所以材料都以袁生鐘意的材料行先

就係西芹，叉燒，豬肉碎同魚片喇，有菜又有肉，而且味道仲好好添 !

荔枝雪糕

最近日日都咁鬼熱，真係要食下雪糕先可以降到溫

所以袁生都落左order話要食荔枝雪糕，OK，梗係冇問題喇

講開呢個荔枝雪糕，袁太以前都整過一次，仲愛上左個味道

香濃的荔枝味，仲有好多荔枝果肉添，簡直食到唔停得口

而且做法簡單，好似袁太咁冇雪糕機都可以做到架

不過今次整出黎個感覺似雪葩多過雪糕，而袁生就更加唔駛講，簡直超鐘意

不過今次整左好少份量咋，袁生都好似唔夠食，等我過幾日再買荔枝番黎再整過

大家都快d試下喇，真係好好味架 !