2017年2月24日 星期五

京蔥蒜香魚露焗雞扒




無意中係冰箱又發現左兩塊大雞扒 , 心諗乾煎好還是又開焗爐焗好呢 ??? 問袁生想點整 , 佢既答案又係個句 ~是但~ , 即係冇一個特定的答案俾我 , 咁就不如又煎又焗喇 ......



所謂的又煎又焗 , 其實即係煎左塊雞扒表面變成金黃色先 , 再放入焗爐焗至熟 , 用焗的方式去整雞扒 , 雞扒肉好嫩滑 , 絕對唔鞋口 , 平時整雞扒都鐘意簡單只用魚露 , 蒜頭醃 , 蒜頭的香味同魚露好夾 , 另外再加上京蔥一齊焗 , 京蔥都屬於蔬菜類 , 咁就有肉有蔬菜 , 再煮個白飯就可以開餐 , 夠簡單夠方便



起初焗的時候 , 一路焗一唔想 , 究竟兩塊雞扒夠唔夠食呢 ??? 即係一人一塊 , 因為覺得塊雞扒好似唔係太大塊 , 焗完之後切件又突然覺得份量有點多 , 最終開飯的時候 , 真係好辛苦先食得晒 , 因為食兩 , 三件已經有少少飽的感覺 , 另外京蔥焗完香噴噴 , 用來拌飯好味道呢 ^^



材料 : 雞扒 , 魚露 , 蒜頭 , 京蔥 , 黃糖 , 酒 , 焗爐紙 , 錫紙




京蔥斜切件 , 蒜頭去衣切粒 , 雞扒解凍洗淨放入器皿內 , 加入魚露 , 醃料及蒜粒拌勻 , 先醃雞肉個邊 , 蓋上保鮮紙靜待1小時 , 1小時後將雞扒反轉醃雞皮個邊 , 再蓋上保鮮紙靜待1小時 , 焗爐用200C預熱10分鐘















醃好的雞扒放入鑊中煎至兩面金黃色(煎雞扒的油留起) , 煎雞扒期間 , 焗盆放上焗爐紙 , 放上一半份量京蔥 , 煎完兩塊雞扒後放在京蔥上 , 淋上煎雞扒的油及醃雞扒的一半份量蒜粒 , 蓋上錫紙
 
















放入焗爐用200C上下火焗20分鐘 , 期間將餘下煎雞扒的油及一半份量的蒜粒盛起







焗20分鐘後將錫紙取走 , 將雞扒反轉(雞皮向上) , 掃上煎雞扒油及灑上餘下醃雞扒的蒜粒 , 再放上剩餘的一半京蔥 , 放入焗爐用200C上火焗10分鐘 , 取出靜待10分鐘即可
















材料
雞扒2塊 , 魚露 , 蒜頭1個 , 京蔥1條 , 黃糖 , 酒 , 焗爐紙 , 錫紙

醃料
魚露3湯匙 , 生抽 , 老抽 , 黃糖 , 酒



做法
1. 京蔥斜切件 , 蒜頭去衣切粒 

2. 雞扒解凍洗淨放入器皿內 , 加入魚露 , 醃料及蒜粒拌勻 

3. 先醃雞肉個邊 , 蓋上保鮮紙靜待1小時 

4. 1小時後將雞扒反轉醃雞皮個邊 , 再蓋上保鮮紙靜待1小時 

5. 焗爐用200C預熱10分鐘

6. 醃好的雞扒放入鑊中煎至兩面金黃色(煎雞扒的油留起) 

7. 煎雞扒期間 , 焗盆放上焗爐紙 , 放上一半份量京蔥 , 煎完兩塊雞扒後放在京蔥上 

8. 淋上煎雞扒的油及醃雞扒的一半份量蒜粒 , 蓋上錫紙

9. 放入焗爐用200C上下火焗20分鐘 

10. 期間將餘下煎雞扒的油及一半份量的蒜粒盛起

11. 焗20分鐘後將錫紙取走 , 將雞扒反轉(雞皮向上) 

12. 掃上煎雞扒油及灑上餘下醃雞扒的蒜粒 , 再放上剩餘的一半京蔥 

13. 放入焗爐用200C上火焗10分鐘 , 取出靜待10分鐘即可 




雞肉嫩滑 , 京蔥又焗到香噴噴 , 好滿足呢 ^^





20 則留言:

  1. 嘩,你啲雞扒又大塊又厚肉呀

    回覆刪除
  2. 塊雞扒都好大喎,焗一定肉質嫩滑

    回覆刪除
  3. 焗到金金黃黃,睇見都想食呀

    回覆刪除
  4. 這個煮法連D京蔥都好好味呢, 正啊!

    回覆刪除
  5. 呢個配飯好味喎

    回覆刪除
  6. 袁太經常有咁多好野食,袁生真幸福呀

    回覆刪除