2017年3月22日 星期三

黑白胡椒芥菜燒豬骨湯




最近的天氣一時熱 , 一時濕濕淋淋 , 一時又落下微微雨 , 蔭蔭的天氣令人非常之唔舒服 , 數數手指袁太其實已經好多日做左無飯主婦 , 唔係同袁生落街食就係買外賣回家 , 平時叫我唔好煮咁多的袁生都開始有投訴 ......



前幾日袁生突然同我講 ~妳好似好多日冇煮飯喎 , 就算唔煮飯都煲個湯黎飲下好喎~ , 超 ... 平時又係你叫我唔好煮咁多 , 又話鐘意食外賣既 , 我而家只不過係大約一個星期多dd冇煮姐 , 唔駛咁呀 ??? 不過話雖如此 , 其實我都覺得就算唔煮 , 煲啖湯都唔係用好多時間 , 咁就第日去街市買材料煲湯 , 煲湯當日天氣都有少少涼風 , 記起雪櫃有黑白胡椒粒同鹹菜 , 本應想配豬肚煲湯 , 後來經過燒臘店見燒豬骨又好似幾靚仔 , 就諗都唔諗就買左一份 , 咁既然買左豬骨就唔買豬肚 , 就轉配芥菜



平時我都鐘意用芥菜煲湯或滾湯 , 因為有湯飲時又有芥菜食 , 今次仲有濃濃的燒豬骨同胡椒粒 , 又有鹹菜 , 又係多湯渣之選 , 不過呢款湯水味道會比較濃同鹹 , 所以都唔需要加鹽已經好夠味 , 如果喜愛湯水比較清的朋友們 , 呢款湯水就未必啱飲呢 ^^



材料 : 燒豬骨 , 芥菜 , 黑胡椒粒 , 白胡椒粒 , 鹹菜 , 粟米 , 蜜棗 , 薑 , 鹽




鹹菜洗淨瀝乾後切條 , 薑去皮切絲 , 粟米切段 , 燒豬骨放入煲內加入水 , 水蓋過豬骨即可 , 用慢火煮至水滾 , 將豬骨盛起用水沖洗瀝乾 , 黑胡椒粒 , 白胡椒粒用水沖洗 , 瀝乾水份備用 














  
 
煲內放入鹹菜 , 薑絲及燒豬骨拌炒數分鐘 , 加入黑白胡椒粒 , 粟米 , 蜜棗及熱水 , 先用中火煲15分鐘 , 期間將芥菜切段加入鹽 , 水浸10分鐘後用水沖洗乾淨

















湯煲15分鐘後加入芥菜拌勻 , 再用中火煲滾後轉慢火蓋上蓋煲1 1/2小時即可 (期間小心滾瀉)

















材料
燒豬骨1份 , 芥菜1斤 , 黑胡椒粒 , 白胡椒粒 , 鹹菜1/2棵 , 粟米1條 , 蜜棗2粒 , 薑 , 鹽



做法
1. 鹹菜洗淨瀝乾後切條 , 薑去皮切絲 , 粟米切段

2. 燒豬骨放入煲內加入水 , 水蓋過豬骨即可 , 用慢火煮至水滾 

3. 將豬骨盛起用水沖洗瀝乾 , 黑胡椒粒 , 白胡椒粒用水沖洗 , 瀝乾水份備用  

4. 煲內放入鹹菜 , 薑絲及燒豬骨拌炒數分鐘

5. 加入黑白胡椒粒 , 粟米 , 蜜棗及熱水 , 先用中火煲15分鐘 

6. 期間將芥菜切段加入鹽 , 水浸10分鐘後用水沖洗乾淨

7. 湯煲15分鐘後加入芥菜拌勻 

8. 再用中火煲滾後轉慢火蓋上蓋煲1 1/2小時即可 (期間小心滾瀉)




又一碗多湯渣的湯水 , 食完湯渣飲埋湯又飽飽 , 又可以唔駛煮飯呢 ^^




22 則留言:

  1. 燒豬骨煲湯唔錯,我成日都買黎煲湯架

    回覆刪除
  2. 燒豬骨煲湯最夠味道,無需調味料就已經很好飲了。

    回覆刪除
  3. 回覆
    1. 黃師奶要幾多碗?我速遞俾妳呢^^

      刪除
  4. 袁太,留一碗比我唔該

    回覆刪除
  5. 一睇個顏色都知味道濃郁

    回覆刪除