2017年3月30日 星期四

芫茜魚肉煎蛋卷




突然間好想 ... 好想食蛋卷 , 雖然蛋卷可以用好多唔同的食材做餡料 , 但我最愛的蛋卷餡料首選一定係魚肉 , 印象中入廚咁多年只係整過一次蛋卷咁大把 , 最愛蛋卷做法簡單 , 材料簡單 , 卷好蛋卷蒸熟就咁食又得 , 或者好似袁太咁煎香食又得 , 賣相又靚靚 , 都出得大出面架 ......



呢款蛋卷的材料只需要雞蛋 , 鯪魚肉及芫茜 , 雖然整蛋卷又要煎蛋皮 , 又要卷 , 又要蒸 , 又要煎 , 睇落好似好似好多功夫咁 , 但其實一D都唔複雜 , 一D都唔難製作 , 我明知知袁生唔喜愛芫茜 , 但感覺鯪魚肉入面加入少許芫茜 , 一定會香口好多 , 所以唔會理袁生喜唔喜愛 , 會唔會食的理由 , 一於加埋芫茜 , 因為我鐘意 



煎完薄薄蛋皮 , 再將已調味的鯪魚肉放在蛋皮上 , 卷起 , 放入電蒸鍋內蒸熟 , 蒸熟待涼再勿件 , 再放入鑊中煎至兩面金黃色 , 件件都靚靚仔仔 , 最攪笑袁生見我係廚房煎野的時候 , 入黎望下我攪咩 , 見我煎緊蛋卷 , 居然話個蛋卷中間好似炸大腸喎 , 本來我都唔多覺 , 仲鬧佢話似大腸好低b , 不過俾袁生講講下又覺得有少許似 , 只不過炸大腸的橙色皮轉換成黃色的蛋皮 , 內裡換上滑滑的魚肉 , 呢款蛋卷絕對經濟又實惠 , 而且味道仲好好呢 ^^



材料 : 鯪魚肉 , 芫茜 , 雞蛋 , 胡椒粉 , 麻油 , 保鮮紙 , 油 , 鹽




雞蛋打入大碗內 , 加少許鹽拌勻成蛋液 , 鑊中加油燒熱 , 放入適量蛋漿用慢火煎至一面離鑊 , 再反轉另一面煎至兩面金黃薄薄的一層蛋皮 , 盛起備用













芫茜洗淨切碎 , 鯪魚肉放入大碗內加入芫茜碎 , 少許麻油及胡椒粉調味拌勻 , 撻十餘下至起膠 , 靜待10分鐘















枱面鋪上保鮮紙 , 放上一塊蛋皮 , 將量鯪魚肉放上 , 用刀將魚肉抹平 , 連同保鮮紙一同卷起 , 另一塊蛋皮同樣做法 , 電蒸鍋內放上碟 , 將蛋卷放上 , 蓋上蓋蒸15分鐘至熟透 , 盛起待涼10分鐘
 


















蛋卷除去保鮮紙再切件 , 放入鑊中用慢火慢慢煎至兩面金黃色 , 盛起稍為待涼再放上碟即可













 
材料
鯪魚肉$10 , 芫茜1/2扎 , 雞蛋3隻 , 胡椒粉 , 麻油 , 保鮮紙 , 油 , 鹽



做法
1. 雞蛋打入大碗內 , 加少許鹽拌勻成蛋液 

2. 鑊中加油燒熱 , 放入適量蛋漿用慢火煎至一面離鑊 

3. 再反轉另一面煎至兩面金黃薄薄的一層蛋皮 , 盛起備用

4. 芫茜洗淨切碎 , 鯪魚肉放入大碗內加入芫茜碎 , 少許麻油及胡椒粉調味拌勻 

5. 撻十餘下至起膠 , 靜待10分鐘

6. 枱面鋪上保鮮紙 , 放上一塊蛋皮 , 將量鯪魚肉放上 , 用刀將魚肉抹平 

7. 連同保鮮紙一同卷起 

8. 另一塊蛋皮同樣做法 

9. 電蒸鍋內放上碟 , 將蛋卷放上 , 蓋上蓋蒸15分鐘至熟透 , 盛起待涼10分鐘 

10. 蛋卷除去保鮮紙再切件 

11. 放入鑊中用慢火慢慢煎至兩面金黃色 , 盛起稍為待涼再放上碟即可 




蛋卷外煎到金金黃黃 , 變得有少許脆口 , 而內裡魚肉滑滑 , 美味呢 ^^




22 則留言:

  1. 嘩...呢個蛋卷好靚,好吸引喎

    回覆刪除
    回覆
    1. 所以我覺得呢個可以出得大埸面呢

      刪除
  2. 我都想食番一件呀

    回覆刪除
  3. 呢款蛋卷做法簡易又靚靚,我都要整黎食下

    回覆刪除
  4. 煎得靚,真係有啲似炸大腸。

    回覆刪除
  5. 除左用鯪魚肉,仲可以用蝦蝦或墨魚滑做餡喎

    回覆刪除
    回覆
    1. 係呀,不過只係袁生唔鐘意蝦滑同墨魚滑呢

      刪除
  6. 點解你會放入盒嘅??

    回覆刪除
    回覆
    1. 其實因為用碟上,影出黎d蛋卷反晒光,反而玻璃盒就唔會,所以咪放入盒影囉

      刪除
  7. 芫茜好蝦人食~我麻麻哋咋~!

    回覆刪除
  8. 賣相好好👍🏻👍🏻👍🏻雞蛋三隻,切出黎蛋卷大約有幾多件?

    回覆刪除
    回覆
    1. 一條切出黎大約有七至八件呢

      刪除
  9. 好想試呀...不過魚肉同莞茜, 我老公都唔食的, 無得整LU~

    回覆刪除
    回覆
    1. 其實真係有好多人都唔太鐘意芫茜

      刪除