2017年4月28日 星期五

椰汁涼粉西米露




這幾天落左成日雨 , 又天黑黑 , 大雨得出街有點狼狽 , 不過感覺冇咁熱 , 有少許涼風 , 之但係每逢天雨路滑 , 大家謹記出街要小心一點 , 千萬唔好好似袁太上次咁跣親 , 反而今日又變回陽光普照 , 家下的天氣真係好難預測 ......



每逢炎熱到死的夏天 , 街市的豆腐店必然會陸續有涼粉賣 , 以往我都好方便地買幾舊回家 , 切粒再加入冰糖水浸 , 放入雪櫃雪到凍一凍 , 食時絕對透心涼 , 好鬼正



不過有時見豆腐店的涼粉就咁放係度 , 只用一張爛鬼膠蓋住 , 其實都唔太衛生 , 都唔知有幾多小強呀 ~~ 或者其他昆蟲爬過 , 最健康 , 最衛生 , 最好的當然自家製 , 自家製涼粉材料好簡單 , 但步驟就何其多 , 先煮好涼粉水 , 又要待涼 , 又要將涼粉草搓出膠質 , 搓出膠質後又要放入魚袋再檸乾 , 涼粉水要加入生粉拌勻再煮成杰身 , 隨即倒入器皿內待涼 , 再放入雪櫃冷藏數小時 , 冷藏數小時後再調回雪櫃下層靜待一晚



大家只係睇文章會唔會覺得已經好麻煩 , 係咪會覺得點解袁太咁蠢唔買現成 , 而要咁辛苦自己整呢 (袁生都係咁話我架 ^^) , 細細個每逢食涼粉都係用冰糖水 , 花奶一定唔會落 , 不過袁生今次想配西米露 , 仲要椰汁味個款 , 所以整完涼粉後 , 又要煮埋個椰汁西米露 , 又要放入雪櫃雪凍 , 呢個椰汁涼粉西米露 , 真係要一日做完 , 第二日先可以食 , 因為袁生話唔夠凍唔好味喎



起初都驚唔成功 , 不過幸運地涼粉雪凍後好成功 , 都算靚靚仔仔 , 將幾舊涼粉切粒後原來份量都幾多 , 可以分兩日食 , 夏天熱辣辣冇咩胃口 , 食碗透心涼的涼粉西米露 , 好有消暑的感覺呢 ^^



材料 : 涼粉草 (藥材店買) , 生粉 , 冰糖 , 鹼水 (雜貨店買) , 水 , 椰漿 , 花奶 , 西米 , 保鮮紙 , 魚袋




涼粉草用水沖洗乾淨及隔去水份 , 放入煲內加入2400ml水 , 再加入鹼水拌勻 , 用中火煮至滾後 , 放一隻碗蓋住涼粉草 , 確保涼粉草浸於水中 , 蓋上蓋轉慢火煮30分鐘















30分鐘後將涼粉草及涼粉水盛起 , 待涼20分鐘 , 用手拎起涼粉草搓出膠質 (約10分鐘) , 雙手感覺膠膠滑滑 , 好似潤膚露咁 , 涼粉菜及涼粉水分開盛起









涼粉水先盛起200ml備用 , 布袋或魚袋放煲內 , 將搓過的涼粉草放入 , 再倒入涼粉水隔渣 , 將魚袋盡量檸乾搓出涼粉水 , 再棄掉涼粉草








將200ml的涼粉水放入大碗內 , 加入生粉拌勻至稀粉漿 , 粉漿放回涼粉水中 , 拌勻用慢火慢慢煮至杰身 , 器皿放上一層保鮮紙 , 趁熱倒入涼粉糊 , 待涼30分鐘後蓋上保鮮紙 , 先放入冰箱1 1/2小時至硬身 , 再放回雪櫃下層靜待一晚


















西米放入煲內 , 加入水蓋過面 , 拌勻用中火煮至透明 , 盛起西米用水沖一沖洗後 , 加入冰水浸過面10分鐘再瀝乾水份 , 煲內加入冰糖及2杯水拌勻用中火煮至冰糖溶掉 , 逐一加入椰漿 , 花奶及西米拌勻用慢火煮幾分鐘至滾起 , 盛起西米露待涼10分鐘後蓋上保鮮紙放入雪櫃靜待一晚
























翌日將涼粉倒扣切粒放入大碗內 , 加入冰水浸10分鐘 , 再倒去水份瀝乾 , 先將涼粉放入碗內 , 再淋上椰汁西米露即可













材料
涼粉草2襾(藥材店買) , 生粉40g , 冰糖 , 鹼水1茶匙(雜貨店買) , 水 , 椰漿1/2杯 , 花奶1/2杯 , 西米 , 保鮮紙 , 魚袋



做法
1. 涼粉草用水沖洗乾淨及隔去水份 , 放入煲內加入2400ml水 

2. 再加入鹼水拌勻 , 用中火煮至滾後 , 放一隻碗蓋住涼粉草 , 確保涼粉草浸於水中 

3. 蓋上蓋轉慢火煮30分鐘

4. 30分鐘後將涼粉草及涼粉水盛起 , 待涼20分鐘 

5. 用手拎起涼粉草搓出膠質 (約10分鐘) , 雙手感覺膠膠滑滑 , 好似潤膚露咁 

6. 涼粉菜及涼粉水分開盛起

7. 涼粉水先盛起200ml備用 

8. 布袋或魚袋放煲內 , 將搓過的涼粉草放入 , 再倒入涼粉水隔渣 

9. 將魚袋盡量檸乾搓出涼粉水 , 再棄掉涼粉草

10. 將200ml的涼粉水放入大碗內 , 加入生粉拌勻至稀粉漿 

11. 粉漿放回涼粉水中 , 拌勻用慢火慢慢煮至杰身 

12. 器皿放上一層保鮮紙 , 趁熱倒入涼粉糊 , 待涼30分鐘後蓋上保鮮紙

13. 先放入冰箱1 1/2小時至硬身 , 再放回雪櫃下層靜待一晚 

14. 西米放入煲內 , 加入水蓋過面 , 拌勻用中火煮至透明 

15. 盛起西米用水沖一沖洗後 , 加入冰水浸過面10分鐘再瀝乾水份 

16. 煲內加入冰糖及2杯水拌勻用中火煮至冰糖溶掉 

17. 逐一加入椰漿 , 花奶及西米拌勻用慢火煮幾分鐘至滾起 

18. 盛起西米露待涼10分鐘後蓋上保鮮紙放入雪櫃靜待一晚

19. 翌日將涼粉倒扣切粒放入大碗內 , 加入冰水浸10分鐘 , 再倒去水份瀝乾 

20. 先將涼粉放入碗內 , 再淋上椰汁西米露即可 




自家製涼粉雖然味道同街的差不多 , 而且步驟又繁複 , 但勝在衛生得多呢 ^^ 





22 則留言:

  1. 我記得你之前整過, 本來唸住做copy cat, 點知到天氣凍都未的起心肝整..hah..今個夏天要試下先得!

    回覆刪除
    回覆
    1. 係呀,我之前整過一次架,涼粉真係夏天必食

      刪除
  2. 我以前見過人地整涼粉,榨汁果陣,真係幾嘥力架。

    回覆刪除
  3. 自製涼粉? 好勁喎。下次我回來都買呀。

    回覆刪除
  4. 自己都可以整到涼粉,袁太勁呀

    回覆刪除
    回覆
    1. 其實唔係好難整,只係步驟多左d呢

      刪除
  5. 我都好鐘意食涼粉,不過都係覺得街買的唔衛生

    回覆刪除
    回覆
    1. 街買的真係唔知有幾多野行過

      刪除
  6. 呢個好味道呀

    回覆刪除
  7. 我老公又係好鐘意食涼粉,試過係街市買,食完之後肚唔舒服,都唔敢再買啦

    回覆刪除
    回覆
    1. 食到個肚唔舒服,應該好唔衛生呢

      刪除
  8. 天氣開漿始熱喇~你呢個甜品啱趴哂~!

    回覆刪除
    回覆
    1. 夏天食涼粉係必然會做既呢^^

      刪除