2017年6月19日 星期一

[蒸+煎] 老少平安




最近上網見到老少平安呢個家常菜 , 另袁太心思思都想整來做晚餐 , 不過究竟用蒸的方法好 , 還是用煎的方法好 ??? 袁太亦上網search過 , 近期好似多左人用煎的方法去製作喎 ......



其實用煎的方法一定啱我同袁生口味 , 因為香口食物我地絕對唔會抗拒 , 但又想食番傳統的方法 , 蒸完加豉油拌飯食 , ~哎呀~ 究竟如何是好 ??? 蒸 or 煎 ???, 頂 , 唔好煩喇 , 一於兩樣都整 , 就可以解決呢 , 不過當解決一個問題 , 自自然然就會有另一個問題的出現 , 究竟用邊種豆腐好 ??? 布包豆腐還是硬豆腐 ??? , ~哈~ 大家係咪覺得袁太好煩呢 , 如果蒸的話就用布包 , 如果煎的話就用硬的 , 但我兩樣都整喎 



當我呢個傻婆係豆腐店來來回回幾次之後 , 決定用布包豆腐 , 感覺用布包會滑D , 回來將材料同醃料放入碗中一同拌勻 , 拎起一半份量再加入蝦米拌勻待去蒸 , 其餘的放入雪櫃雪佢一粒鐘 , 取適量材料搓圓再壓平 , 放入鑊中煎至兩面金黃 , 再灑上椒鹽就食得 , 好鬼正呢 ^^     



材料 : 布包豆腐 , 鯪魚肉 , 蝦米 , 雞蛋 , 蔥 , 椒鹽 , 生粉 , 糖 , 胡椒粉 , 麻油




蝦米加水浸過面 , 蔥洗淨切粒 , 雞蛋打出備用 , 布包豆腐用手弄碎再放入大碗內 , 再加入鯪魚肉 , 雞蛋及調味料拌勻 , 拌勻好後再加入2茶匙生粉再拌勻





 










蝦米用水沖一沖洗及瀝乾 , 取一半份量材料加入蝦米拌勻靜待30分鐘 , 其餘一半份量材料蓋上保鮮紙放入冰箱靜待1小時















將適量材料放入器皿內 , 放入電蒸鍋內蓋上蓋蒸15分鐘 , 期間從雪櫃取出材料靜待10分鐘 , 盛起適量份量搓圓再壓平 , 放入鑊中用慢火慢慢煎至一面金黃色不黏鑊(注意一定要煎至一面金黃離鑊才可翻另一面再煎 , 咁就會靚靚仔仔唔黏鑊喇) , 電蒸鍋蒸15分鐘後焗5分鐘 , 盛起淋上豉油及灑上蔥粒


















煎至一面金黃後 , 反轉另一面再用慢火煎至金黃 , 盛起灑上椒鹽即可








   

材料
布包豆腐3磚 , 鯪魚肉$15 , 蝦米 , 雞蛋2隻 , 蔥 , 椒鹽 , 生粉 , 糖 , 胡椒粉 , 麻油 

醃料
生粉 , 糖 , 生抽 , 麻油 , 胡椒粉



做法
1. 蝦米加水浸過面 , 蔥洗淨切粒 , 雞蛋打出備用 

2. 布包豆腐用手弄碎再放入大碗內 , 再加入鯪魚肉 , 雞蛋及調味料拌勻

3. 拌勻好後再加入2茶匙生粉再拌勻

4. 蝦米用水沖一沖洗及瀝乾 , 取一半份量材料加入蝦米拌勻靜待30分鐘 

5. 其餘一半份量材料蓋上保鮮紙放入冰箱靜待1小時 

6. 將適量材料放入器皿內 , 放入電蒸鍋內蓋上蓋蒸15分鐘

7. 期間從雪櫃取出材料靜待10分鐘 , 盛起適量份量搓圓再壓平 

8. 放入鑊中用慢火慢慢煎至一面金黃色不黏鑊
   (注意一定要煎至一面金黃離鑊才可翻另一面再煎 , 咁就會靚靚仔仔唔黏鑊喇) 

9. 電蒸鍋蒸15分鐘後焗5分鐘 , 盛起淋上豉油及灑上蔥粒

10. 煎至一面金黃後 , 反轉另一面再用慢火煎至金黃 , 盛起灑上椒鹽即可




煎完再灑上椒鹽 , 香口美味我喜歡 , 蒸的比較淡味 , 但淋上豉油加蔥粒 , 我都喜歡呢 ^^


  



9 則留言: