2017年7月24日 星期一

[素食版] 紅燒豆腐煲




閒時喜歡久唔久煲定上湯的我 , 前幾日就煲左一大煲素上湯 , 今日已急不及待用上湯黎煮野 ,不過究竟煮咩好呢 ??? 其實上湯用途可以好多 , 可以用來煮水餃底 , 用來炒粉麵 , 或者好似袁太今次選擇用來整小菜 , 都同樣咁正 ......



今次上湯配搭的係豆腐 , 話說前幾天袁太突然好鬼想食紅燒豆腐 , 想食的程度係每分每秘都想著它 , 印象中街食的好似有冬菇 , 有豬肉絲 , 不過今次想食素食版本 , 即係冇肉類的紅燒豆腐 , 由於冇時間浸冬菇的關係 , 將冬菇轉成草菇 , 肉絲轉成雪耳 , 雪耳平時只會用來煲湯的我 , 炒或炆都好似未曾試過 , 見雪櫃仲有雪耳 , 就浸醒舊雪耳再整碎佢 , 落鑊兜埋一堆 



而豆腐方面袁太比較喜愛用包布豆腐 , 將豆腐印乾水份 , 放入油鑊內炸至金黃先再入鑊炆 , 豆腐索晒汁料的味道 , 真係好鬼死正 , 另外見百寶箱有菜心苗 , 又加埋入去 , 加下加下 , 攪到個紅燒豆腐煲好鬼多料 , 不過炆左一大煲都好快食晒呢 ^^



材料 : 布包豆腐 , 菜心苗 , 草菇 , 雪耳 , 薑 , 蒜頭 , 酒 , 蔥 , 素湯 , 糖 , 水




菜心苗加少許鹽 , 加水浸過面靜待10分鐘 , 沖一沖洗後瀝乾水份備用 , 雪耳浸水待軟 , 蔥切段及切粒 , 薑去皮切絲 , 蒜頭去皮拍碎 , 將浸軟的雪耳撕成細塊 , 用水沖一沖洗及瀝乾 , 草菇洗淨切片
 














布包豆腐切成件後印乾水份 , 放入油鑊中用中火慢慢炸至金黃色 , 盛起放在廚紙上吸取油份 , 菜心苗放入鑊中加少許鹽拌勻 , 蓋上蓋用慢火煮3分鐘至熟透 , 盛起備用


















鑊中爆香薑片 , 蔥段及蒜頭 , 盛起蔥段去掉 , 加入草菇及雪耳 , 贊少許酒拌勻炒數分鐘 , 加入調味料 , 素上湯及2杯水份量拌勻 , 蓋上蓋用中火煮5分鐘
























5分鐘後加入豆腐拌勻 , 蓋上蓋用慢火煮10分鐘 , 最後加入菜心苗拌勻 , 將材料放入煲內 , 灑上蔥粒即可

















材料
布包豆腐4磚 , 菜心苗1/2斤 , 草菇 , 雪耳2個 , 薑 , 蒜頭1個 , 酒 , 蔥 , 素湯500ml , 糖 , 水2杯

調味料
素蠔油 , 生抽 , 糖



做法
1. 菜心苗加少許鹽 , 加水浸過面靜待10分鐘 , 沖一沖洗後瀝乾水份備用 

2. 雪耳浸水待軟 , 蔥切段及切粒 , 薑去皮切絲 , 蒜頭去皮拍碎 

3. 將浸軟的雪耳撕成細塊 , 用水沖一沖洗及瀝乾 , 草菇洗淨切片

4. 布包豆腐切成件後印乾水份 , 放入油鑊中用中火慢慢炸至金黃色 

5. 盛起放在廚紙上吸取油份

6. 菜心苗放入鑊中加少許鹽拌勻 , 蓋上蓋用慢火煮3分鐘至熟透 , 盛起備用

7. 鑊中爆香薑片 , 蔥段及蒜頭 , 盛起蔥段去掉 

8. 加入草菇及雪耳 , 贊少許酒拌勻炒數分鐘 , 加入調味料 , 素上湯及2杯水份量拌勻 

9. 蓋上蓋用中火煮5分鐘 

10. 5分鐘後加入豆腐拌勻 , 蓋上蓋用慢火煮10分鐘 

11. 最後加入菜心苗拌勻 , 將材料放入煲內 , 灑上蔥粒即可

 


冇肉素食版的紅燒豆腐都可以好吸引 , 而且仲好好拌飯呢 ^^





22 則留言:

  1. 豆腐炸得好靚

    回覆刪除
  2. 唔加肉的豆腐煲都好正呀

    回覆刪除
  3. 回覆
    1. 平時EE好多時都煮素,呢個一定啱食呢

      刪除
  4. 我好喜歡食紅燒豆腐, 出去酒樓常點.

    回覆刪除
  5. 哈哈!食完邪惡的西多,食D素,平衡番,醒目!

    回覆刪除
  6. 素食版的紅燒豆腐,好正喎

    回覆刪除