2017年8月2日 星期三

節瓜粟米紅衫魚湯




魚湯我最愛用紅衫魚 , 三文魚頭 , 魚尾同鯽魚煲 , 上次就煲左三文魚頭湯 , 本來想煲鯽魚 , 不過而家的鯽魚實在太貴了 , 之後經過賣淡水魚的魚檔見一份份紅衫魚只係廿五大洋 , 就買左一份決定煲紅衫魚湯 ......



其實以往紅衫魚係我呢邊街市比較難搵到 , 應該說係比較難見到細條的紅衫魚 , 次次都好鬼大條 , 只不過用來煮湯當然係用細條的好, 東買好魚之後又要想想用咩配紅衫魚 , 起初想用勝瓜 , 魚肚夾紅衫魚 , 不過可惜袁生唔愛勝瓜 , 如果用蔬菜類煲湯 , 他只愛芹菜同節瓜 , 咁就用節瓜吧 



另外加埋粟米同腐竹一齊煲 , 鮮甜的魚湯配上粟米的甜味 , 仲有腐竹的豆香味 , 用來做湯飯都幾好呢 ^^



材料 : 節瓜 , 紅衫魚 , 腐竹 , 粟米 , 薑 , 胡椒粉 , 鹽




紅衫魚用水洗淨乾淨放入器皿內 , 加入少許鹽及胡椒粉拌勻靜待30分鐘 , 節瓜刮去皮切厚片 , 粟米洗淨切段(粟米鬚及粟米皮留起) , 薑連皮切片 , 腐竹切段後用水沖一沖洗及瀝乾

















鑊中爆香薑片 , 放入紅衫魚用慢火慢慢煎至兩面金黃色 , 加入適量熱水蓋上蓋用中火煮20分鐘成奶白色










20分鐘後先將紅衫魚盛起 , 魚湯隔去薑片及魚渣 , 煲內加入粟米 , 節瓜 , 粟米皮及粟米鬚 , 將魚湯放回煲內拌勻 , 用中火煮滾後轉慢火蓋上蓋煲30分鐘 , 盛起粟米皮去掉 , 加入腐竹拌勻 , 蓋上蓋轉用中火煲多10分鐘 , 最後加少許鹽及胡椒粉調味拌勻煮滾 , 再熄火焗30分鐘即可



































材料 
節瓜3個 , 紅衫魚3條 , 腐竹$10 , 粟米1條 , 薑 , 胡椒粉 , 鹽



做法
1. 紅衫魚用水洗淨乾淨放入器皿內 , 加入少許鹽及胡椒粉拌勻靜待30分鐘 

2. 節瓜刮去皮切厚片 

3. 粟米洗淨切段(粟米鬚及粟米皮留起) , 薑連皮切片 

4. 腐竹切段後用水沖一沖洗及瀝乾

5. 鑊中爆香薑片 , 放入紅衫魚用慢火慢慢煎至兩面金黃色 

6. 加入適量熱水蓋上蓋用中火煮20分鐘成奶白色

7. 20分鐘後先將紅衫魚盛起 , 魚湯隔去薑片及魚渣

8. 煲內加入粟米 , 節瓜 , 粟米皮及粟米鬚 , 將魚湯放回煲內拌勻 

9. 用中火煮滾後轉慢火蓋上蓋煲30分鐘 , 盛起粟米皮去掉 , 加入腐竹拌勻 

10. 蓋上蓋轉用中火煲多10分鐘 

11. 最後加少許鹽及胡椒粉調味拌勻煮滾 , 再熄火焗30分鐘即可 





鮮甜美味的魚湯 , 如果現在有碟米線俾我就好呢 ^^






20 則留言:

  1. 我都好喜歡飲魚湯, 這個加腐竹仲正啊!

    回覆刪除
  2. 上次三文魚頭湯,今次紅衫魚湯,我兩款都鐘意

    回覆刪除
  3. 魚湯有益好味道

    回覆刪除
  4. 廿五蚊咁細條紅衫魚都唔平架,不過好新鮮。

    回覆刪除
    回覆
    1. 對我黎講,係呢邊街市搵到已經好平架喇

      刪除