2017年8月26日 星期六

西米雪耳百合綠豆爽




剛剛打完風 , 天氣變得好焗好悶熱 , 今日又話夜d會掛3號波 , 又會落雨 , 真頭痕 , 最近經常食煎炸 , 咖哩食物 , 牙肉開始有作痛的感覺 , 除左例牌飲多多水之外 , 其實煲下清熱滋潤的糖水都唔錯 , 袁太有好介紹俾大家 ......



講開糖水 , 呢排我經常性煲 , 事關袁生最近突然變得好鐘意食糖水 , 不過以往我比較喜愛去糖水店買, 因平時最愛的糖水只有紅豆沙同腐竹糖水的我 , 唔係 ... 應該仲有一樣 , 就係綠豆爽 , 袁太係潮州人的女兒 , 細細個食開白粥 , 紅果 , 蠔餅 , 炒麵線同綠豆爽大的我 , 綠豆爽都係我愛的中式糖水之一 , 不過以往綠豆爽會配清心丸一齊煲 , 清心丸唔知大家有冇聽過呢 ??? 以下的圖片 , 右邊一粒粒白白地色既就係清心丸






其實我都想買少少清心丸來配開邊綠豆煲 , 不過印象記得袁生之前講過唔鐘意食清心丸 , 既然佢唔食就無謂買喇 , 就轉換百合 , 雪耳呢類清熱滋潤的材料同煲 , 見雪櫃仲有少少西米 , 又加埋落去一齊煲 , 嘩 ... 呢碗糖水真係夠晒清熱解毒又滋潤呢 ^^



材料 : 開邊綠豆 , 雪耳 , 西米 , 百合 , 冰糖 , 水




開邊綠豆放入大碗內洗兩至三次至水份變得清徹 , 將開邊綠豆放入大碗內加水浸過面靜待1小時 , 雪耳加水浸20分鐘至軟身後 , 撕成細塊 , 用水沖一洗及瀝乾 , 百合撕成一片片後用水沖洗及瀝乾























將西米放入煲內 , 加水拌一拌勻以免西米黏底 , 用中火煮滾至西米成半透明狀態 , 盛起用水沖一沖洗雜質後 , 加冰水浸過面靜待10分鐘再瀝乾備用












已浸1小時的開邊綠豆倒去水份 , 用水沖一沖洗 , 瀝乾後放入煲內 , 加入水(水的份量蓋過綠豆就可) , 用中火煮滾後熄火蓋上蓋焗15分鐘 












將開邊綠豆盛起瀝乾水份後再放回煲內 , 逐一加入雪耳 , 百合 , 冰糖及3000ml水 , 拌勻後用中火煮滾 , 去掉面上的泡泡再煮滾 , 蓋上蓋用中火煮10分鐘至冰糖溶化(期間記得睇火 , 好容易滾瀉)



















10分鐘後加入西米拌勻轉用中火煲多幾分鐘 , 熄火焗30分鐘即可











材料
開邊綠豆 , 雪耳1個 , 西米 , 百合4個 , 冰糖 , 水3000ml



做法
1. 開邊綠豆放入大碗內洗兩至三次至水份變得清徹 

2. 將開邊綠豆放入大碗內加水浸過面靜待1小時

3. 雪耳加水浸20分鐘至軟身後 , 撕成細塊 , 用水沖一洗及瀝乾 

4. 百合撕成一片片後用水沖洗及瀝乾

5. 將西米放入煲內 , 加水拌一拌勻以免西米黏底 , 用中火煮滾至西米成半透明狀態 

6. 盛起用水沖一沖洗雜質後 , 加冰水浸過面靜待10分鐘再瀝乾備用

7. 已浸1小時的開邊綠豆倒去水份 , 用水沖一沖洗 

8. 瀝乾後放入煲內 , 加入水(水的份量蓋過綠豆就可) 

9. 用中火煮滾後熄火蓋上蓋焗15分鐘  

10. 將開邊綠豆盛起瀝乾水份後再放回煲內 

11. 逐一加入雪耳 , 百合 , 冰糖及3000ml水 , 拌勻後用中火煮滾 

12. 去掉面上的泡泡再煮滾 

13. 蓋上蓋用中火煮10分鐘至冰糖溶化(期間記得睇火 , 好容易滾瀉)

14. 10分鐘後加入西米拌勻轉用中火煲多幾分鐘 , 熄火焗30分鐘即可




味 , 清熱又滋潤的糖水 , 無論熱食或凍食都可以 , 多多碗都食得落呢 ^^





20 則留言:

  1. 多多料的糖水,街外食唔到。

    回覆刪除
  2. 清熱糖水夏天最啱食

    回覆刪除
  3. 我黎食糖水架

    回覆刪除
  4. 嘩!咁大煲,你們點食得哂,我來幫口喇。

    回覆刪除
  5. 好正啊! 吾該外賣一碗啊!

    回覆刪除
  6. 哩個原來唔難煮喎,下次跟你整先:)

    回覆刪除