2017年9月4日 星期一

吉列雞蛋豆腐魚肉三文治




袁太突然間好想食魚肉煎豆腐 , 平時見街市的板豆腐多到賣唔晒 , 但呢幾日 , 居然早上或下午時份去街市都唔見有得賣 , 唔係賣晒就係冇來貨 , 吓...... 乜豆腐都會唔來貨既咩 ??? 激死人喇 ......



難度想買件豆腐都咁難 ??? 既然買唔到板豆腐 , 咁就不如自己整豆腐吧 , 袁太廚房永遠都有包黃豆看門口 , 閒時最愛用來整豆漿 , 整好的豆漿可以用來煲湯 , 整甜豆漿 , 鹹豆漿或用來製作雞蛋豆腐 , 講開雞蛋豆腐 , 其實只不過係玉子豆腐 , 我家袁生就至愛 , 袁生呢個怪人唔愛布包豆腐 , 唔愛板豆腐 , 亦唔愛豆乾 , 但唯一玉子豆腐 , 他就無任歡迎 , 多多都食得落 



預先用黃豆做了無糖豆漿 , 加雞蛋就可以整成雞蛋豆腐 , 袁太之前都上傳過雞蛋豆腐的做法 , 做法極為簡單 , 只需要有無糖豆漿 , 雞蛋 , 鹽 , 保鮮紙就可以 , 蒸完就咁食又得 , 或者好似袁太今次咁 , 蒸完待涼再切成一片片扮方包 , 內餡用上生菜及魚肉 , 做到好似三文治咁 , 不過呢個唔係蛋治 , 唔係吞食魚治 , 而且豆腐魚肉三文治 , 不過豆腐比較滑 , 比較容易散 , 所以處理的時候要好小心呢 , 然後再沾上麵粉 , 雞蛋液及麵包糠做成吉列模樣 , 入冰箱雪至定型再放入鑊半煎炸 , ~哈~又係香口野來



見廚房還有半包黑芝麻 , 又係唔記得何時買落又未用完 , 加入麵包糠一起拌勻 , 再沾上豆腐落鑊炸 , 金金黃黃又黑色一點點 , 好靚靚 , 而且豆腐炸到外脆內軟滑 , 好味道 , 雖然功夫程序比簡單的魚肉煎豆腐多左少少步驟咁多多 , 但袁生喜愛這種食法 , 仲大讚袁太有心思呢 ^^



材料 : 無糖豆漿 , 雞蛋 , 唐生菜 , 鯪魚肉 , 黑芝麻 , 鹽 , 麵粉 , 麵包糠 




三隻雞蛋打入碗中 , 加入鹽及無糖豆漿拌勻 , 器皿放上保鮮紙 , 將豆漿蛋液用篩網隔去多餘泡沫及雜質 , 先放入蒸鍋內蓋上蓋蒸2分鐘 , 蒸25分鐘 , 用筷子將鑊蓋留縫隙(可避免蒸來的豆腐過老或變火山口) 

















  

取出稍為待涼 , 切成一片片 , 蓋上保鮮紙入雪櫃靜待30分鐘 , 期間將鯪魚肉放入大碗內 , 加少許鹽 , 麻油 , 胡椒粉拌勻靜待30分鐘 , 生菜洗淨撕成細塊
















將生菜逐片逐片放在雞蛋豆腐上(只放一半份量在豆腐上) , 再放上鯪魚肉 , 再將一片雞蛋豆腐放上 , 用手輕輕壓平成三文治










餘下兩隻雞蛋打成蛋液 , 黑芝麻與麵包糠拌勻 , 將每件雞蛋豆腐三文治逐一沾上麵粉 >>蛋液 >> 黑芝麻麵包糠 , 放上碟後再灑上黑芝麻麵包糠 , 蓋上保鮮紙後入冰箱冷藏1小時 , 最後放入鑊中用慢火半煎炸慢慢煎至兩面金黃色即可


















材料
無糖豆漿300ml , 雞蛋5隻 , 唐生菜1棵 , 鯪魚肉$12 , 黑芝麻 , 鹽 , 麵粉 , 麵包糠



做法
1. 三隻雞蛋打入碗中 , 加入鹽及無糖豆漿拌勻 

2. 器皿放上保鮮紙 , 將豆漿蛋液用篩網隔去多餘泡沫及雜質 

3. 先放入蒸鍋內蓋上蓋蒸2分鐘 

4. 蒸25分鐘 , 用筷子將鑊蓋留縫隙 (可避免蒸來的豆腐過老或變火山口) 

5. 取出稍為待涼 , 切成一片片 , 蓋上保鮮紙入雪櫃靜待30分鐘 

6. 期間將鯪魚肉放入大碗內 , 加少許鹽 , 麻油 , 胡椒粉拌勻靜待30分鐘 

7. 生菜洗淨撕成細塊

8. 將生菜逐片逐片放在雞蛋豆腐上(只放一半份量在豆腐上) 

9. 再放上鯪魚肉 , 再將一片雞蛋豆腐放上 , 用手輕輕壓平成三文治

10. 餘下兩隻雞蛋打成蛋液 , 黑芝麻與麵包糠拌勻 

11. 將每件雞蛋豆腐三文治逐一沾上麵粉 >>蛋液 >> 黑芝麻麵包糠 

12. 放上碟後再灑上黑芝麻麵包糠 , 蓋上保鮮紙後入冰箱冷藏1小時 

13. 最後放入鑊中用慢火半煎炸慢慢煎至兩面金黃色即可 




要切開先可以清楚見到三文治的形狀 , 而且煎到金金黃黃好吸引呢 ^^






22 則留言:

  1. 回覆
    1. 我鐘意煮野係因為喜愛可以多元化配搭呢

      刪除
  2. 9月4號果日我問老闆點解無豆腐買, 佢答我鬼節嘛, 唔好同人爭啦... ~_~

    回覆刪除
    回覆
    1. 哦…係喎,好多人都會買芽菜,豆腐拜拜呢

      刪除
  3. 只係雞蛋,豆漿同魚肉都可整到咁靚的炸雞蛋豆腐,袁太勁呀

    回覆刪除
  4. 袁太好有心思同心機

    回覆刪除
  5. 回覆
    1. 我今日都再encore呢個炸豆腐呢

      刪除