2017年9月12日 星期二

香濃蕃茄牛尾湯




前幾日係日式超市買了兩pack牛尾回家放左入冰箱 , 起初買來想用來燉 , 後來袁生突然想飲 牛尾湯 , 以我性格當然唔會買超市又難飲又冇味道的罐頭湯 ......



起初都有點猶疑 , 究竟用牛尾煲韓式湯還是西式湯好 , 最終由袁生至愛的蕃茄勝出 , 就煲西式湯吧 , 再去街市買好其餘材料 , 就可以回家慢慢煲 , 袁太知袁生愛飲牛尾湯的原因 , 係喜愛牛的味道重過蕃茄的酸味 , 所以唔敢落多多茄膏 , 慢慢煲至牛尾的味道出晒黎 , 再加少少鹽及黑胡椒碎調味就可以



呢個牛尾湯一煲就煲左三個鐘 , 牛尾煲到肉質鬆化 , 本來想買條法包拌牛尾湯 , 不過買完材料急急腳走回家 , 又唔記得左 , 不過袁生話淨飲牛尾湯食牛尾都夠飽 , 飲唔晒的牛尾湯第日加通粉又變牛尾湯通做午餐 , 都同樣好味道呢 ^^



材料 : 牛尾 , 甘旬 , 西芹 , 洋蔥 , 蕃茄 , 麵粉 , 茄膏 , 鹽 , 黑胡椒粒 , 熱水




牛尾放入器皿內 , 加少許鹽拌勻靜待20分鐘 , 西芹去纖維 , 甘旬去皮 , 洋蔥去衣 , 西芹 , 甘旬切粒 , 用水沖一沖洗及瀝乾 , 蕃茄洗淨切粒 , 洋蔥切粒














牛尾兩面沾上少許麵粉 , 放入煲內用中火煎至兩面金黃色 , 盛起放在廚紙上吸取油份







煲內加少許油燒熱 , 放入蕃茄粒炒至出茄油 , 再加入西芹粒 , 甘旬粒 , 洋蔥粒快炒拌勻 , 再加入牛尾拌勻 , 加入2湯匙茄膏及適量熱水 , 拌勻用中火煲15分鐘至滾 , 蓋上蓋轉慢火先煲1小時 





















1小時後再加入適量熱水入湯內 , 拌勻後蓋上蓋繼續用慢火煲1 1/2小時 , 期間小心滾瀉 , 最後加入鹽及黑胡椒碎拌勻轉用中火再煲滾 , 熄火焗30分鐘即可 



















材料
牛尾200g , 甘旬1條 , 西芹1/2扎 , 洋蔥1個 , 蕃茄3個 , 麵粉 , 茄膏2湯匙 , 鹽 , 黑胡椒粒 , 熱水



做法
1. 牛尾放入器皿內 , 加少許鹽拌勻靜待20分鐘 

2. 西芹去纖維 , 甘旬去皮 , 洋蔥去衣 , 西芹 , 甘旬切粒 , 用水沖一沖洗及瀝乾 

3. 蕃茄洗淨切粒 , 洋蔥切粒 

4. 牛尾兩面沾上少許麵粉 , 放入煲內用中火煎至兩面金黃色

5. 盛起放在廚紙上吸取油份

6. 煲內加少許油燒熱 , 放入蕃茄粒炒至出茄油 

7. 再加入西芹粒 , 甘旬粒 , 洋蔥粒快炒拌勻 , 再加入牛尾拌勻 

8. 加入2湯匙茄膏及適量熱水 , 拌勻用中火煲15分鐘至滾 , 蓋上蓋轉慢火先煲1小時 

9. 1小時後再加入適量熱水入湯內 

10. 拌勻後蓋上蓋繼續用慢火煲1 1/2小時 , 期間小心滾瀉 

11. 最後加入鹽及黑胡椒碎拌勻轉用中火再煲滾 , 熄火焗30分鐘即可 

 


自家製牛尾湯絕對足料炮製 , 有香香濃濃的牛肉香味 , 不過可惜又冇我份呢 ^^





24 則留言:

  1. 咁巧合, 我昨晚又係煮牛尾. 😊

    回覆刪除
  2. 濃濃的牛尾湯我鐘意飲

    回覆刪除
  3. 睇見都知香濃,引到留哂口水了。

    回覆刪除
  4. 有香濃的蕃茄味同牛尾的香味,我都想飲呀

    回覆刪除
  5. 睇個賣相都知妳濃郁,好香濃呢

    回覆刪除
  6. WA...睇相都覺得好好好好好正呀!
    肥人一直都想煲架但一直都好好好好好好懶...HAHAA

    回覆刪除