2017年10月17日 星期二

[街頭小食] 片糖煨蕃薯




又黎焗爐食譜 , 由細到大我都好鐘意食煨蕃薯 , 當秋涼或天氣凍到震的時候 , 屋企附近總有一檔流動煨蕃薯 , 不過買一條都要成廿幾蚊 , 真係好點兒貴喎 , 其實自己係屋企可唔可以整到煨蕃薯的味道呢 ......



不過近幾年就算天氣寒冷 , 屋企附近的流動蕃薯檔已經好幾年冇再出現 , 想食真係唯有自己動手做 , 好偶然的情況下 , 某日陪袁生去圖書館搵設計書 , 而我就無無聊聊去睇烹飪書 , 睇左一本關於香港地道小食的書 , 入面居然有煨蕃薯的食譜 , 仲要係簡單到可以用焗爐整 , 而且材料只需要蕃薯 , 片糖  , 水同錫紙就可以 , 當去完圖書館就即刻去街市買蕃薯試下整



當日用左大約兩個鐘頭時間製作 , 過程其實相當簡單  , 比較麻煩只係每15分鐘要將蕃薯兩面掃上片糖水 , 片糖水呢個步驟一定唔可以唔做 , 因為片糖水係整個煨蕃薯的靈魂所在 , 當蕃薯皮掃左片糖水再放入焗爐焗 , 就會變成街檔香噴噴煨蕃薯的焦香味



袁太一路焗一路聞到好香的煨蕃薯味 , 焗好的煨蕃薯同街檔的味道完全相似 , 係焗爐焗好熱辣辣即刻食 , 需要燙口 , 但絕對超正 , 袁生見我連街檔的煨蕃薯都整到 , 話真係要寫個服字俾我呢 ^^



材料 : 橙心蕃薯(大家喜愛都可以轉用黃心或紫心) , 片糖 , 錫紙 , 水 , 叉 , 掃 , 黑芝麻(拌蕃薯食,可省略)




蕃薯洗淨後用毛巾抹乾水份放入煲內 , 加入片糖及1200ml水 , 用中火煮至片糖完全溶化 , 蓋上蓋轉慢火煮20分鐘 , 期間將蕃薯反一反另一面 , 蓋上蓋繼續用慢火煮 , 煮20分鐘後熄火焗10分鐘 , 焗爐用250C預熱10分鐘
















    
焗10分鐘後將蕃薯盛起用毛巾抹乾 , 用叉係蕃薯表面拮幾下(到時掃片糖水時就可以入味d) 








焗盤放上錫紙 , 再放上蕃薯 , 入焗爐用250C上下火焗45分鐘 , 之前煮蕃薯的片糖水留起 , 蕃薯焗15分鐘後將蕃薯從焗爐取出 , 蕃薯兩面掃上適量片糖水 , 再放入焗爐繼續焗 












15分鐘後又將蕃薯從焗爐取出 , 兩面再掃上適量片糖水 , 再入焗爐繼續焗 , 焗好45分鐘後取出靜待10分鐘即可 









材料
橙心蕃薯6個(大家喜愛都可以轉用黃心或紫心) , 片糖3 1/2磚 , 錫紙 , 水1200ml , 叉 , 掃 , 黑芝麻(拌蕃薯食,可省略)



做法
1. 蕃薯洗淨後用毛巾抹乾水份放入煲內 , 加入片糖及1200ml水 

2. 用中火煮至片糖完全溶化 , 蓋上蓋轉慢火煮20分鐘 

3. 期間將蕃薯反一反另一面 , 蓋上蓋繼續用慢火煮 

4. 煮20分鐘後熄火焗10分鐘

5. 焗爐用250C預熱10分鐘

6. 焗10分鐘後將蕃薯盛起用毛巾抹乾 , 用叉係蕃薯表面拮幾下
   (到時掃片糖水時就可以入味d)  

7. 焗盤放上錫紙 , 再放上蕃薯 , 入焗爐用250C上下火焗45分鐘 

8. 之前煮蕃薯的片糖水留起 

9. 蕃薯焗15分鐘後將蕃薯從焗爐取出 , 蕃薯兩面掃上適量片糖水 

10. 再放入焗爐繼續焗 

11. 15分鐘後又將蕃薯從焗爐取出 , 兩面再掃上適量片糖水 , 再入焗爐繼續焗 

12. 焗好45分鐘後取出靜待10分鐘即可





熱辣辣的煨蕃薯 , 無論天氣炎熱或寒冷 , 都一樣咁好味 , 食時灑上少許黑芝麻仲好味添呢 ^^





20 則留言:

  1. 以前細個家人時常買的, 好多年無食過啦!

    回覆刪除
    回覆
    1. 而家出面太貴,貴到都唔捨得買

      刪除
  2. 依家在街買煨蕃薯好貴架,我試過買一隻大的要廿幾蚊。

    回覆刪除
    回覆
    1. 係呀,新年的時候買一條試過三十幾蚊添呀

      刪除
  3. 天氣冇咁熱!食呢個好夾呀

    回覆刪除
    回覆
    1. 而家涼涼地的天氣食就最啱呢

      刪除
  4. 煨蕃薯都可以自己整,太利害啦

    回覆刪除
  5. 而家街檔的煨蕃薯真係好貴架,自己整便宜得多

    回覆刪除
  6. 另外橙心蕃薯我呢邊好少見

    回覆刪除
  7. 煨蕃薯都自己製,掂呀

    回覆刪除