2017年10月18日 星期三

煙肉雜菜雞卷




袁生好喜歡食雞卷 , 以往雞卷都係電視的外國烹飪節目中看過 , 印象中多數都用菠菜做餡料 , 雖然個雞卷主要係整俾袁生食 , 但都要配合仲有我呢個成員 , 不過麻煩友唔太食菠菜 , 又唔喜愛蘆筍 , 唯有轉一轉材料 , 轉用西芹 , 甘旬這類蔬菜做成雜菜餡 , 應該唔會差得過用菠菜(我絕對相信) ......



繁複的做法要將雞扒醃好 , 蒸下蔬菜 , 用煙肉卷起 , 再用雞扒包住餡料 , 再用料理棉繩係咁扎 ... 扎 ... 扎 ... , 扎到佢實一實 (袁太扎肉的功夫還是未到家 , 每次都扎得好樣衰) , 然後將雞卷放入鑊中煎香 , 再加汁料煮下佢 , 待涼再切件 , 咁就完成 , 算唔算多功夫呢



呢款雞卷煎香後 , 內裡的雞肉依然超滑滑 , 絕對唔會"鞋烚烚"架 , 而且雞肉同煙肉及蔬菜都好夾 , 用來拌飯或拌意粉都唔錯呢 ^^



材料 : 雞扒 , 煙肉 , 甘旬 , 西芹 , 黑胡椒碎 , 鹽 , 糖 , 生粉 , 酒 , 蔥絲(作裝飾用,可省略) , 料理棉繩 (購自Living Plaza) 




雞扒洗淨 , 用刀背剁一剁塊雞扒 , 放入器皿內加入黑胡椒碎 , 酒及醃料拌勻靜待30分鐘 , 30分鐘後反轉另一面 , 同樣靜待30分鐘 , 期間將西芹去纖維 , 甘旬去皮 , 西芹及甘旬均切成條狀 , 放上碟後放入電蒸鍋內蓋上蓋蒸10分鐘
















將西芹條及甘旬條放在煙肉片上卷起(每片煙肉用兩條西芹條及一條甘旬條) , 再放在已醃好的雞扒中下方位置 , 卷起後用料理棉繩紮實靜待1小時 , 期間將調味料放入碗內 , 加100ml水拌勻備用
















燒紅鑊 , 將雞卷放入鑊中用中慢火慢慢煎至兩面金黃色 , 盛起靜待10分鐘 








將雞卷回鑊中 , 加入調味料 , 蓋上蓋用慢火煮10分鐘再熄火焗5分鐘 , 最後將雞卷及汁料分別盛起 , 雞卷待涼10分鐘後剪去棉繩 , 將雞卷切件放上碟 , 再淋上汁料即可 

 












材料
雞扒2塊 , 煙肉2片 , 甘旬1條 , 西芹1/2扎 , 黑胡椒碎 , 鹽 , 糖 , 生粉 , 酒 , 蔥絲(作裝飾用,可省略) , 料理棉繩 (購自Living Plaza)

醃料
生抽 , 鹽 , 糖 ,黑胡椒粒 , 酒

調味料
生抽 , 生粉 , 糖 , 麻油 



做法
1. 雞扒洗淨 , 用刀背剁一剁塊雞扒 

2. 放入器皿內加入黑胡椒碎 , 酒及醃料拌勻靜待30分鐘 

3. 30分鐘後反轉另一面 , 同樣靜待30分鐘 

4. 期間將西芹去纖維 , 甘旬去皮 , 西芹及甘旬均切成條狀 

5. 放上碟後放入電蒸鍋內蓋上蓋蒸10分鐘

6. 將西芹條及甘旬條放在煙肉片上卷起(每片煙肉用兩條西芹條及一條甘旬條) 

7. 再放在已醃好的雞扒中下方位置 , 卷起後用料理棉繩紮實靜待1小時 

8. 期間將調味料放入碗內 , 加100ml水拌勻備用 

9. 燒紅鑊 , 將雞卷放入鑊中用中慢火慢慢煎至兩面金黃色 , 盛起靜待10分鐘  

10. 將雞卷回鑊中 , 加入調味料 , 蓋上蓋用慢火煮10分鐘再熄火焗5分鐘 

11. 最後將雞卷及汁料分別盛起 

12. 雞卷待涼10分鐘後剪去棉繩 , 將雞卷切件放上碟 , 再淋上汁料即可

 


呢個方法做的雞卷 , 雞肉絕對滑滑唔鞋口 , 好好味道呢 ^^




16 則留言: