2017年10月27日 星期五

港式焗豬扒飯(炒飯底)




我家袁生平時好喜愛 ... 好喜愛去"大大活"或者"大快樂"食焗豬扒飯 , 但袁太經常有疑問 , 點解一位唔太喜愛食蕃茄的人(因袁生平時會嫌蕃茄酸味太重) , 反而會喜歡豬扒飯 ...... 



因我覺得連鎖快餐店的焗豬扒飯 , 蕃茄的酸味都比較重 , 但見袁生成日食 , 又唔見佢有投訴 , 剛巧俾我發現冰箱有豬扒 , 雪櫃又有芝士同冷飯 , 嘻 ... 嘻 ... 大家應該都知我想點喇 , 就係自己整個焗豬扒飯俾袁生食 , 快快手去街市買蕃茄同其餘材料 , 為左預防袁生有所挑剔 , 我就盡量唔整太酸 , 因茄膏的酸味本身都幾重 , 又或者轉個比喻 , 出街食少許酸佢就接受得到 , 反而如果我整得酸 , 佢就一定會嘈嘈閉 , 袁生的性格就是這樣



不過以我印象中街既焗豬扒飯的炒飯底裡面會有蘑菇同雜豆 , 我就唔會用呢兩樣材料 , 因為我唔太鐘意雜豆 , 袁生就唔太鐘意蘑菇 , 所以個炒飯簡簡單單只係用雞蛋整成蛋炒飯 , 袁生只對焗豬扒飯有一個要求 , 就係要有多多芝士碎 , 唔多芝士佢絕對唔會收貨



我今次分開兩盆焗 , 大盆既用來做晚餐 , 細盆既俾袁生羿日做午飯 , 熱辣辣剛剛焗起當然係最好味 , 無論芝士 , 豬扒或者炒飯都出晒煙 , 好鬼正 , 連袁生都讚不絕口 , 下次一定要再encore ^^
 


材料 : 冷飯 , 有骨豬扒 , 蕃茄 , 雞蛋 , Mozzarella芝士碎 , 茄膏 , 蒜頭 , 洋蔥 , 上湯 , 鹽 , 糖 , 黑胡椒碎 , 麵粉 , 焗盤




有骨豬扒用刀背拍鬆兩面 , 加入醃料拌勻靜待30分鐘 , 兩隻雞蛋打成蛋液 , 將一半份量蛋液放入鑊中拌勻炒成蛋粒 , 加入冷飯 , 少許鹽調味拌勻炒散 , 將餘下份量蛋液加入 , 用中火快炒拌勻至冷飯乾身 , 先盛起放入焗盤內
























洋蔥及蒜頭去衣 , 洋蔥切幼條 , 蒜頭切粒 , 蕃茄洗淨切件 , 將材料餘下的兩隻雞蛋打成蛋液 , 將醃好的豬扒逐一沾上蛋液及麵粉 , 放入鑊中用慢火慢慢煎至金黃色 , 盛起待涼片刻後 , 原塊豬扒放在炒飯面
















燒紅鑊加入蒜粒及洋蔥爆香 , 再加入茄膏 , 少許鹽及黃糖調味 , 加入蕃茄拌勻炒數分鐘至蕃茄軟身 , 再加入上湯拌勻用中火煮幾分鐘至滾起 , 加入麵粉拌勻煮至汁稍為杰身 




















將汁料淋在豬扒上 , 再灑多多Mozzarella芝士碎 , 放入焗爐先用上下火220C焗15分鐘 , 再轉用180C上火焗5分鐘至芝士成金黃色 , 焗好後取出靜待10分鐘即可
















材料
冷飯3碗 , 有骨豬扒2塊 , 蕃茄3個 , 雞蛋4隻 , Mozzarella芝士碎 , 茄膏2湯匙 , 蒜頭1/2個 , 洋蔥1個 , 上湯300ml , 鹽 , 糖 , 黑胡椒碎 , 麵粉 , 焗盤1個

醃料
生抽 , 生粉 , 糖 , 麻油 , 黑胡椒碎



做法
1. 有骨豬扒用刀背拍鬆兩面 , 加入醃料拌勻靜待30分鐘 

2. 兩隻雞蛋打成蛋液 

3. 將一半份量蛋液放入鑊中拌勻炒成蛋粒 , 加入冷飯 

4. 少許鹽調味拌勻炒散 , 將餘下份量蛋液加入 , 用中火快炒拌勻至冷飯乾身 

5. 先盛起放入焗盤內
 
6. 洋蔥及蒜頭去衣 , 洋蔥切幼條 , 蒜頭切粒 , 蕃茄洗淨切件 

7. 將材料餘下的兩隻雞蛋打成蛋液 , 將醃好的豬扒逐一沾上蛋液及麵粉 

8. 放入鑊中用慢火慢慢煎至金黃色 , 盛起待涼片刻後 , 原塊豬扒放在炒飯面

9. 燒紅鑊加入蒜粒及洋蔥爆香 , 再加入茄膏 , 少許鹽及黃糖調味 

10. 加入蕃茄拌勻炒數分鐘至蕃茄軟身 

11. 再加入上湯拌勻用中火煮幾分鐘至滾起 , 加入麵粉拌勻煮至汁稍為杰身 

12. 將汁料淋在豬扒上 , 再灑多多Mozzarella芝士碎 

13. 放入焗爐先用上下火220C焗15分鐘 , 再轉用180C上火焗5分鐘至芝士成金黃色 

14. 焗好後取出靜待10分鐘即可 




新鮮焗出來熱辣辣超好味 , 豬扒好淋身又夠juicy , 絕對唔鞋口呢 ^^




 

22 則留言:

  1. 下次加埋磨菇呀, 更香呀!

    回覆刪除
  2. 我都鐘意食焗豬扒飯呀

    回覆刪除
  3. 嘩…用左咁多芝士一齊焗,正呀

    回覆刪除
  4. 仲有金金黃黃的炒飯,我可以食到好大碟架

    回覆刪除
  5. 好啱食,若少啲芝士更好。

    回覆刪除
  6. 而家出面D焗豬扒飯無以前咁好食,袁太哩個一定好味D~

    回覆刪除