2017年11月10日 星期五

[素羹] 西芹蘑菇粟米豆腐羹




中式羹有好多種 , 牛肉羹 , 海鮮羹 , 素翅羹 , 魚肉羹等等 ... 不過我最愛的中式羹都係佢 ~粟米羹~ , 粟米羹我一向好簡單 , 用粟米蓉 , 粟米粒加雞湯 , 加百福豆腐同魚肚 , 煮埋一窩就飲得 , 不過都係個句 , 而家唔食得雞 , 所以咩雞精 , 雞粉 , 雞湯統統都唔用得 ......
 


何況我今次想整個素羹 , 所以就簡單加入水去煮 , 照以往用粟米蓉 , 粟米粒去烹調 , 不過豆腐就換上雞蛋豆腐 , 又黎用豆漿同雞蛋自家製 , 另外再加上西芹同白蘑菇做配料 , 當然唔少得蛋液拌勻煮成羹狀 , 一路煮袁生一路同我講 , 妳連煮粟米羹都用咁多料 , 真係服左妳囉 , 如果妳去開餐廳 , 一定蝕死妳 , 煮咩都咁多料 , 係 ... 係 ... 係 ... 所以我咪唔開餐廳 , 只係做你的御用家廚囉 , 咁得未



其實話袁太煮野用多料 , 唔係得袁生咁講 , 袁太爸爸都講過袁太每次煮野都咁足料 , 好難會食得番出面街的野喎 , 都唔知係佢地講得誇張 , 還是我真係每次都咁足料炮製所致呢 ^^



材料 : 粟米蓉 , 白蘑菇 , 雞蛋 , 無糖豆漿 , 新鮮粟米 , 鹽 , 胡椒粉 , 西芹 , 蔥 , 芫茜(裝飾用可省略) , 隔篩 , 水 




3隻雞蛋打入大碗內 , 加入鹽及無糖豆漿拌勻 , 蒸盆放上一層保鮮紙 , 將豆漿蛋液用篩網隔去多餘泡沫及雜質 , 放入電蒸鍋內蓋上蓋先蒸2分鐘 , 2分鐘後用筷子將鑊蓋留縫隙(可避免蒸來的豆腐過老或變火山口) , 再蒸25分鐘 , 蒸好待涼10分鐘


















新鮮粟米去外皮及粟米鬚 , 放入電蒸鍋內蓋上蓋蒸20分鐘 , 期間將西芹去纖維切粒 , 蔥切粒 , 白蘑菇切片 , 將西芹粒放入煲內 , 加少許油及鹽 , 加水浸過面用中火煮滾 , 將西芹粒盛起用水沖一沖洗及瀝乾 , 白蘑菇片放入鑊中加少許鹽拌勻炒數分鐘至軟身 , 粟米蒸好將粟米起粒














 





粟米蓉放入煲內 , 逐一加入粟米粒 , 西芹粒及白蘑菇片 , 加入3000ml水拌勻 , 用中火煮至微滾後盛起面上泡泡去掉 , 再煮滾後拌一拌勻煲內材料 , 蓋上蓋繼續用中火煮30分鐘 , 期間小心滾瀉

















待涼的雞蛋豆腐切粒 , 加入冰水浸10分鐘 , 餘下的2隻雞蛋打成蛋液 , 豆腐浸10分鐘後瀝乾水份










將雞蛋豆腐及蛋液放入粟米羹內拌勻 , 蓋上蓋轉慢火煮10分鐘 , 最後加入胡椒粉調味拌勻即可














材料
粟米蓉2盒 , 白蘑菇 , 雞蛋5隻 , 無糖豆漿300ml , 新鮮粟米1條 , 鹽 , 胡椒粉 , 西芹1/2扎 , 蔥 , 芫茜(裝飾用可省略) , 隔篩 , 水3000ml 



做法
1. 3隻雞蛋打入大碗內 , 加入鹽及無糖豆漿拌勻 

2. 蒸盆放上一層保鮮紙 , 將豆漿蛋液用篩網隔去多餘泡沫及雜質 

3. 放入電蒸鍋內蓋上蓋先蒸2分鐘 

4. 2分鐘後用筷子將鑊蓋留縫隙(可避免蒸來的豆腐過老或變火山口) , 再蒸25分鐘 

5. 蒸好待涼10分鐘

6. 新鮮粟米去外皮及粟米鬚 , 放入電蒸鍋內蓋上蓋蒸20分鐘 

7. 期間將西芹去纖維切粒 , 蔥切粒 , 白蘑菇切片 

8. 將西芹粒放入煲內 , 加少許油及鹽 , 加水浸過面用中火煮滾 

9. 將西芹粒盛起用水沖一沖洗及瀝乾 

10. 白蘑菇片放入鑊中加少許鹽拌勻炒數分鐘至軟身 , 粟米蒸好將粟米起粒 

11. 粟米蓉放入煲內 , 逐一加入粟米粒 , 西芹粒及白蘑菇片 , 加入3000ml水拌勻 

12. 用中火煮至微滾後盛起面上泡泡去掉 

13. 再煮滾後拌一拌勻煲內材料 , 蓋上蓋繼續用中火煮30分鐘 

14. 期間小心滾瀉 

15. 待涼的雞蛋豆腐切粒 , 加入冰水浸10分鐘 

16. 餘下的2隻雞蛋打成蛋液 , 豆腐浸10分鐘後瀝乾水份 

17. 將雞蛋豆腐及蛋液放入粟米羹內拌勻 , 蓋上蓋轉慢火煮10分鐘 

18. 最後加入胡椒粉調味拌勻即可 




呢個素羹雖然只係加水煮 , 冇用雞湯 , 但味道十分之好 , 我會俾滿分呢 ^^






18 則留言: