2017年11月29日 星期三

[蒸+煎] 大白菜木耳豬肉餃




最近的天氣感覺凍凍地 , 但間唔中又有猛猛太陽 , 雖然係咁 , 但袁太最近落街市買餸 , 都已經著左件比較厚的長身冷衫加頸巾 , 不過有時都覺得沾寒沾凍 , 大家朝早上班的時候都要多多保暖 , 唔好冷親 , 呢排又受到腰患的關係 , 唔想長時間企係廚房煮食 , 但又唔想食外賣 , 最好選擇當然又係包餃餃 ......



日常生活我同袁生都喜愛食餃 , 以前只會係超市買一包包的現成水餃回家煮 , 不過越食就越覺得唔好味 , 所以近呢幾年都會選擇自己動手包 , 永遠覺得自己包 , 可以用咩材料都得 , 既健康又新鮮 , 同埋可以控制鹹味的程度 , 今次就選擇用大白菜配豬肉做餡料 , 另外加上爽口的木耳絲 , 起初包完餃餃 , 想用作煎餃及湯餃兩款 , 不過湯餃所用的湯底袁太又冇準備到 , 其實袁太想問問大家 , 大家有咩湯餃的湯底可以介紹俾袁太呢 ???



不過當然湯底裡面唔可以用雞湯 , 雞粉或牛肉湯之類呢 , 如果大家有湯底好介紹 , 不妨話俾袁太知 ^^



既然冇預備湯餃底 , 咁就簡單整煎餃同蒸餃 , 袁生就一定要配豆瓣醬或辣椒豉油拌食 , 我就喜歡咩都唔沾 , 只係蒸完餃之後灑少許黑芝麻粒 , 簡單又好味呢 ^^




材料 : 半肥瘦梅頭肉 , 大白菜 , 木耳絲 , 薑 , 餃子皮 , 麵粉 , 胡椒粉 , 鹽 , 糖 , 生粉 , 雞粉




半肥瘦梅頭肉切絲再切粒後剁成肉餅狀 , 木耳絲浸水至軟身 , 薑蘑成薑汁 , 大白菜去蒂 , 加少許鹽及水浸過面靜待10分鐘 , 期間將豬肉碎放入大碗內加入雞粉 , 薑汁及醃料拌勻先靜待30分鐘


















大白菜浸10分鐘後清洗乾淨 , 放入煲內加少許鹽拌勻用中火煮至菜軟身 , 盛起瀝乾水份切碎 , 將大白菜碎渣乾水份 , 浸至軟身的木耳絲用水沖一沖洗及瀝乾
















之前醃左30分鐘的豬肉碎 , 逐一加入大白菜碎及木耳絲拌勻 , 用手撻十餘下 , 蓋上保鮮紙入雪櫃靜待1小時












器皿內放上保鮮紙及灑上麵粉 , 將餡料放上餃子皮中間位置 , 再對摺封口 , 餃子面再灑上麵粉 , 蓋上保鮮紙入冰箱冷藏30分鐘 , 取適量餃子放入電蒸鍋內 , 蓋上蓋蒸15分鐘 , 期間將適量餃子放入鑊中用慢火慢慢煎至金黃脆身即可
























材料 
半肥瘦梅頭肉$25 , 大白菜3棵 , 木耳絲 , 薑 , 餃子皮 , 麵粉 , 胡椒粉 , 鹽 , 糖 , 生粉 , 雞粉

醃料 
生抽 , 老抽 , 糖 , 生粉 , 油 , 麻油 , 胡椒粉



做法
1. 半肥瘦梅頭肉切絲再切粒後剁成肉餅狀 , 木耳絲浸水至軟身 , 薑蘑成薑汁 

2. 大白菜去蒂 , 加少許鹽及水浸過面靜待10分鐘 

3. 期間將豬肉碎放入大碗內加入雞粉 , 薑汁及醃料拌勻先靜待30分鐘  

4. 大白菜浸10分鐘後清洗乾淨 , 放入煲內加少許鹽拌勻用中火煮至菜軟身 

5. 盛起瀝乾水份切碎 , 將大白菜碎渣乾水份 

6. 浸至軟身的木耳絲用水沖一沖洗及瀝乾

7. 之前醃左30分鐘的豬肉碎 , 逐一加入大白菜碎及木耳絲拌勻 , 用手撻十餘下 

8. 蓋上保鮮紙入雪櫃靜待1小時  

9. 器皿內放上保鮮紙及灑上麵粉 

10. 將餡料放上餃子皮中間位置 , 再對摺封口 

11. 餃子面再灑上麵粉 , 蓋上保鮮紙入冰箱冷藏30分鐘 

12. 取適量餃子放入電蒸鍋內 , 蓋上蓋蒸15分鐘 

13. 期間將適量餃子放入鑊中用慢火慢慢煎至金黃脆身即可 




自家製餃餃永遠夠足料 , 今次只包左30隻 , 感覺唔係好夠食呢 ^^





20 則留言:

  1. 我鍾意食煎呢~香口好味呀~!

    回覆刪除
  2. 自製餃子我都係喜歡煎來食。

    回覆刪除
    回覆
    1. 以往我都係煎餃多,但食食下又覺得蒸餃都唔錯呢

      刪除
  3. 我都係一樣鐘意煎

    回覆刪除
  4. 好靚呀,我會唔捨得食

    回覆刪除
  5. 每粒都好靚^^ 如果放湯,配魚湯或者泡菜豆腐湯如何呢?

    回覆刪除
    回覆
    1. 係喎,泡菜豆腐湯都唔錯喎,多謝艾華斯的意見呢

      刪除
  6. 肥人唔愛餃,只愛雲吞..hahaa~~~~

    回覆刪除
  7. 我比較喜歡蒸餃

    回覆刪除