2017年12月15日 星期五

香橙薏米水




無論夏天熱的時候 , 或者秋涼天氣凍的時候 , 袁太都會煲薏米水飲 , 何況最近天氣 , 朝早同入夜真係好凍 , 身體差d都會中招 , 好容易病 , 真係要煲d野飲下增強抵抗力 , 以往一向只會用檸檬來配薏米煲 , 不過屋企條麻煩友而家又話唔飲得檸檬 , 話飲完會腳痛喎 , 真麻煩 ......



相信大家多數都好似袁太咁用檸檬煲 , 不過如果將檸檬轉為橙的話 , 唔知大家又試過未呢 ???
不過袁太可以同大家講 , 用橙絕對好味過用檸檬煲架



事緣其實袁太一向都喜愛食橙 , 大家知喇 , 係街市買橙通常十蚊都有幾個 , 袁生又一向唔食橙既 , 事問我點可以一個人食晒咁多個橙呢 , 直至某日清理百寶箱的時候 , 發現還有大大包生薏米 , 想盡快清掉 , 除煲湯外 , 就只有煲水先可以清得最快 , 如只用薏米同冰糖去煲 , 味道會唔會有點dry呢 ??? 檸檬又唔落得 , 橫掂見雪櫃還有三個細橙 , 一於決定加橙入去煲 , 煲佢粒幾鐘 , 可以熱飲或冷飲 , 而且味道甜甜易入口 , 最重要係食埋d薏米 , 真係好味又有益呢 ^^



材料 : 生薏米 , 橙 , 冰糖 , 水




生薏米用水沖一沖洗及瀝乾 , 將生薏米放入煲內 , 加3500ml水拌勻 , 先用中火煮滾 , 滾段除去面上泡沫後拌一拌勻 , 再煲滾後蓋上蓋轉慢火煲1小時(期間小心滾瀉)

















將1個橙的橙皮刨去切絲(注意不要刨到白色部份) , 將3個橙切好後榨成橙汁 , 3個橙的橙汁約1杯份量 , 榨出橙汁的橙肉留起









薏米煲1小時後加入橙皮絲拌勻熄火焗20分鐘 , 將全部橙皮絲及大部份薏米盛起去掉 , 加入橙汁及冰糖拌勻 , 轉用中火不停拌勻煮至冰糖完全溶掉 , 最後加入橙肉拌勻熄火焗10分鐘即可 

















材料 
生薏米1/2斤 , 橙3個 , 冰糖 , 水3500ml
 


做法
1. 生薏米用水沖一沖洗及瀝乾 , 將生薏米放入煲內 , 加3500ml水拌勻 

2. 先用中火煮滾 , 滾段除去面上泡沫後拌一拌勻

3. 再煲滾後蓋上蓋轉慢火煲1小時(期間小心滾瀉)

4. 將1個橙的橙皮刨去切絲(注意不要刨到白色部份) 

5. 將3個橙切好後榨成橙汁 , 3個橙的橙汁約1杯份量 , 榨出橙汁的橙肉留起 

6. 薏米煲1小時後加入橙皮絲拌勻熄火焗20分鐘 

7. 將全部橙皮絲及大部份薏米盛起去掉 , 加入橙汁及冰糖拌勻

8. 轉用中火不停拌勻煮至冰糖完全溶掉 , 最後加入橙肉拌勻熄火焗10分鐘即可 




香香甜甜的橙味 , 仲有薏米同橙肉食 , 而且呢款薏米水可熱飲或待涼後放入雪櫃冷藏都得 , 絕對值得推介俾大家呢 ^^





16 則留言: