2018年1月20日 星期六

香菇豆苗豬肉湯餃




前幾日天蔭蔭 , 還下著雨 , 今日又見番太陽怕怕微服出巡 , 天氣變得唔錯 , 不過好似話下星期又會變得寒冷 , 真糟糕呢 , 大家又要為自己身體做足保暖功夫 , 始終不夠一個月又到新年 , 病左就唔係咁好喇 ......



以往天氣寒冷的時候 , 袁太必然會攬住豬豬 , 因為豬豬體溫好鬼暖 , 不過豬豬原來不經不覺移民左去彩虹橋已經3年了 , 只此天氣寒冷的日子 , 袁太每晚食飽飽都會即刻跳上床 , 開暖風機取暖 , 好似前排天氣凍得要命的時候 , 必然會想食熱辣辣的食物 , 除左打邊爐或羊腩煲外 , 食碗辣辣的湯餃絕對係唔錯的選擇 , 想食餃當然又係自家製出品 



係街市見有豆苗賣 ,買左1/2斤回家包餃




今次的餃子除用豆苗內 , 依舊配豬肉 , 不過今次懶喇 , 唔買梅頭肉剁 , 簡單買左豬肉碎算呢 , 再加入香味濃郁的冬菇 , 呢款餡料我喜歡 , 不過做湯餃 , 對於袁太黎講 , 最難莫過於係湯底方面 , 又唔想用雞湯 , 又唔想專登煲個湯黎配餃 , 就簡單用蔥粒 , 豉油 , 冬菇水同水煮成湯底 , 簡單得來味道都唔差呢 ^^







材料 : 半肥豬肉碎 , 豆苗 , 菜心(後來冇用) , 冬菇(預先浸軟) , 餃子皮 , 胡椒粉 , 鹽 , 糖 , 生粉 , 蔥




半肥瘦豬肉放入大碗內 , 加入少許水拌勻靜待數分鐘 , 期間將豆苗加少許鹽及水浸過面靜待10分鐘 , 豬肉碎加入醃料拌勻先靜待10分鐘















豆苗浸10分鐘後用水清洗乾淨 , 放入煲內加少許鹽及水 , 用中火煮至軟身 , 盛起切碎及渣乾水份 , 冬菇切粒(浸冬菇水留用) , 蔥白及青蔥同切粒 , 將豆苗及冬菇粒放入豬肉碎內拌勻 , 用手撻十餘下 , 蓋上保鮮紙入雪櫃靜待1小時




















煲內放入蔥白粒及生抽爆香 , 加入浸冬菇水及100ml水拌勻 , 用中火煮滾後蓋上蓋轉火煮30分鐘成湯底 , 將湯底的蔥粒隔去備用













器皿內放上保鮮紙 , 將餡料放上餃子皮中間位置 , 再對摺封口 , 取適量餃子放入煲內 , 加水蓋過面 , 用慢火慢慢煮至滾後 , 再加入適量水 , 再用慢火煮至滾 , 直至餃熟透為止 , 湯碗內放入青蔥粒 , 少許麻油及胡椒粉 , 再放上已煮熟的餃 , 將湯底倒回煲內用中火煮滾 , 淋在湯碗內即可


























材料 
半肥豬肉碎$20 , 豆苗1/2斤 , 菜心(後來冇用) , 冬菇5隻(預先浸軟) , 餃子皮 , 胡椒粉 , 鹽 , 糖 , 生粉 , 蔥

醃料 
生抽 , 鹽 , 糖 , 生粉 , 麻油 , 胡椒粉



做法
1. 半肥瘦豬肉放入大碗內 , 加入少許水拌勻靜待數分鐘 

2. 期間將豆苗加少許鹽及水浸過面靜待10分鐘 

3. 豬肉碎加入醃料拌勻先靜待10分鐘 

4. 豆苗浸10分鐘後用水清洗乾淨 , 放入煲內加少許鹽及水 , 用中火煮至軟身 

5. 盛起切碎及渣乾水份 

6. 冬菇切粒(浸冬菇水留用) , 蔥白及青蔥同切粒 

7. 將豆苗及冬菇粒放入豬肉碎內拌勻 , 用手撻十餘下 , 蓋上保鮮紙入雪櫃靜待1小時 

8. 煲內放入蔥白粒及生抽爆香 , 加入浸冬菇水及100ml水拌勻 

9. 用中火煮滾後蓋上蓋轉火煮30分鐘成湯底 , 將湯底的蔥粒隔去備用

10. 器皿內放上保鮮紙 , 將餡料放上餃子皮中間位置 , 再對摺封口 

11. 取適量餃子放入煲內 , 加水蓋過面 , 用慢火慢慢煮至滾 

12. 再加入適量水 , 再用慢火煮至滾 , 直至餃熟透為止 

13. 湯碗內放入青蔥粒 , 少許麻油及胡椒粉 , 再放上已煮熟的餃 

14. 將湯底倒回煲內用中火煮滾 , 淋在湯碗內即可 




雖然湯底只用上簡單的材料去煮 , 但配上用豆苗做餡料的餃子非常之夾呢 ^^






22 則留言:

  1. 睇完你個食譜好想即刻食餃子!

    回覆刪除
  2. 回覆
    1. 所以一有豆苗賣,我必會包餃呢

      刪除
  3. 你嗰邊街市算好平~我邊冇咁平呢~!

    回覆刪除
  4. 回覆
    1. 係呀,過年的時間,價錢急升

      刪除
  5. 用豆苗做餡一定好好味呢

    回覆刪除
  6. 一碗多餃走蔥唔該

    回覆刪除
  7. 我鐘意食豆苗,呢款餃我啱食

    回覆刪除
  8. 天氣凍,有碗熱辣辣湯餃好滿足

    回覆刪除
  9. 湯餃,煎餃,蒸餃我每款都鐘意

    回覆刪除