2018年1月9日 星期二

蠔仔肉碎煎蛋角




前幾天又心思思想整蛋角 , 以往整蛋角我離不開一定用涼瓜同魚肉做餡料 , 之前亦都上傳過涼瓜魚肉蛋角的食譜 , 不過今次就想轉用肉碎 , 講就講得好聽想用肉碎 , 其實只係發現冰箱仲有一包仔的肉碎 , 再唔用埋佢又唔知會放幾耐呢 , 除左用肉碎外 , 袁太仲加左一樣袁生最愛的材料 ......



~蠔~ 咩蠔的種類袁生都鐘意 , 即開生蠔 , 廣島蠔 , 蠔豉 , 蠔仔他統統都鐘意食 , 只要有用蠔做的晚餐 , 佢真係多多都食得落 , 只不過我就麻麻地蠔 (除即開生蠔外) , 咩蠔豉蠔仔我統統唔鐘意食 , 其實我係好驚驚個種味道 , 因為曾經係街市買過蠔仔 , 或大蠔的我 , 回家烹調後進食時簡直腥到我想死 , 起初以為只係我食唔慣蠔的味道先覺得腥 , 但連袁生都吞唔落口就知道個種味道係好咁恐怖 , 從此就不敢再去街市買



不過自從係超市買過蠔仔之後 , 感覺味道唔錯 , 唔太難食 , 而且絕對唔腥 , 味道接受得到 , 用來配肉碎一起用來做蛋角餡料仲好夾



煎蛋角其實真係要好有心機 , 唔可以一味只想快快完成 , 要企定定逐一逐一煎 , 煎至兩面金金黃黃靚靚仔仔就可以 , 袁太用左五隻雞蛋都煎左成18件蛋角 , 袁太好似食左唔夠八件 , 其餘既落晒袁生個肥肚腩裡面呢 ^^
  

 
材料 : 蠔仔 , 豬肉碎 , 雞蛋 , 蔥 , 鹽 , 糖 , 生粉 , 魚露 , 胡椒粉




豬肉碎放入大碗內加入醃料拌勻靜待30分鐘 , 蠔仔放入隔篩內 , 加入生粉用水沖一沖洗 , 再加入生粉用水沖洗第二次至乾淨 , 瀝乾水份 , 將蠔仔放入碗內加熱水灼3分鐘至熟透 , 瀝乾水份備用 , 蔥切粒及切幼絲


















燒紅鑊 , 放入肉碎用中火拌炒至稍為轉色 , 加入蔥粒拌勻炒至肉碎熟透後盛起 










雞蛋放入大碗內加入調味料拌勻成蛋液 , 再加入豬肉碎及蠔仔輕輕拌勻靜待10分鐘 , 燒紅鑊 , 將適量的蛋液放入鑊中煎至半凝固 , 再用鑊鏟將蛋液對摺成蛋角型 , 慢慢煎至兩面金黃色即可






















材料
蠔仔1/2斤 , 豬肉碎$10 , 雞蛋5隻 , 蔥 , 鹽 , 糖 , 生粉 , 魚露 , 胡椒粉

醃料
鹽 , 糖 , 生抽 , 麻油 , 生粉 

調味料
鹽 , 魚露 , 胡椒粉 , 糖 , 生粉



做法
1. 豬肉碎放入大碗內加入醃料拌勻靜待30分鐘 

2. 蠔仔放入隔篩內 , 加入生粉用水沖一沖洗 , 再加入生粉用水沖洗第二次至乾淨 

3. 瀝乾水份 

4. 將蠔仔放入碗內加熱水灼3分鐘至熟透 , 瀝乾水份備用 

5. 蔥切粒及切幼絲 

6. 燒紅鑊 , 放入肉碎用中火拌炒至稍為轉色 , 加入蔥粒拌勻炒至肉碎熟透後盛起 

7. 雞蛋放入大碗內加入調味料拌勻成蛋液 

8. 再加入豬肉碎及蠔仔輕輕拌勻靜待10分鐘 

9. 燒紅鑊 , 將適量的蛋液放入鑊中煎至半凝固 , 再用鑊鏟將蛋液對摺成蛋角型 

10. 慢慢煎至兩面金黃色即可




金金黃黃的蠔仔肉碎煎蛋角 , 蠔仔肥嘟嘟 , 無論材料同做法都同樣簡單呢 ^^





20 則留言:

  1. 袁太每次煎蛋都好靚,好金黃呢

    回覆刪除
  2. 要一份多蠔仔的煎蛋角外賣

    回覆刪除
  3. 好靚仔, 連唔愛煎蛋角既肥人都想食番件!

    回覆刪除
  4. 金金黃黃的煎蛋角,好想食呀

    回覆刪除