2018年1月19日 星期五

粟米蘑菇火腿貝殼粉




上次煲完粟米羹之後 , 又想encore粟米 , 見廚房仲有粟米蓉 , 不過今次唔煮湯 , 而係配粉食 , 袁太最喜歡的粉類 , 除烏冬 , 公仔麵外 , 最愛就係貝殼粉 ......



大家有睇開袁太廚房的朋友仔們 , 都知我一定唔會就咁粟米蓉配貝殼粉喇 , 一定要加多多材料一齊煮先得架 , 今次就用最簡單 , 最容易配搭的食材做配料 , 選擇左用煙肉 , 白蘑菇 , 蝦仁同火腿配粟米蓉黎煮 , 感覺好西式呢 , 食呢類粉一定要多多汁先好味 , 本身只喜歡意粉 , 米粉 , 伊麵 , 唔鐘意食貝殼粉的袁生都話好味道 , 食的份量仲多過我 , 不過我知其實他只係喜愛個汁姐



煮粟米蓉的時候再加入新鮮粟米粒同煮 , 真係甜上加甜 , 粟米粒又夠爽口 , 所以呢個貝殼粉我會俾滿分呢 ^^



材料 : 貝殼粉 , 煙肉 , 火腿 , 白蘑菇 , 急凍蝦仁 , 粟米 , 粟米蓉 , 雞蛋 , 胡椒粉 , 鹽 , 生粉




粟米放入電蒸鍋內 , 蓋上蓋蒸15分鐘 , 期間將蝦仁用生粉沖洗乾淨及瀝乾水份 , 加少許鹽及胡椒粉略醃 , 煙肉切細片 , 白蘑菇切片 , 火腿切細片 , 粟米蒸好後起出粟米粒 , 粟米芯留起 
















 
將煙肉放入鑊中先爆香 , 加入白蘑菇粒 , 火腿及少許鹽拌勻炒數分鐘至白蘑菇微軟 , 先盛起備用










貝殼粉放入煲內 , 加水用中火煮至軟身 , 盛起瀝乾水份 , 雞蛋打出拌勻成蛋液 , 粟米芯放入煲內 , 加水用慢火煮15分鐘至出味 , 盛起粟米芯去掉 , 加入粟米蓉 , 粟米粒拌勻用中火煮滾 , 加入之前盛起的煙肉火腿蘑菇及蝦仁 , 用中火拌勻煮至蝦仁轉色 , 熄火加入蛋液拌勻 , 將粟米汁淋入貝殼粉內即可































材料
貝殼粉 , 煙肉3片 , 火腿2片 , 白蘑菇 , 急凍蝦仁1/2磅 , 粟米1條 , 粟米蓉2盒 , 雞蛋2隻 , 胡椒粉 , 鹽 , 生粉



做法
1. 粟米放入電蒸鍋內 , 蓋上蓋蒸15分鐘 

2. 期間將蝦仁用生粉沖洗乾淨及瀝乾水份 , 加少許鹽及胡椒粉略醃 

3. 煙肉切細片 , 白蘑菇切片 , 火腿切細片 , 粟米蒸好後起出粟米粒 , 粟米芯留起  

4. 將煙肉放入鑊中先爆香 , 加入白蘑菇粒 , 火腿及少許鹽拌勻炒數分鐘至白蘑菇微軟 

5. 先盛起備用

6. 貝殼粉放入煲內 , 加水用中火煮至軟身 , 盛起瀝乾水份 

7. 雞蛋打出拌勻成蛋液

8. 粟米芯放入煲內 , 加水用慢火煮15分鐘至出味 

9. 盛起粟米芯去掉 , 加入粟米蓉 , 粟米粒拌勻用中火煮滾 

10. 加入之前盛起的煙肉火腿蘑菇及蝦仁 , 用中火拌勻煮至蝦仁轉色 

11. 熄火加入蛋液拌勻 , 將粟米汁淋入貝殼粉內即可




煮左一大碗貝殼粉 , 如果同時有埋pizza & 蘑菇湯做成一個餐 , 就更加正 , 更加美味同滿足呢 ^^





20 則留言: