2018年2月23日 星期五

[2018賀年糕點] 粒粒椰汁奶皇年糕




對我來說 , 初一 , 二 , 三過左 , 就代表新年已過 , 不過袁太依然繼續整糕 , 因之前整俾朋友 , 朋友話好味 , 話唔夠食喎 , 所以繼續密密整 , 密密蒸 , 整黎送禮或自己係屋企食都得 , 而且蒸糕唔一定要過年整 , 想幾時食就幾時整都冇問題 , 只要買到齊材料就可以 ......



呢款年糕我曾經係某間餅店見過 , 但未曾買過黎食 , 前幾日無意中上網見到奶黃年糕的食譜 , 又見材料屋企有齊 , 以我的性格無理由唔整 , 不過原食譜係用白糖 , 蒸出黎的年糕會係淺黃色 , 不過袁太用黃糖整 , 所以蒸出黎的顏色比較深 , 賣相望落同普遍年糕冇咩分別 , 不過食落口就會覺得有所不同 , 除左味道多左奶黃同鹹蛋黃的香味外 , 而且非常煙UN , 同埋自己整可以冇咁甜 , 出面街既有時真係甜到好得人驚 , 食完都唔知會唔會有糖尿病

 

蒸完的奶皇年糕放入雪櫃一陣 , 取出切粒或切片入鑊煎就食得 , 我就比較喜愛切粒 , 煎完外面有少少脆 , 內裡的年糕就煙煙un un , 味道真係唔錯架 , 大家有時間都可以試做 , 妳們一定會喜歡呢 ^^

 

材料 : 糯米粉 , 粘米粉 , 吉士粉 , 黃糖 , 椰漿 , 鹹蛋 , 鹽 , 水 , 隔篩 , 糕盆 , 掃 , 叉



 
鹹蛋洗淨 , 放入電蒸鍋內蓋上蓋蒸25分鐘 , 期間將黃糖放入煲內 , 逐一加入鹽 , 水 , 椰漿拌勻 , 用慢火慢慢拌勻煮至黃糖完全溶掉 , 熄火盛起待涼10分鐘














糯米粉及粘米粉用隔篩篩入大碗內 , 加入吉士粉拌勻 , 將椰漿糖水加入粉內拌勻 , 用隔篩隔兩次去除多餘粉粒 , 等麵糊變得細滑 , 鹹蛋蒸好後盛起用水沖洗至涼 , 去穀後將鹹蛋黃 , 鹹蛋白分開 , 用叉將鹹蛋黃壓成蓉 , 加入麵糊內拌勻























糕盆掃上少許油 , 將麵湖倒入約九成滿 , 放入電蒸鍋內 , 蓋上蓋蒸1小時(可用膠蓋或保鮮紙蓋住年糕面預防倒汗水) , 其餘的年糕同樣放入電蒸鍋內蓋上蓋蒸1小時 , 將待涼的年糕放入雪櫃下層靜待30分鐘 , 30分鐘後將年糕切粒或切片 , 放入鑊中煎至金黃即可























材料
糯米粉300g , 粘米粉30g , 吉士粉3湯匙 , 黃糖170g , 椰漿260g , 鹹蛋2隻 , 鹽1茶匙 , 水140g , 隔篩 , 糕盆 , 掃 , 叉



做法
1. 鹹蛋洗淨 , 放入電蒸鍋內蓋上蓋蒸25分鐘 

2. 期間將黃糖放入煲內 , 逐一加入鹽 , 水 , 椰漿拌勻 

3. 用慢火慢慢拌勻煮至黃糖完全溶掉 , 熄火盛起待涼10分鐘

4. 糯米粉及粘米粉用隔篩篩入大碗內 , 加入吉士粉拌勻 

5. 將椰漿糖水加入粉內拌勻 , 用隔篩隔兩次去除多餘粉粒 , 等麵糊變得細滑 

6. 鹹蛋蒸好後盛起用水沖洗至涼 

7. 去穀後將鹹蛋黃 , 鹹蛋白分開 , 用叉將鹹蛋黃壓成蓉 , 加入麵糊內拌勻 

8. 糕盆掃上少許油 , 將麵湖倒入約九成滿 

9. 放入電蒸鍋內 , 蓋上蓋蒸1小時(可用膠蓋或保鮮紙蓋住年糕面預防倒汗水) 

10. 其餘的年糕同樣放入電蒸鍋內蓋上蓋蒸1小時 

11. 將待涼的年糕放入雪櫃下層靜待30分鐘 

12. 30分鐘後將年糕切粒或切片 , 放入鑊中煎至金黃即可 




用上黃糖去整 , 雖然賣相同普通年糕冇咩分別 , 但味道就多左奶黃同鹹蛋黃的香味 , 剩下的鹹蛋白留待夜晚用黎拌粥食唔好浪費呢 ^^





16 則留言: