2018年2月2日 星期五

陳皮鴨腿湯飯




我真想大叫一聲"救命" , 皆因天氣簡直凍到爆 , 出一出門都成身震 , 凍到個人都傻下傻下 , 凍到個人都冇晒心機諗晚餐應該煮咩 , 以往問袁生佢例牌冇意見 , 不過今次出乎意料之外 , 佢居然要求食湯飯 , 啱晒 , 剛剛雪櫃有冷飯 , 唔想用黎炒飯 , 用來做湯飯都唔錯 ......



而且袁生今次要求大家都最愛的鴨腿湯飯 , 喂 ... 喂 ... 喂 ... 難道你唔記得我而家唔食得鴨咩 , 唉 ... 不過冇所謂喇 , 難得袁生開到口 , 我冇理由唔整呢 , 不過都要去街市碰碰運氣 , 睇下有冇鴨腿賣 , 以往我食得鴨的時候就唔見有 , 好喇 , 我而家唔食得鴨就偏偏有得賣 , 大家話係咪吹脹 , 街市買6蚊/隻 , 我就買左兩隻




做鴨腿湯飯離不開都係用冬菇 , 陳皮 , 芫茜同冬瓜呢類材料 , 而且成個製作過程都要用上好幾粒鐘處理 , 所以預先浸好冬菇 , 晨早去街市買埋其餘材料 , 回家就快快手煲定個鴨腿湯



其實煲個鴨腿湯點解要用幾粒鐘時間 ??? 因為首先要醃鴨腿 , 醃鴨腿都要成粒鐘 , 醃完鴨腿又要炸鴨腿 , 再放入煲逐樣逐樣煲 , 又要煲兩粒鐘 , 所以呢個湯飯真係由朝整到晚 , 雖然真係要用上好多時間 , 但味道絕對好味過餐廳多多數 , 一路煲緊個鴨腿湯 , 已經聞到好香的味道 , 當然喇 , 因為用上兩隻原隻鴨腿去煮 , 可惜我又唔飲得 , 不過大家唔好以為袁生一人食晒兩隻喎 , 只係如只買一隻鴨腿 , 煲出黎的湯一定唔會咁濃郁 , 所以橫掂都煮 , 就煮埋媽咪個份呢 ^^



材料 : 急凍鴨腿 , 冬瓜 , 蔥 , 芫茜 , 冬菇(預先浸軟) , 陳皮(預先浸軟) , 薑 , 上湯 , 酒 , 胡椒粉 , 冷飯 / 新鮮飯




鴨腿洗淨抹乾水份放入器皿內 , 加入酒及老抽拌勻 , 蓋上保鮮紙靜待1小時 , 期間將冬菇切半 , 浸菇水留用 , 薑去皮切條 , 蔥切段及切粒 , 芫茜切段 , 冬瓜去皮去籽切件 , 冬瓜用水沖一沖洗及瀝乾 , 陳皮刮去囊後撕成細片備用
















煲內加入油燒滾 , 放入鴨腿用中火炸約2分鐘至金黃色 , 煲內放入鴨腿 , 蔥段 , 薑絲及陳皮 , 再加入冬菇水 , 上湯及適量水 , 用中火煲滾 , 拌一拌勻材料後蓋上蓋轉慢火煲45分鐘 

















45分鐘後再加入冬菇 , 芫茜段拌勻 , 再蓋上蓋繼續用慢火煲1小時 , 分別將鴨腿盛起 , 冬菇及陳皮放入大碗內 , 將湯用隔篩隔去其餘材料 , 盛起面上的油份去掉 , 煲內再放入鴨腿 , 冬瓜及之前隔去材料的湯拌勻 , 蓋上蓋用中火再煲15分鐘 , 期間將冷飯放入電蒸鍋內蓋上蓋蒸20分鐘 , 湯煲15分鐘後即成冬瓜鴨腿湯 , 食時可在湯內灑上蔥粒 , 配上白飯即可






























材料 
急凍鴨腿2隻 , 冬瓜1斤 , 蔥 , 芫茜 , 冬菇6隻(預先浸軟) , 陳皮3塊(預先浸軟) , 薑 , 上湯300ml , 酒 , 胡椒粉 , 冷飯 / 新鮮飯1碗



做法
1. 鴨腿洗淨抹乾水份放入器皿內 , 加入酒及老抽拌勻 , 蓋上保鮮紙靜待1小時 

2. 期間將冬菇切半 , 浸菇水留用 , 薑去皮切條 

3. 蔥切段及切粒 , 芫茜切段 , 冬瓜去皮去籽切件 , 冬瓜用水沖一沖洗及瀝乾 

4. 陳皮刮去囊後撕成細片備用

5. 煲內加入油燒滾 , 放入鴨腿用中火炸約2分鐘至金黃色 

6. 煲內放入鴨腿 , 蔥段 , 薑絲及陳皮 , 再加入冬菇水 , 上湯及適量水 

7. 用中火煲滾 , 拌一拌勻材料後蓋上蓋轉慢火煲45分鐘 

8. 45分鐘後再加入冬菇 , 芫茜段拌勻 , 再蓋上蓋繼續用慢火煲1小時 

9. 分別將鴨腿盛起 , 冬菇及陳皮放入大碗內 

10. 將湯用隔篩隔去其餘材料 , 盛起面上的油份去掉 

11. 煲內再放入鴨腿 , 冬瓜及之前隔去材料的湯拌勻 , 蓋上蓋用中火再煲15分鐘 

12. 期間將冷飯放入電蒸鍋內蓋上蓋蒸20分鐘 

13. 湯煲15分鐘後即成冬瓜鴨腿湯 , 食時可在湯內灑上蔥粒 , 配上白飯即可

  


食時加入白飯就可以變成美味的鴨腿湯飯 , 有原隻鴨腿 , 又有熱湯飲 , 所以無論夏天或寒冷的天氣 , 都係食湯飯的最佳選擇呢 ^^







21 則留言:

  1. 一碗外賣自取

    回覆刪除
  2. 嘩,你真係好叻,自己滷鴨比。我老DAD最鍾意食。

    回覆刪除
  3. 功夫菜呢呢個真係!
    肥人排隊等食得唔得呀?

    回覆刪除
  4. 預埋我個份得嗎

    回覆刪除
  5. 原隻鴨腿啖啖肉

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......