2018年2月6日 星期二

大芥菜蕃薯燒豬骨湯




突然間好想食蕃薯 , 蕃薯而家係街市好容易買到 , 不過都離不開黃心或紫心 , 今次買蕃薯的目的係用來煲湯 , 用蕃薯煲湯袁太試過好幾次 , 配上芥菜同煲好鬼好味 , 本應要買黃心蕃薯煲湯 , 去街市買左3個 , 回來去皮先發覺原來係橙心 , 橙心蕃薯我呢頭唔係經常見 , 買到都算好彩吧 , 不過橙心都可以用來煲湯 , 味道一定甜甜 ......



袁太曾經上網search過 , 芥菜蕃薯湯好似話可以防感冒 , 不過係咪可以防感冒就見仁見智 , 材料只需了大芥菜 , 蕃薯 , 薑片同豬骨 , 大家亦可以唔落骨 , 淨用大芥菜 , 蕃薯同薑片三樣材料煲都得 , 不過落左骨感覺香好多



但今次唔用豬骨 , 因街市豬骨唔靚仔 , 但反而見到燒豬骨好似唔錯 , 就買左一份燒豬骨代替豬骨煲 , 仲記得每次同袁生講用蕃薯煲湯 , 每次都會嚇親佢 , 佢只會不停問我 ~煲湯 ??? 煲糖水咋 ??? , 唔係呀 , 用來煲湯 , 起初佢都有懷疑個味道 , 因驚會太甜 , 事關佢唔太鐘意甜湯 , 雖然用蕃薯煲湯係會甜甜地 , 但大芥菜的甘苦味 , 另外燒豬骨的濃香味 , 幾樣材料配合煲出來味道好夾 , 可以中和蕃薯的甜味 , 袁生都覺得好味道 , 飲左兩大碗咁多呢 ^^




材料 : 大芥菜 , 蕃薯 , 燒豬骨 , 薑 , 鹽




燒豬骨放入煲內 , 加水用中火煮至滾 , 盛起用水沖一沖洗油份及碎骨後瀝乾 , 蕃薯去皮切件 , 薑切絲 , 蕃薯用水沖一沖洗及瀝乾













大芥菜切段 , 加少許鹽及水浸過面靜待10分鐘 , 用水沖洗乾淨及瀝乾水份備用










燒豬骨放入煲內 , 加入薑絲 , 加入適量水拌勻 , 先用中火煮滾 , 盛起面上泡泡去掉 , 加入大芥菜拌勻用中火煲30分鐘 , 湯煲30分鐘後加入蕃薯拌勻再煲滾 , 蓋上蓋轉慢火煲1 1/2小時 





















最後加少許鹽調味拌勻 , 轉中火再煲滾後熄火焗30分鐘即可











材料
大芥菜1斤 , 蕃薯4條 , 燒豬骨 , 薑 , 鹽



做法
1. 燒豬骨放入煲內 , 加水用中火煮至滾 , 盛起用水沖一沖洗油份及碎骨後瀝乾 

2. 蕃薯去皮切件 , 薑切絲 , 蕃薯用水沖一沖洗及瀝乾

3. 大芥菜切段 , 加少許鹽及水浸過面靜待10分鐘 

4. 用水沖洗乾淨及瀝乾水份備用

5. 燒豬骨放入煲內 , 加入薑絲 , 加入適量水拌勻 

6. 先用中火煮滾 , 盛起面上泡泡去掉 

7. 加入大芥菜拌勻用中火煲30分鐘 , 湯煲30分鐘後加入蕃薯拌勻再煲滾 

8. 蓋上蓋轉慢火煲1 1/2小時 

9. 最後加少許鹽調味拌勻 , 轉中火再煲滾後熄火焗30分鐘即可



功效
~除可治感冒外 , 還有健胃生津 , 通暢胃腸 , 強身健體~

~大便不暢及食慾不振人士都適合~




大芥菜同蕃薯煲到半溶狀態 , 淨飲湯食湯渣都好飽肚呢 ^^






20 則留言:

  1. 冬天飲碗熱湯好暖呢

    回覆刪除
  2. 用蕃薯煲湯好似唔錯呢

    回覆刪除
  3. 我都喜歡食蕃薯, 不過大細老闆麻麻地like, 我都好少整.

    回覆刪除
    回覆
    1. 哦…其實袁生都唔太鐘意蕃薯

      刪除
  4. 我未飲過用蕃薯煲的湯水

    回覆刪除
  5. 用燒豬骨煲,一定好濃味呢

    回覆刪除
  6. 有興趣試用蕃薯煲的湯水

    回覆刪除