2018年3月7日 星期三

蠔仔肉碎扒雞蛋豆腐




繼上次袁生話想食蠔餅之後 , 呢幾日又話想encore食蠔仔 , 除enocre蠔仔外 , 又提議想食雞蛋豆腐喎 , 雖然袁生口講只係提議 , 不過袁太都知佢一提議 , 就係代表想食 , 所以袁太係無選擇權的情況下唯有Say Yes ......



不過今次整完雞蛋豆腐後又應該點煮好呢 , 上次就簡簡單單夾魚肉生菜做成三文治 , 再沾麵包糠拎去炸 , 其實我都想再encore呢個炸雞蛋豆腐 , 奈何最近天氣凍凍地 , 最近已經食左好多炸物 , 辣的食物同火鍋 , 現在想稍為清一清下熱 , 如果唔係又會生痱滋



既然係袁生話想食雞蛋豆腐同蠔仔 , 咁就向蠔仔埋手 , 不過要買靚蠔仔都唔係咁易 , 去超市碰碰運氣吧 , 今次蠔仔雖然冇以往咁大隻咁肥美 , 但望落都唔太差 , 何況用來炒肉碎都唔需要咁大隻 , 袁生就至愛用蠔仔炒肉碎 , 咁就簡單得多 , 蒸好雞蛋豆腐後切件放上碟 , 再炒好個蠔仔肉碎淋上豆腐面 , 一定好好味道呢 ^^
  

 
材料 : 蠔仔 , 豬肉碎 , 雞蛋 , 豆漿 , 鹽 , 薑 , 蔥 , 糖 , 生粉 , 胡椒粉 , 保鮮紙




雞蛋打入大碗內 , 加少許鹽及無糖豆漿拌勻 , 器皿放上保鮮紙 , 將豆漿蛋液用篩網隔去多餘泡沫及雜質 , 放入電蒸鍋內蓋上蓋先蒸2分鐘 , 再將蓋留縫隙 , 再蒸25分鐘


















蒸雞蛋豆腐期間 , 蠔仔加入生粉拌勻 , 用水沖一沖洗 , 再加入生粉沖洗多次 , 倒入熱水灼熟蠔仔 , 瀝乾水份備用 , 蔥切段及絲 , 薑去皮幼絲 , 豬肉碎加入醃料拌勻靜待30分鐘















 
雞蛋豆腐蒸好後待用 , 燒紅鑊 , 先爆香蔥段及薑絲 , 加入豬肉碎拌炒數分鐘至稍為轉色 , 盛起蔥段去掉 , 加入少許蠔油 , 雞粉及水調味 , 再加入蠔仔輕輕拌勻炒至豬肉熟透 , 雞蛋豆腐切件放上碟 , 再淋上蠔仔肉碎 , 再放上蔥絲即可






















材料
蠔仔1/2斤 , 豬肉碎$15 , 雞蛋5隻 , 豆漿500ml , 鹽 , 薑 , 蔥 , 糖 , 生粉 , 胡椒粉 , 保鮮紙

醃料
鹽 , 糖 , 生抽 , 麻油 , 生粉 



做法
1. 雞蛋打入大碗內 , 加少許鹽及無糖豆漿拌勻 

2. 器皿放上保鮮紙 , 將豆漿蛋液用篩網隔去多餘泡沫及雜質 

3. 放入電蒸鍋內蓋上蓋先蒸2分鐘 , 再將蓋留縫隙 , 再蒸25分鐘

4. 蒸雞蛋豆腐期間 , 蠔仔加入生粉拌勻 , 用水沖一沖洗 

5. 再加入生粉沖洗多次 , 倒入熱水灼熟蠔仔 , 瀝乾水份備用

6. 蔥切段及絲 , 薑去皮幼絲 

7. 豬肉碎加入醃料拌勻靜待30分鐘 

8. 雞蛋豆腐蒸好後待用 

9. 燒紅鑊 , 先爆香蔥段及薑絲 , 加入豬肉碎拌炒數分鐘至稍為轉色 

10. 盛起蔥段去掉 

11. 加入少許蠔油 , 雞粉及水調味 , 再加入蠔仔輕輕拌勻炒至豬肉熟透 

12. 雞蛋豆腐切件放上碟 , 再淋上蠔仔肉碎 , 再放上蔥絲即可 




蠔仔 + 肉碎 , 再配上自家製滑滑的雞蛋豆腐 , 又係一道好拌飯系列呢 ^^






18 則留言: