2018年3月28日 星期三

鹽焗雞翼(焗爐版)




繼續剩餘物資料理 , 上次就用左腐皮同豬肉碎整炸響鈴 , 今次剩餘物資的主角係雞翼 , 又要盡快消滅 , 可惜上次覆診 , 醫生繼續叫袁太暫時唔好食雞 , 冇得食雞對我黎講真係好大鑊 , 大家都知袁太平時都會煮下雞 , 一想起白切雞 , 炸雞翼 , 煎雞扒 , 滷水雞翼/雞脾我就流晒口水 , 所以今次消滅雞翼的任務就留番俾袁生 , 不過當然係我負責煮 , 佢負責食 ......



唔知大家有冇印象 , 袁生係唔多鐘意食雞翼 , 或者轉一轉個講法 , 佢又唔係完全唔食雞翼 , 只係用某幾種做法佢先會食 , 好似用豉油整 , 用蝦醬炸咁喇 , 另外仲一樣做法佢都偏愛 , 就係用鹽焗的方法 , 用鹽焗整雞其實算簡單 , 而且今次用焗爐整 , 味道都好好 , 鹹鹹香香 , 雖然唔食得雞 , 但聞到香噴噴的鹽焗香味 , 真係好難抗拒 , 既然唔食得 , 咁唯有近距離聞下個香味 , 我都好滿足



今次一整就清晒冰箱個12隻雞翼 , 袁生今次話味道好好 , 食得晒 , 仲叫我下次如果再整鹽焗的話 , 記得加雞蛋喎 , 知道喇 , 收到呢 ^^



材料 : 粗鹽 , 雞中翼 , 酒 , 五香粉 , 鹽焗雞粉 , 沙薑粉 , 熟油 , 雞粉 , 麻油 , 焗爐紙 , 錫紙




雞翼用水沖洗乾淨 , 再抹乾水份放入大碗內 , 加入鹽焗雞粉 , 雞粉及醃料拌勻靜待1小時 , 期間焗爐用250C預熱10分鐘













鑊中不需要加油 , 放入粗鹽及五香粉拌勻 , 用慢火慢慢炒至粗鹽發出熱力(大約需時5分鐘) , 牛油紙剪成細塊 , 將雞翼放入焗爐紙內包好 , 再放在另一張焗爐紙內再包一次 














焗盤放上錫紙 , 先舖上一層鹽 , 再放上用焗爐紙包好的雞翼 , 再鋪上餘下的粗鹽蓋上雞翼 , 放入焗爐用250C上下火焗20分鐘後熄火焗10分鐘 , 焗好的雞翼小心去除焗爐紙 , 最後將沙薑粉 , 熟油及麻油拌勻成沙薑汁即可



















材料
粗鹽 , 雞中翼12隻 , 酒 , 五香粉2茶匙 , 鹽焗雞粉1湯匙 , 沙薑粉 , 熟油 , 雞粉 , 麻油 , 焗爐紙 , 錫紙

醃料
生抽 , 酒 , 熟油 , 麻油



做法
1. 雞翼用水沖洗乾淨 , 再抹乾水份放入大碗內 

2. 加入鹽焗雞粉 , 雞粉及醃料拌勻靜待1小時

3. 期間焗爐用250C預熱10分鐘

4. 鑊中不需要加油 , 放入粗鹽及五香粉拌勻 

5. 用慢火慢慢炒至粗鹽發出熱力(大約需時5分鐘) 

6. 牛油紙剪成細塊 , 將雞翼放入焗爐紙內包好 , 再放在另一張焗爐紙內再包一次 

7. 焗盤放上錫紙 

8. 先舖上一層鹽 , 再放上用焗爐紙包好的雞翼 , 再鋪上餘下的粗鹽蓋上雞翼 

9. 放入焗爐用250C上下火焗20分鐘後熄火焗10分鐘 

10. 焗好的雞翼小心去除焗爐紙 

11. 最後將沙薑粉 , 熟油及麻油拌勻成沙薑汁即可 




用焗的方法雖然雞皮唔太脆口 , 但勝在味道Very Good , 而且雞肉嫩滑 , 我都好想咬一口呢 ^^






24 則留言:

  1. 第一, YEAH!

    我老公都係唔係唔愛食雞翼, 又係除左香口食法之外~~~~
    袁太, 肥人想問下你用黎抹雞翼既布係咪普通既布黎? 抹完雞翼係咪就咁搵水洗就得~?謝謝!

    回覆刪除
    回覆
    1. 係呀,係普通抹布黎咋,我係用普通水洗完,再用布抹乾就攞去醃呢

      刪除
    2. 咁呢番普通抹布係咪循環再用呀? 點清潔呀? 係咪就係咁用水洗洗佢就得~? thx u~

      刪除
  2. 我冇焗爐整唔到添

    回覆刪除
  3. 我一個人可以食好多隻雞翼架

    回覆刪除
  4. 唔用雞翼轉雞脾要焗幾耐

    回覆刪除
    回覆
    1. 如果雞脾都要焗大約30分鐘,再焗10分鐘

      刪除