2018年3月27日 星期二

椒鹽炸響鈴




平日買下又買下 , 塞爆晒個雪櫃 , 閒時又來要清清雪櫃大行動 , 看看還有什麼剩餘物資 , 袁太就最愛用剩餘的材料整個下午茶或宵夜俾袁生 ......



今次雪櫃餘貨有腐皮 , 豬肉碎 , 薯仔 , 雞翼 , 菜心等等 , 見有呢堆材料 , 今次就決定用腐皮同豬肉碎 , 簡簡單單整個炸響鈴 , 睇開袁太廚房的朋友仔們都知袁生袁太係炸物怪 , 超喜愛食炸物 , 我知炸響鈴係杭州小食 , 炸到脆卜卜的響鈴 , 無論拌飯 , 當小食 , 或送酒都一流



而且做法極為簡單 , 先將豬肉碎醃好 , 腐皮剪成適量大小 , 再將腐皮整濕少少 , 放上薄薄一層豬肉碎 , 卷起用麵粉糊封口 , 切段再放入油鑊炸 , 盛起吸取油份再灑上椒鹽 , 咁就攪掂 , 係咪真的好簡單呢 ^^



材料 : 腐皮 , 豬肉碎 , 雞蛋(只用蛋黃) , 椒鹽 , 鹽 , 雞粉 , 酒 , 麻油 , 麵粉




豬肉碎放入大碗內 , 加入雞蛋黃 , 雞粉及醃料拌勻靜待30分鐘 , 腐皮剪去邊位 , 再對摺剪開 , 一塊可剪出四塊腐皮(切去的腐皮邊千其唔好掉呀 , 可以留黎煲糖水呢)













用廚紙沾水弄濕腐皮 , 在腐皮下方放上一層層薄薄的豬肉碎 , 卷起用麵粉糊封口靜待10分鐘後切段 , 放入鑊中加油 , 用中火炸至金黃色 , 盛起吸取過多油份 , 灑上椒鹽即可
















材料
腐皮2塊 , 豬肉碎$15 , 雞蛋1隻(只用蛋黃) , 椒鹽 , 鹽 , 雞粉 , 酒 , 麻油 , 麵粉(加水拌勻成麵糊)

醃料
鹽 , 酒 , 麻油



做法
1. 豬肉碎放入大碗內 , 加入雞蛋黃 , 雞粉及醃料拌勻靜待30分鐘 

2. 腐皮剪去邊位 

3. 再對摺剪開 , 一塊可剪出四塊腐皮(切去的腐皮邊千其唔好掉呀 , 可以留黎煲糖水呢) 

4. 用廚紙沾水弄濕腐皮

5. 在腐皮下方放上一層層薄薄的豬肉碎 

6. 卷起用麵粉糊封口靜待10分鐘後切段 

7. 放入鑊中加油 , 用中火炸至金黃色 , 盛起吸取過多油份 , 灑上椒鹽即可




用雪櫃剩餘物資做出來的脆卜卜炸響鈴 , 成為袁太袁生的宵夜時段小食呢 ^^





16 則留言: