2018年3月5日 星期一

茄子肉燥炒米粉




最近天氣真係好難估計 , 一時就好猛太陽 , 一時又潮濕 , 又或者好似呢幾日咁 , 時陰時太陽 , 周圍都濕濕淋淋 , 呢種天氣真係有點兒難頂 , 今朝落街買餸的時候 , 仲好樣衰地係條街到跣親 , 而家背脊開始有d痛 ...... 



呢種天氣真係有點先唔想煮飯 , 唔想食飯 , 之但係我又唔喜歡食外賣 , 問袁生想食咩 , 又係例牌個樣~肉燥~ , 吓 ... 又肉燥呀 , 我都話唔想食飯囉 , 咁肉燥配米粉得唔得 ??? 袁生OK , 我就即刻飛去街市買材料 , 一般炒米粉我喜愛加少許蔬菜一齊炒 , 都係離不開甘旬呀 , 椰菜咁喇 , 但又恐怕袁生覺得清又投訴 , 剛巧雪櫃發現有3條茄子 , 就快快手來個茄子肉燥



肉燥味道比較濃 , 用來拌米粉 , 拌麵絕對一流 , 不過雖然味道濃 , 但袁生依然要加豆瓣醬一齊食 , 都傻傻地架, 炒出來大大碟 , 但唔駛10分鐘已經K.O晒呢 ^^



材料 : 豬肉碎 , 茄子(幼身) , 椰菜 , 甘旬 , 銀絲炒米粉 , 乾蔥頭 , 蔥 , 胡椒粉 , 五香粉 , 油 , 糖 , 水




豬肉碎放入大碗內 , 加少許油及水拌勻靜待30分鐘 , 乾蔥頭去衣切碎 , 蔥切段及切幼絲 , 椰菜切絲 , 甘旬去皮切絲 , 茄子切粒 , 將茄子放入油鑊中用慢火慢慢炸至半軟 , 盛起備用
















燒紅鑊 , 爆香蔥段及乾蔥頭 , 加入豬肉碎炒至略轉色 , 加入調味料拌勻炒散豬肉碎及轉色 , 夾起蔥段去掉 , 加入3碗水份量拌勻 , 用中火煮滾後轉慢火蓋上蓋煮45分鐘



















45分鐘後將茄子加入肉燥內拌勻 , 蓋上蓋繼續用慢火煮15分鐘後盛起 , 米粉放入水中拌勻煮至散 , 盛起備用















將之前炸茄子的油放入鑊中燒熱 , 放入椰菜絲 , 甘旬絲拌勻炒香及軟身 , 再加入米粉 , 少許鹽及1/2杯水拌勻 , 炒米粉至收乾水份 , 將茄子肉燥回鑊拌勻炒數分鐘即可
















材料
豬肉碎$15 , 茄子(幼身)3條 , 椰菜1個 , 甘旬1條 , 銀絲炒米粉2個 , 乾蔥頭4粒 , 蔥 , 胡椒粉 , 五香粉1茶匙 , 油 , 糖 , 水

調味料
台灣醬油膏 , 生抽 , 老抽 , 糖 , 胡椒粉 , 五香粉



做法
1. 豬肉碎放入大碗內 , 加少許油及水拌勻靜待30分鐘 

2. 乾蔥頭去衣切碎 , 蔥切段及切幼絲 

3. 椰菜切絲 

4. 甘旬去皮切絲 , 茄子切粒 , 將茄子放入油鑊中用慢火慢慢炸至半軟 , 盛起備用

5. 燒紅鑊 , 爆香蔥段及乾蔥頭 , 加入豬肉碎炒至略轉色 

6. 加入調味料拌勻炒散豬肉碎及轉色 , 夾起蔥段去掉 

7. 加入3碗水份量拌勻 , 用中火煮滾後轉慢火蓋上蓋煮45分鐘

8. 45分鐘後將茄子加入肉燥內拌勻 , 蓋上蓋繼續用慢火煮15分鐘後盛起 

9. 米粉放入水中拌勻煮至散 , 盛起備用

10. 將之前炸茄子的油放入鑊中燒熱 , 放入椰菜絲 , 甘旬絲拌勻炒香及軟身 

11. 再加入米粉 , 少許鹽及1/2杯水拌勻 , 炒米粉至收乾水份 

12. 將茄子肉燥回鑊拌勻炒數分鐘即可
 



美味的茄子肉燥炒米粉 , 真係好味到停唔到口呢 ^^





20 則留言:

  1. 足料炒米,在街外一定食唔到

    回覆刪除
  2. 回覆
    1. 台灣醬油膏可以係邊買呀?

      刪除
    2. 我係九龍城台灣食品店買架,不過係日式超市都見過有得賣

      刪除
  3. 未試用哩堆材料炒米粉呢,你好有創意!

    回覆刪除
  4. 呢個炒米一定好味道

    回覆刪除