2018年4月11日 星期三

蒜香魚露豬扒配菠菜肉鬆飯糰




哎呀~~~原來袁太失蹤左差不多兩個星期 , 其實因為呢排生病了 , 雖然病 , 但我冇偷懶架 , 都有煮飯架 , 今日就為大家分享煎豬扒配飯糰 , 豬扒永遠係冰箱的常客 , 久唔久就會買定幾塊做存貨 ......



大家都知 , 煎豬扒好鬼簡單 , 醃佢幾粒鐘用油乾煎就得 , 其實話分享煎豬扒 , 應該話係想分享飯糰就真 , 行街市發現菠菜幾靚靚 , 就買左半斤回家 , 起初是日晚餐就係簡簡單單乾蔥豬扒同炒菠菜 , 點知袁生又話炒菠菜好似唔係咁好 , 所以袁太又要諗辦法轉一轉 , 突然想起菠菜其實可以用黎做飯糰 , 就拿拿臨煮個飯待涼 , 飯糰的餡料除左菠菜外 , 仲加入豬肉鬆 , 而且搓好飯糰後再灑少少麵包糠 , 放入鑊煎至每面微黃 , 令飯糰變得脆口 , 更加美味 , 今次除左菠菜飯糰 , 另外仲包左走菠菜版本 , 即係只有簡單的豬肉鬆飯糰 , 可以留待明日做早點



當袁生見本身炒菠菜變成菠菜飯糰後覺得好有驚喜 , 仲話個飯糰好靚 , 配上煎豬扒好夾 , 將豬扒同飯糰放上同一碟又做成碟頭系列 , 無論味道同賣相都值滿分呢 ^^



材料 : 梅頭豬扒肉 , 白飯 , 菠菜 , 豬肉鬆 , 蒜頭 , 乾蔥頭 , 糖 , 生粉 , 黑白芝麻 , 麵包糠 , 魚露 , 胡椒粉 , 油 , 保鮮紙 , 掃




蒜頭 , 乾蔥頭分別去衣後切粒 , 梅頭豬扒肉用刀背拍鬆兩面後切細件 , 放入大碗內加入蒜粒 , 乾蔥粒及醃料拌勻靜待1小時















菠菜去頭切段  , 加少許鹽及加水浸過面靜待10分鐘後用水沖洗乾淨 , 放入煲內加少許鹽及水 , 用中火煮至軟身 , 盛起放涼20分鐘後切碎 , 再用手渣乾水份















將一半份量的白飯加少許生抽及糖拌勻 , 加入黑白芝麻及菠菜再拌勻 , 放上一張保鮮紙 , 將適量菠菜白飯放上 , 再放上少許豬肉鬆 , 再放上菠菜白飯 , 用保鮮紙輔助搓成球型 , 餘下一半份量的白飯同樣加少許生抽及糖拌勻 , 加入黑白芝麻及豬肉鬆再拌勻 , 枱放上一張保鮮紙 , 將適量肉鬆白飯放上 , 利用保鮮紙輔助搓成球型備用



































飯糰掃上油 , 灑上麵包糠 , 放入鑊中用慢火慢慢煎至每面微黃或金黃色即可 , 豬扒亦放入鑊中用中火煎至兩面金黃即可













材料 
梅頭豬扒肉4塊 , 白飯4碗 , 菠菜1/2斤 , 豬肉鬆 , 蒜頭1個 , 乾蔥頭4粒 , 糖 , 生粉 , 黑白芝麻 , 麵包糠 , 魚露 , 胡椒粉 , 油 , 保鮮紙 , 掃

醃料 
魚露1湯匙 , 生抽1湯匙 , 老抽1湯匙 , 糖2茶匙 , 生粉 , 麻油 , 胡椒粉


做法
1. 蒜頭 , 乾蔥頭分別去衣後切粒 

2. 梅頭豬扒肉用刀背拍鬆兩面後切細件 

3. 放入大碗內加入蒜粒 , 乾蔥粒及醃料拌勻靜待1小時

4. 菠菜去頭切段  , 加少許鹽及加水浸過面靜待10分鐘後用水沖洗乾淨 

5. 放入煲內加少許鹽及水 , 用中火煮至軟身 

6. 盛起放涼20分鐘後切碎 , 再用手渣乾水份 

7. 將一半份量的白飯加少許生抽及糖拌勻 , 加入黑白芝麻及菠菜再拌勻 

8. 放上一張保鮮紙 , 將適量菠菜白飯放上
 

9. 再放上少許豬肉鬆 , 再放上菠菜白飯 , 用保鮮紙輔助搓成球型 

10. 餘下一半份量的白飯同樣加少許生抽及糖拌勻 

11. 加入黑白芝麻及豬肉鬆再拌勻 

12. 枱放上一張保鮮紙 , 將適量肉鬆白飯放上 , 利用保鮮紙輔助搓成球型備用

13. 飯糰掃上油 , 灑上麵包糠 , 放入鑊中用慢火慢慢煎至每面微黃或金黃色即可 

14. 豬扒亦放入鑊中用中火煎至兩面金黃即可 




香香濃濃的煎豬扒配上脆口的菠菜飯糰 , 真會令人食不停口 , 肉鬆飯糰可以留待明天做早點呢 ^^







26 則留言:

  1. 菠菜飯團好煮意,袁太take care. 😊

    回覆刪除
  2. 袁太小心身體呀, 呢排又熱又凍呢~

    好可愛既飯團們呀!

    回覆刪除
    回覆
    1. 最近的天氣真係好難預測,不過多謝肥人關心,袁太已經好番晒喇

      刪除
  3. 飯糰圓錄錄好cute呀,袁太保重身體呀

    回覆刪除
  4. 袁太保重呀,最近的天氣真係好容易病

    回覆刪除
    回覆
    1. 多謝關心,大家都要保重身體呢

      刪除
  5. 袁太多多保重,豬扒正,飯糰得意

    回覆刪除
  6. 相信兩款飯糰都好味呢

    回覆刪除
    回覆
    1. 我同袁生都比較喜愛菠菜個款呢

      刪除
  7. 保重身體呀
    袁生真有口福,香氣從個芒傳過來。

    回覆刪除
  8. 回覆
    1. 多謝關心,係呀,傷風,發燒,喉嚨痛咩都有

      刪除
  9. 平平無奇的白飯都可以變成靚靚飯糰,袁太真係創意無限呢

    回覆刪除
  10. 兩件飯團好吸引呀。 好番就好喇,要多補充營養呀!

    回覆刪除