2018年4月13日 星期五

煎釀茄子




平時去酒樓飲茶的時候 , 除左嘆一盅兩件點心外 , 煎炸物永遠係袁生袁太最愛的食物 , 好似煎釀茄子 , 春卷永遠都係我飲茶點心內的座上客 , 總會叫番一兩碟 , 飲杯茶 , 慢慢嘆 ......



但酒樓一碟得個幾件 , 事問點可以滿足到我同袁生呢 , 事關袁生好愛吃茄子 , 街市的茄子有粗身有幼身 , 我同袁生都比較鐘意食呢款幼身的茄子 , 有時突然想食 , 快快手去街市買齊材料回家烹調就有得食 , 煎釀茄子材料好簡單 , 只需茄子同魚肉就可 , 但袁太就覺得太Dry呢 , 所以就自己加下呢樣 , 加下個樣材料 , ~哈~袁太加了蝦米 , 冬菇同芫茜的香口材料 , 全部拌勻醃好再釀入茄子內 , 簡單沾上生粉 , 再放入鑊中煎至兩面金黃色兼脆身



煎好後 , 有人喜愛煮獻汁淋在茄子上 , 但我同袁生都怕怕獻汁 , 簡單地淋上甜豉油 , 或者咩獻汁咩豉油汁料統統唔落 , 就咁煎都已經好好味呢 ^^


 
材料 : 茄子 , 鯪魚肉 , 蝦米 , 冬菇(預先浸軟) , 冬菇水 , 芫茜 , 胡椒粉 , 鹽 , 生粉




蝦米浸水後用水沖一沖洗及瀝乾 , 蝦米切碎 , 冬菇切粒 , 芫茜切碎 ,  鯪魚肉放入大碗內 , 逐一加入芫茜碎 , 蝦米 , 冬菇粒 , 鹽 , 胡椒粉及麻油拌勻 , 加入1湯匙冬菇水拌勻 , 見鯪魚肉出現分離時 , 用手拎起魚肉撻十餘下後靜待30分鐘 





















茄子切件 , 將適量魚肉餡料釀入每件茄子內 , 再每邊沾上薄薄一層生粉 , 將每件茄子放入鑊中(先煎魚肉部份) , 用慢火慢慢煎魚肉至微黃色 , 反轉亦用慢火慢慢煎至茄子熟透即可
















材料  
茄子3條 , 鯪魚肉$15 , 蝦米 , 冬菇2隻(預先浸軟) , 冬菇水 , 芫茜 , 胡椒粉 , 鹽 , 生粉



做法
1. 蝦米浸水後用水沖一沖洗及瀝乾 

2. 蝦米切碎 , 冬菇切粒 , 芫茜切碎 

3. 鯪魚肉放入大碗內 , 逐一加入芫茜碎 , 蝦米 , 冬菇粒 , 鹽 , 胡椒粉及麻油拌勻 

4. 加入1湯匙冬菇水拌勻 

5. 見鯪魚肉出現分離時 , 用手拎起魚肉撻十餘下後靜待30分鐘 

6. 茄子切件 , 將適量魚肉餡料釀入每件茄子內 

7. 再每邊沾上薄薄一層生粉 

8. 將每件茄子放入鑊中(先煎魚肉部份) , 用慢火慢慢煎魚肉至微黃色 

9. 反轉亦用慢火慢慢煎至茄子熟透即可 




一碟多件的煎釀茄子 , 可以一次食到夠 , 食到飽呢 ^^




22 則留言:

  1. 袁太, 肥人整親呢個, 魚肉同茄子都係會分手架...好慘慘呀~

    回覆刪除
    回覆
    1. 分手咁慘呀,咪茄子還茄子,魚肉還魚肉囉

      刪除
  2. 我都喜歡食, 特別係煎釀三寶既豆腐😋

    回覆刪除
  3. 煎釀茄子我都鐘意食,仲有釀紅腸呀

    回覆刪除
  4. 我去飲茶,在家都會整,特別在香港可以買到新鮮魚肉。

    回覆刪除
  5. 茄子我唔太食,但鐘意食魚肉

    回覆刪除
    回覆
    1. 我識好多人都唔鐘意食茄子呢

      刪除
  6. 我鐘意釀茄子,釀青椒呀

    回覆刪除