2018年4月17日 星期二

椰汁馬豆糕 / 紅豆糕




前幾日執廚房時俾袁生發現有馬豆 , 就即刻叫袁太整馬豆糕俾佢做宵夜 , 當搵下齊唔齊材料時 , 發現有罐買左幾耐而又未開封的紅豆蓉 , 所以就決定除左整馬豆糕外 , 整埋紅豆糕喇 , 因袁太係唔愛吃馬豆的人 , 由細到大都唔喜歡 ......
 


唔知點解總覺得馬豆有陣怪味 , 想我食真係好難 , 以往係街經過見有得賣 , 一定會買番幾件俾袁生食 , 不過麻煩友又鬼死咁多怨言 , 又話出面買的唔夠滑 , 又話唔夠實 , 又水汪汪 , 所以佢而家每次想食馬豆糕 , 就會發洩係我度 , 要求或命令叫我整 , 我見馬豆糕做法唔難 , 所以佢每次開聲我都會整 , 不過我唔擔保會整得好味



不過自己整都有好處 , 就係可以控制甜的程度 , 街買的真係可以食到有糖尿病 , 所以我就會選擇整少甜版本 , 食咁甜對身體都唔太好 , 整馬豆糕的材料同做法其實好簡單 , 只需要馬豆 , 椰漿 , 淡奶 , 粟粉 , 糖 , 水就可以 , 只係落馬豆前盛起一半份量 , 加入紅豆蓉就變成紅豆糕呢 ,  而且今次整的份量唔算多 , 因始終唔太多人食 , 但袁生條友居然食得晒 , 睇來佢真係好愛 ... 好愛馬豆糕 , 袁生仲話袁太整的馬豆糕雖然好滑滑 , 好香椰汁味 , 不過唔夠實 , 話可能袁太落得太多豆的關係喎 , 唔理佢喇 , 仲知好味就得呢 ^^



材料 : 馬豆(預先加水浸一小時) , 紅豆蓉 , 椰漿 , 淡奶 , 粟粉 , 白砂糖 , 水 




馬豆浸1小時後用水沖一沖洗及瀝乾 , 放入大煲內加水蓋過馬豆面 , 用中火煮滾後 , 蓋上蓋轉慢火煲1小時 , 再熄火焗30分鐘 , 將馬豆隔水盛起備用















粟粉放入大碗內 , 加1杯水份量拌勻 , 再用隔篩去多餘粉粒 , 紅豆蓉從罐頭取出備用 , 白砂糖放入煲內 , 加入餘下的4杯水份量拌勻 , 用中火煮至糖溶後加入淡奶及椰漿拌勻 , 再加入之前拌勻好的粟粉水 , 轉慢火拌勻慢慢煮至杰身























將一半椰汁糊轉放入另一煲內 , 大煲加入馬豆拌勻 , 另一煲加入紅豆蓉拌勻 , 器皿用冰水沖一沖洗 , 將馬豆糊及紅豆糊逐一放入器皿內靜置30分鐘待涼 , 放入雪櫃靜待一晚或最少6小時至凝固即可
 



















材料
馬豆80g , 紅豆蓉一罐 , 椰漿400g(大罐) , 淡奶1罐 , 粟粉170g , 白砂糖280g , 水5杯 



做法
1. 馬豆浸1小時後用水沖一沖洗及瀝乾 

2. 放入大煲內加水蓋過馬豆面 , 用中火煮滾後 , 蓋上蓋轉慢火煲1小時

3. 再熄火焗30分鐘 , 將馬豆隔水盛起備用

4. 粟粉放入大碗內 , 加1杯水份量拌勻 , 再用隔篩去多餘粉粒 

5. 紅豆蓉從罐頭取出備用 

6. 白砂糖放入煲內 , 加入餘下的4杯水份量拌勻 , 用中火煮至糖溶後加入淡奶及椰漿拌勻 

7. 再加入之前拌勻好的粟粉水 , 轉慢火拌勻慢慢煮至杰身

8. 將一半椰汁糊轉放入另一煲內 

9. 大煲加入馬豆拌勻 

10. 另一煲加入紅豆蓉拌勻 

11. 器皿用冰水沖一沖洗 , 將馬豆糊及紅豆糊逐一放入器皿內靜置30分鐘待涼 

12. 放入雪櫃靜待一晚或最少6小時至凝固即可 




袁生獨家享用的滑滑椰汁馬豆糕 , 袁太真係一件都冇食過架 , 我只食紅豆糕(不過到最後只食得三件咁多 , 其他已經俾袁生食晒呢) ^^









22 則留言:

  1. 家下開始熬~啱哂整呢D甜點呢~!

    回覆刪除
    回覆
    1. 天氣熱,我真係好鐘意食甜糕點同糖水

      刪除
  2. 我都係唔喜歡食馬豆,紅豆啱我多啲。

    回覆刪除
  3. 好靚仔啊!我都吾食馬豆糕架.

    回覆刪除
  4. 回覆
    1. 不過我既著眼點係...放喺嗰塊布(應該係布)感覺好唔衛生, 影完相係咪唔食...

      刪除
    2. Crystal Lam :食架,塊布乾淨的

      刪除
  5. 我媽媽以前成日整馬荳糕呢^^

    回覆刪除
  6. 我比較鐘意紅豆糕

    回覆刪除
  7. 夏日食糕點,好涼快

    回覆刪除
  8. 兩款糕點都好靚

    回覆刪除