2018年5月8日 星期二

[又來餃餃震] 蟲草花鮮蝦豬肉蒸餃




前排天氣好好 , 當太陽伯伯出黎同大家say hi的時候 , 天氣又仿似蒸籠一樣 , 人都就快蒸熟 , 晚餐都唔太想係廚房太長時間 , 但又唔想食飯飲熱湯 , 最好選擇當然係包餃餃 ......



日常生活我好喜愛食餃 , 以前會在超市買現成回家 , 但近幾年已選擇自己動手包 , 自己包永遠健康又新鮮 , 而且可以配搭不同材料 , 以往最愛用菠菜或豆苗的我 , 今次就選擇左佢~蟲草花~ , 唔知大家喜歡食蟲草花嗎 ??? 我就冇話喜歡唔喜歡 , 不過蟲草花閒時可以用黎煮餸 , 煲湯 , 蒸排骨 , 蒸雞翼或做涼拌菜 , 所以我都會買定一大包係廚房存貨



今次的餃子餡除左蟲草花 , 我仲加左冬菇 , 基圍蝦及梅頭肉三樣材料 , 其實起初冇諗住用蝦既 , 不過係街市見又好似幾靚 , 所以就買左半斤




餃子餡有冬菇自然香 , 有蝦肉又可以令餡料變得彈牙 , 本來包好後想蒸來食 , 但突然有飯局 , 回家已到宵夜時間 , 所以只蒸了幾隻做宵夜 , 其餘的就放入雪櫃冷藏 , 留待第二朝煎黎俾袁生做早餐 , 咁袁太就可以打斧頭慳番d早餐錢呢 ^^



材料 : 半肥瘦梅頭肉 , 蟲草花(先浸水10分鐘) , 冬菇(預先浸軟) , 冬菇水 , 基圍蝦 , 餃子皮 , 蒜頭 , 芫茜 , 蔥 , 薑 , 鹽 , 糖 , 生粉 , 魚露 , 胡椒粉 , 青檸




半肥瘦梅頭肉切絲再切粒後剁成肉餅狀 , 放入大碗內加少許油及水拌勻先靜待10分鐘 , 期間將基圍蝦去頭去殼(留起) , 將蝦肉用水沖一沖洗後去腸切粒 , 冬菇切粒 , 蟲草花切碎 , 薑蘑成薑汁 , 薑汁放入豬肉內 , 再加入醃料拌勻靜待15分鐘










 







15分鐘後加入蟲草花 , 蝦肉 , 冬菇粒及適量冬菇水拌勻 , 蓋上保鮮紙入雪櫃靜待1小時 , 期間將蔥切粒 , 薑去皮切粒 , 蒜頭去衣切粒 , 芫茜切碎 , 青檸切半 , 蒜粒 , 薑粒 , 蔥粒 , 芫茜碎放入碗內 , 加入青檸汁 , 少許鹽 , 糖 , 生抽調味 , 加入100而ml水拌勻成汁料備用



















1小時後將適量餡料放上餃子皮中間位置 , 再對摺封口 , 餃子放入電蒸鍋內 , 蓋上蓋蒸15分鐘再焗5分鐘至熟透即可
















材料 
半肥瘦梅頭肉$15 , 蟲草花(先浸水10分鐘) , 冬菇3隻(預先浸軟) , 冬菇水 , 基圍蝦1/2斤 , 餃子皮 , 蒜頭1/2個 , 芫茜1扎 , 蔥 , 薑 , 鹽 , 糖 , 生粉 , 魚露 , 胡椒粉 , 青檸1個

醃料 
魚露 , 生抽 , 老抽 , 糖 , 生粉 , 麻油 , 胡椒粉



做法
1. 半肥瘦梅頭肉切絲再切粒後剁成肉餅狀 

2. 放入大碗內加少許油及水拌勻先靜待10分鐘 

3. 期間將基圍蝦去頭去殼(留起) 

4. 將蝦肉用水沖一沖洗後去腸切粒 , 冬菇切粒 , 蟲草花切碎 , 薑蘑成薑汁 

5. 薑汁放入豬肉內 , 再加入醃料拌勻靜待15分鐘

6. 15分鐘後加入蟲草花 , 蝦肉 , 冬菇粒及適量冬菇水拌勻 

7. 蓋上保鮮紙入雪櫃靜待1小時 

8. 期間將蔥切粒 , 薑去皮切粒 , 蒜頭去衣切粒 , 芫茜切碎 , 青檸切半 

9. 蒜粒 , 薑粒 , 蔥粒 , 芫茜碎放入碗內 , 加入青檸汁 , 少許鹽 , 糖 , 生抽調味

10. 加入100而ml水拌勻成汁料備用

11. 1小時後將適量餡料放上餃子皮中間位置 , 再對摺封口 

12. 餃子放入電蒸鍋內 , 蓋上蓋蒸15分鐘再焗5分鐘至熟透即可





自家製餃餃永遠夠足料 , 不過今次只係包左23隻 , 好似唔係好夠食 , 留起的蝦頭蝦殼可以留番黎煲個湯飲下呢 ^^








18 則留言: