2018年6月12日 星期二

洋蔥薯仔炆雞翼




上次執廚房見有雞翼存貨 , 以前食得雞的時侯 , 喜愛閒時用來煮晚餐或者整小食 , 雞翼相信每一位都喜愛 , 喜愛佢做法多多 , 無論煎 , 蒸 , 煮 , 炸 , 炆 , 點煮都得 , 大家都知 , 袁生袁太係炸物怪 , 首選一定會選擇用炸的方法 , 不過而家袁太唔吃得雞 , 而袁生又話最近喉嚨唔多舒服 , 頭又有少少痛 , 所以最後選擇用炆的方法去烹調 ......



炆雞翼的方法都可以有好多 , 可以用梅菜炆 , 可以用冬菇炆 , 可以用栗子或芋頭炆 , 不過袁生最愛都係用薯仔炆 , 薯仔炆雞絕對由細食到大 , 細細個每家每戶都有自己的味道



不過我就簡單少少 , 用蠔油炆 , 本來想加栗子一齊炆 , 但又驚袁生食完又話胃痛 , 都係怕怕 , 雞翼用慢火蓋上蓋炆 , 雞翼滑滑 , 薯仔軟軟 , 而且好好拌飯 , 最後袁太將呢個薯仔炆雞做成碟頭飯 , 將白飯先放上碟 , 再放上洋蔥薯仔雞 , 再淋上多多的炆雞翼汁 , 一碟過俾袁生做晚餐 , 方便快捷 , 碗都可以洗少隻呢 ......



材料 : 雞中翼 , 薯仔 , 薑 , 蒜頭 , 蔥 , 洋蔥 , 胡椒粉 , 糖 , 生粉 , 酒 , 水




雞中翼用水沖洗乾淨抹乾水份放入大碗 , 加入醃料拌勻靜待1小時 , 蔥切段及幼絲 , 薑去皮切絲 , 蒜頭去衣拍扁 , 洋蔥去衣切件 , 薯仔去皮切件 , 用水沖一沖洗及瀝乾













燒紅鑊 , 放入薑絲 , 蒜頭 , 蔥白爆香 , 加入雞翼及贊少許酒炒至轉色 , 再加入洋蔥 , 薯仔拌勻炒數分鐘 , 加入調味料再拌勻 , 加入2碗水份量拌勻用中火煮滾 , 蓋上蓋轉慢火炆20分鐘再熄火焗10分鐘 , 最後加少許老抽及青蔥段拌勻即可






























材料
雞中翼6隻 , 薯仔2個 , 薑 , 蒜頭1個 , 蔥 , 洋蔥1個 , 胡椒粉 , 糖 , 生粉 , 酒 , 水2杯

醃料
生抽 , 酒 , 糖 , 生粉 , 麻油 , 胡椒粉

調味料
蠔油 , 生抽 , 鹽 , 糖 



做法
1. 雞中翼用水沖洗乾淨抹乾水份放入大碗 , 加入醃料拌勻靜待1小時 

2. 蔥切段及幼絲 , 薑去皮切絲 , 蒜頭去衣拍扁 , 洋蔥去衣切件 

3. 薯仔去皮切件 , 用水沖一沖洗及瀝乾

4. 燒紅鑊 , 放入薑絲 , 蒜頭 , 蔥白爆香 , 加入雞翼及贊少許酒炒至轉色 

5. 再加入洋蔥 , 薯仔拌勻炒數分鐘 

6. 加入調味料再拌勻 

7. 加入2碗水份量拌勻用中火煮滾 , 蓋上蓋轉慢火炆20分鐘再熄火焗10分鐘 

8. 最後加少許老抽及青蔥段拌勻即可




大人細路都愛的薯仔炆雞翼 , 真係由細食到大都唔覺厭 , 可惜而家唔食得雞 , 唯有只可望袁生食呢 ^^







16 則留言: