2018年6月25日 星期一

涼拌皮蛋雞蛋豆腐




呢個星期一時有太陽 , 一時又落雨 , 呢種天氣真麻煩 , 有太陽時就熱到爆 , 落下街都會出汗 , 落雨又濕濕淋淋 , 我就最討厭帶傘 , 要攞傘我寧願唔出街 , 熱死辣辣的天氣最好就食涼拌 , 點解袁太會整涼拌 , 其實係因為 ......



袁太的朋友仔閒時都會whatsapp叫我幫忙煮野 , 有時會叫袁太幫忙整蛋糕 , 麵包 , 或者派對小食 , 今次朋友仔whatsapp想整涼拌 , 我當然唔會say no , 我明既 , 炎熱的天氣絕對係涼拌出場的好時候 , 袁家涼拌系列都有好多種 , 有~雪菜粉皮呀~ , ~海蜇手撕雞~ , 不過我同袁生最愛的涼拌首選係豆腐 , 而豆腐又係自家製出品的雞蛋豆腐 , 自家製滑滑健康無添加



其實以往整涼拌豆腐必然會去超市買方便裝 , 不過我知袁生比較喜愛食我整的雞蛋豆腐 , 所以之後都以雞蛋豆腐代替 , 不過豆腐要好小心處理 , 一唔小心就會整爛晒d豆腐 , 滑滑溜溜兼凍冰冰的豆腐 , 淋上調味汁 , 話咁快就有得食 , 係咪真係好簡單呢 , 食時加入蔥粒及肉鬆 , 就更加美味 , 雖然市面上的盒裝豆腐都衛生及方便 , 不過始終還是自家製 , 出品的豆腐最健康 , 食得絕對好放心 , 當晚朋友仔放入來取 , 夜晚都有whatsapp番俾袁太 , 話好好味 , 佢一家都好喜歡呢 ^^



材料 : 無糖豆漿 , 雞蛋 , 皮蛋 , 蒜頭 , 蔥 , 乾蔥頭 , 鹽 , 糖 , 胡椒粉 , 蒸盆




雞蛋打入大碗內 , 加入鹽及無糖豆漿拌勻 , 蒸盆放上一層保鮮紙 , 將豆漿蛋液用篩網隔去多餘泡沫及雜質 , 放入電蒸鍋內蓋上蓋先蒸2分鐘 , 用筷子將蓋留縫隙(可避免蒸來的豆腐過老或變火山口) , 蒸25分鐘 , 期間將皮蛋去殼切粒 , 蒜頭 , 乾蔥頭去衣切細粒 , 蔥切粒備用




















雞蛋豆腐蒸好後去邊切粒 , 放入大碗內加入冰水浸過面靜待10分鐘 , 已浸冰水10分鐘的雞蛋豆腐瀝乾水份先放上碟 , 蓋上保鮮紙入冰箱冷藏1小時












鑊中加入蒜 , 乾蔥爆香 , 加入調味料及水拌勻用中火煮滾 , 雞蛋豆腐及皮蛋放上碟 , 淋上汁料 , 最後灑上蔥粒及肉鬆即可
















材料 
無糖豆漿300ml , 雞蛋3隻 , 皮蛋2隻 , 蒜頭1/2個 , 蔥 , 乾蔥頭5粒 , 鹽 , 糖 , 胡椒粉 , 蒸盆

調味料
蠔油1湯匙 , 生抽 , 糖 , 胡椒粉



做法
1. 雞蛋打入大碗內 , 加入鹽及無糖豆漿拌勻 

2. 蒸盆放上一層保鮮紙 , 將豆漿蛋液用篩網隔去多餘泡沫及雜質 

3. 放入電蒸鍋內蓋上蓋先蒸2分鐘

4. 用筷子將蓋留縫隙(可避免蒸來的豆腐過老或變火山口) , 蒸25分鐘 

5. 期間將皮蛋去殼切粒 , 蒜頭 , 乾蔥頭去衣切細粒 , 蔥切粒備用

6. 雞蛋豆腐蒸好後去邊切粒 , 放入大碗內加入冰水浸過面靜待10分鐘

7. 已浸冰水10分鐘的雞蛋豆腐瀝乾水份先放上碟 , 蓋上保鮮紙入冰箱冷藏1小時

8. 鑊中加入蒜 , 乾蔥爆香

9. 加入調味料及水拌勻用中火煮滾 

10. 雞蛋豆腐及皮蛋放上碟 , 淋上汁料 , 最後灑上蔥粒及肉鬆即可




夏天必食的涼拌皮蛋雞蛋豆腐 , 今次用上自家製雞蛋豆腐 , 滑滑健康無添加又美味呢 ^^








10 則留言: