薑蔥叉燒雞絲撈麵 , 自家製美味水餃(香菇椰菜雞肉水餃) <附食譜>

清明節當日本來要同奶奶佢地去拜山，但好可惜因為袁生有親戚剛剛去世，所以奶奶就決定取消行程，袁生袁太就係屋企休息一下，休息當然係訓下下午覺，越訓就越疲倦，本來諗住煲啖湯俾袁生飲，但個人訓到懶晒，下午四點幾先捨得落去買餸，當日落左成日雨，攪到都冇咩心機煮飯煲湯，突然間好鬼想食撈麵，仲要係撈粗個隻，本來簡簡單單用薑蔥麻油撈，但經過燒味店叫到有舊靚靚的半肥瘦叉燒，又忍唔住買左十蚊，冰箱仲有一塊急凍雞扒，一於用黎整手撕雞，同叉燒拌勻一齊撈麵，原來係好好食

另外雪櫃有水餃皮，有冬菇，有椰菜，再加埋免治雞肉做水餃的餡料，清清地味道都唔錯，好過成日用豬肉做餡料咁悶，水餃簡簡單單用鮮魚濃湯寶做湯底，再加幾條菜心，少許木耳絲，咁就有一碗美味的自家製湯水餃 !

材料(薑蔥叉燒雞絲撈麵) : 粗麵<2個>，叉燒<$10>，雞扒<1塊>，銀芽<$3>，蔥粒，薑蓉<適量>
汁料 : 生抽，老油，糖，麻油<適量>，蒸雞扒汁<5湯匙>

 
做法 :
1. 雞扒解凍後用鹽，酒醃3小時，叉燒切絲備用

2. 將醃好的雞扒隔水蒸20分鐘後焗5分鐘，待涼撕成絲同叉燒絲拌勻備用

3. 銀芽用油，鹽，薑片烚約3分鐘盛起

4. 燒滾水放入粗麵煮好後，盛起瀝乾水份加少許麻油拌勻放在碟上，再將銀芽放上，叉燒雞絲放在銀芽面

5. 燒紅鑊，爆香薑蓉同蔥粒，將汁料落鑊拌勻煮熱，淋在叉燒雞絲撈麵上即可

********************************************************************************

材料(香菇椰菜雞肉水餃) : 冬菇<3朵>，椰菜<半個>，免治雞肉<$15>，水餃皮<適量>，菜心<半斤>，木耳<適量>，鮮魚濃湯寶<1粒>
醃料 : 生抽，雞粉，糖，麻油，生粉，水<適量>


做法 :
1. 冬菇浸軟切粒，椰菜洗淨切絲

2. 雞肉，冬菇粒，椰菜絲加入醃料拌勻，放入雪櫃1小時

3. 將雞肉餡料放入水餃皮的中間的位置，搽少少水係水餃皮邊對摺封口

4. 水餃由右至左摺幾下，放在有生粉的碟上即可

 

燒滾水，放入鮮魚濃湯寶煮滾，加入菜心，木耳絲煮至熟透

將雞肉水餃放入煮至浮起即可