蕃茄意式肉丸螺絲粉

今日又整通心粉喇!亦都又係用罐頭湯整,
上次袁生俾袁太話事整貝類粉之後,
今次袁生要求食螺絲粉,咁就整螺絲粉喇!
不過今次唔用雞扒,轉整蕃茄意式肉丸,
我覺得呢個肉丸幾好食,可能因為加左少少芝士的關係掛,
最重要係袁生鐘意,話咁快同我清晒喇!



~蕃茄意式肉丸螺絲粉~食譜

材料 : 馬鈴薯磨菇湯-1罐 / 螺絲粉-半斤 / 豬肉碎 , 牛肉碎 - 各$10 / 青豆-適量 / 洋蔥-半個 /
                               蕃茄-1個 / 茄汁-2湯匙 / 芝士碎-少許

                                                          

1.豬肉碎同牛肉碎拌勻後,加入少許黑椒,鹽,生粉,水拌好,然後做成肉丸.
 
2.焗爐用180C將肉丸焗至表面微熱,備用.
3.將蕃茄切成蓉,燒紅鑊,爆香洋蔥,加入肉丸煎至表面微微金黃,取出.
4.加入蕃茄蓉,茄汁,少許鹽,糖煮成蕃茄醬後,再灑上少許芝士碎,將肉丸撈起,備用.
5.鑊中加入馬鈴薯磨菇湯及水,待滾後加入青豆,螺絲粉兜勻,待螺絲粉吸收了湯汁後上碟,將肉丸放上螺絲粉
   面,即可.

海鮮磨菇雞皇煮花甲

其實今次呢個食譜

同白汁青豆雞皇貝類粉的做法係差唔多,
只係將貝殼粉改左花甲,
唔知點解最近袁太喜愛左用罐頭湯黎煮野,
可能貪佢方便掛,
同埋煮出黎的食物夠濃郁,
因為袁生比較鐘意食濃味的食物,
不過都用罐頭湯煮左幾餐喇!
袁生開始有少少意見俾袁太聽喇!
所以呢排應該唔會用罐頭湯煮飯架喇!



~海鮮磨菇雞皇煮花甲~食譜

材料 : 海鮮磨菇湯-1罐 / 雞扒-1塊 / 花甲-1斤

                      醃料 : 生粉 , 糖 , 生抽 , 麻油 , 水 - 少許                                         
 

 

1.花甲浸水3小時,備用.
2.雞扒切件後加入醃料醃約30分鐘.
3.燒紅鑊,將雞件落鑊炒至半熟,撈起.
4.鑊中加入海鮮磨菇湯及水,待滾後加入雞皇,花甲兜勻,待花甲煮至全部開殼即可.  

白汁青豆雞皇貝殼粉

最近天氣咁熱,夜晚餐飯都唔知煮咩好
袁太又唔想煮飯,但又唔想落街食,
咁究竟點好呢?
當袁生話袁太麻的情況下,就提議不如煮通心粉喇!
袁太覺得呢個提議幾好喎!
因為之前係超市入左罐頭湯的貨,
咁就簡簡單單用罐頭湯煮通心粉喇!
不過袁太指定要貝殼粉,再去街市買塊雞扒,
咁就攪掂一餐喇!



~白汁青豆雞皇貝殼粉~食譜

材料 : 馬鈴薯磨菇湯-1罐 / 貝殼粉-半斤 / 雞扒-1塊 / 青豆-適量

                      醃料 : 生粉 , 糖 , 生抽 , 麻油 , 水 - 少許                                         
 

 

1.雞扒切件後加入醃料醃約30分鐘.
 
2.燒滾水,下少許雞粉,加入貝殼粉,青豆煮熟後,撈起隔水備用.
3.燒紅鑊,將雞件落鑊炒至半熟,撈起.
4.鑊中加入馬鈴薯磨菇湯及水,待滾後加入雞皇,青豆,貝殼粉兜勻,待貝殼粉吸收了湯汁後即可.