2012年8月30日 星期四

泰式焗烏頭 <附食譜>

突然好想買條魚做晚餐,但街市有咁多魚,都唔知買邊樣好 ???

見到烏頭啱啱到步,大大條,好似唔錯咁,但唔知貴唔貴呢,而家真係買咩都咁貴,不過決定左就買一條喇,$22/1條都唔算貴,但買左之後又點整好呢,等我諗下先,記得以前買親烏頭都係用豉汁蒸,食左幾次之後,袁生就話厭,所以今次就唔可以用豉汁喇,咁不如試下泰式做法,用香茅同青檸,我諗味道應該會幾清新,不過印象中記得袁生好似唔太好d酸食物,所以都係盡量落少d青檸,唔知焗完之後味道會係點呢 ???



平時我好少焗魚,又驚條魚唔熟,所以就焗左25分鐘,焗完之後條魚依然好滑,香茅同青檸的味道溶入魚中,估唔到真係好好味,就連袁生都大讚 !

2012年8月28日 星期二

泰式綠咖哩雞柳 <附食譜>

袁生突然話想食綠咖哩做晚餐,做老婆的的點可以say no,不過心諗"咁熱天氣仲食咖哩,都傻傻地架",不過聽講綠咖哩好辣個喎,會唔會辣到個嘴變孖潤腸呢 ???

袁太本來想買新鮮雞整咖哩,點知見到冰箱有塊雞扒,所以都係用雞扒整算,應該唔會太大分別,呢個綠咖哩除左雞柳外,仲有好多配料架,例如 : 椰菜花,芽菜,芹菜等等 ...


簡直超簡單,話咁快就煮好,袁太專登整多d汁俾袁生撈飯,點知袁生一食第一啖就講"好辣呀",唉 ... 我都話左綠咖哩辣架喇,講你又唔信,係咪辣到噴火呢,不過唔好話袁生覺得辣,就連袁太食得辣的人都覺得好辣,辣到個嘴個麻晒,不過味道除左辣之外,都幾好味架 !



2012年8月26日 星期日

深水埗@公和荳品廠

袁生話要去深水埗買野,咁我就上網search下有咩好食,發現好多人都話中央飯店的點心好味道,同埋環境方面好似舊式茶樓,袁太就至鐘意懷舊地方,所以就決定去中央飯店試下,
點知去到見到 "內部裝修,暫停營業",我頂 ... 一場黎到冇開門,真係好失望

咁唯有袁生話去邊到食就邊到食喇,食完lunch之後條街開始多人,唉 ... 我就至唔鐘意多人的地方,真係好想拿拿臨番屋企,但袁生話要買printer,咁快快趣行去高登買,買左又要等人整部printer,唉 ... 咁又要落番條街到周圍行,要行大約半個鐘到,呢一刻袁太醒起,附近好似有豆腐花食

之前上網睇過好多人勁讚d豆腐花好滑,好,我地一於去試下,去到公和果然好多人,不過好好彩搵到張二人枱,例牌梗係要試下豆腐花,"唔該一熱一凍豆腐花",袁生食凍我食熱,凍豆腐花就真係麻麻地,反而熱豆花真係好滑好滑,不過就覺得豆味唔係太重,同埋d黃糖係自己落架,鐘意落幾多就落幾多 !



店鋪入面都有懷舊feel

 
仲有兩把大風扇


凍熱豆腐花都係$7/碗


袁生凍豆花,袁太熱豆花到喇 !


唔落咁多黃糖,怕甜得滯 !


2012年8月25日 星期六

魚湯浸桂花魚肉勝瓜 <附食譜>

真係買魚唔知買魚貴,係冇幾耐之前,仲記得去魚檔買桂花魚都係三十幾蚊,但而家要四十幾蚊先買到一絛,真係好貴喔,但因為袁生至鐘意就係桂花魚,又唔係日日買,偶然買下煮俾袁生食,冇所謂喇,最緊要係袁生鐘意

次次買桂花魚番黎都係清蒸多,所以今次就拜託魚檔呀姐,幫我將條桂花魚起骨,啖啖肉,咁就唔驚有骨喇,但起左肉後d魚骨千其唔好掉,魚骨可以用黎煮個魚湯架,煮好魚湯之後,
另外再加埋勝瓜一齊煮,有魚,有菜,又有魚湯飲下,真係好好味


袁生都不知幾鐘意個魚湯,而桂花魚肉當然一樣咁鐘意,不過袁生就唔係太好勝瓜喎,咁如果下次再整的話,用咩菜黎整好呢 ???

2012年8月21日 星期二

手撕雞蝦餅煮白蘿蔔 <附食譜>

由於最近工作關係,幾乎好多日冇煮飯喇,餐餐都食外賣,真係好鬼厭,所以袁太決定就算幾夜收工都好,都要番屋企煮餐飯食下,而買餸方面,梗係由袁生負責喇,而家袁生買餸已經好叻,最近天氣熱,多數都係煮冬瓜或節瓜,但袁生話想食白蘿蔔

白蘿蔔???


都唔錯,但我又唔想用黎煮湯,突然想起,袁生平時超鐘意食蝦餅,咁如果煎個脆口蝦餅,再加同雞湯煮的白蘿蔔片,唔知味道夾唔夾到呢 ???

不過呢個蝦餅白蘿蔔都煮左幾耐,淨係煮個蘿蔔都用左30分鐘,好彩平時我地都係夜食飯的人,如果唔係實餓死,呢個蝦餅另外加左雞絲一齊煎,真係好好味,另外白蘿蔔又甜,兩煮夾埋真係冇得頂 !

2012年8月19日 星期日

BB沖涼日



天氣日日都咁熱,BB一定好熱,皆因d毛又長,甲又長,耳仔仲有好多耳屎,所以就決定同BB book沖涼


大家係咪覺得點解袁太唔自己同BB沖呢,原因好簡單,因為BB由細到大到唔俾我同佢沖涼架,都唔知點解次次抱佢入沖涼室,BB都發晒癲係咁跑,好似以為我會強姦佢咁,所以都係出去寵物店穩陣d

呢間"千尋犬舍"袁太幫襯過好多次架


入面職員,美容師全部都好有禮貌,好好人,BB今次要做既就係沖涼,剃毛,剪甲,洗耳仔,同埋短條尾,足足攪左3小時,都係承為$300,真係一d都唔貴


大家係咪覺得BB沖完涼,剪完毛之後,係咪成個精神晒呢 ???
 

始終都係你最好...

記得以前行街的時候,經過卓悅見到有橄欖沐浴露賣,大大支,就買一支番屋企,經袁生袁太試過之後,都覺得好適合自己肌膚用,而且橄欖味仲好香,但當之前用完一支之後,因為懶得出去買,所以已經好耐冇用


 
 
直至前幾日袁生去旺角買野的時候,經過卓悅,記得我話想買番呢隻沐浴露,就幫我買左一支番屋 企,有時都覺得袁生幾細心,不過不知不覺已經加到$52/支,雖然覺得有少許貴,但鬼叫自己覺得好用咩,用過咁多牌子沐浴露,始終都係呢隻最好^o^


2012年8月13日 星期一

三文魚骨蘿蔔湯 <附食譜>

突然間好想飲三文魚湯,慶幸冰箱仲有幾條三文魚骨,一於用埋黎煲湯,仲記得之前用三文魚骨煲湯的時候,係用蕃茄薯仔,但其實我知袁生唔太鐘意蕃茄,所以就轉用白蘿蔔,雪櫃仲有一條甘旬,落埋去一齊煲


呢個三文魚骨湯只係煲左1 1/2小時,落少許鹽調味已經好好飲,不過由於d三文魚骨煲到爛晒,所以飲之前都係隔左湯渣會好d,費時俾袁生發現碗湯有骨,又媽叉我



但袁太係到諗,雖然d三文魚骨係煲欄左少少,但有d都仲係完整,所以袁太就有個做法,就係將三文魚骨撈起,好小心好小心咁將三文魚肉起出,咁d三文魚肉就可以另外炒個飯俾BB做晚餐 !


三文魚含omega 3,對狗狗都好好架,BB有炒飯做晚餐,梗係開心到暈,起碼唔駛食狗糧咁悶 !

2012年8月11日 星期六

香脆焗魚柳球 <附食譜>

最近去到街市都唔知買咩餸好,周圍行下行下,行到去急凍店就入去睇下有咩材料,見到d三文魚柳幾靚,但好可惜,因之前已經諗好煲三文魚骨湯,所以都係搵過第二樣材料,呢個時候又俾我見到龍利柳,啱啱到貨,就叫人幫我攞兩條,都係$13,大大條~抵呀~

之前買親龍利柳都係用粟米整,所以今次想攪攪新意思,又係最方便的方法~焗~,又見廚房有芫茜同蔥,仲有兩塊切片方包,再唔食就過期,將佢地全部撈埋一齊,放入焗爐焗就可以,係咪好簡單呢


另外再加少少檸檬皮一齊焗,香噴噴的檸檬味好突出,不過因為驚袁生話檸檬味太重,所以只係用左半個檸檬皮去整,但袁生都覺得味道唔錯,話味道好清新喎 !

冬瓜炆釀燕麥豆卜 <附食譜>

都唔知點解今年夏天咁鬼熱,熱到都冇心情煮飯,以前袁太話夜晚唔想煮飯,袁生都不知幾開心,因為袁生係一個鐘意出街食飯的人,袁太都成日同袁生講,一個男人聚個女人番屋企做老婆,個老婆鐘意入廚房煮食物,唔係應該好開心既咩,定係袁生特別唔同呢 ???

不過最近好奇怪,因為袁太公司有同事請左幾日假,所以要頂埋個位同事做既野,呢個星期日日都攪到九點先收得工,之前連續三日冇煮飯,初時仲以為袁生好開心,點知袁生終於投訴,我幾日夜晚都冇飯落肚喇,我都冇辦法架,鬼叫放工放得夜咩,唉...如果你想食飯,咁你放工的時候去街市買餸囉,等我番黎先煮,如果你唔怕夜食飯的話,所以今次呢個冬瓜炆豆卜係袁生因為想食而去煮既,夏天一般離不開都係食冬瓜,今次連豆卜都係自己釀,都係例牌用鯪魚肉釀


不過就係鯪魚肉裡面再加少少燕麥糠,起碼感覺上都健康d,大家話係咪 ???

2012年8月10日 星期五

FIBE-MINI


前幾日經過超市,無意中見到FIBE MINI做緊特價,記得初初發售的時候,買過番屋企飲,覺得好好味,但飲過一兩次之後,就唔記得左有呢支飲品,因為袁太係一個無咩記性的人,平時超市多數都係一pat買,但居然有單支賣,$12/2支,咁咪仲平過買一pat ???



所以袁太就買左6支番屋企,夜晚沖完涼飲一支,真係當堂舒服晒,但最攪笑既係,居然連袁生都飲埋一份,睇黎要再去超市入貨先得 !


東坡肉雞湯米線 <附食譜>

袁生某日突然話想食東坡肉,吓...東坡肉好似好難整,我之前都未整過,你想食都得,不過到時唔好話難食就得喇,因為袁太真係冇咩信心,袁太對住冇咩信心煮得好的時候,梗係上網search下有關資料,睇睇下好似唔係太難,不過都要炆一小時,去街市買舊靚五花肉,就可以開工

袁太一路係廚房整,袁生就一路問"攪唔攪得掂呀???" 唉...我攪唔攪得掂你都要食,你唔好唔記得係你叫我整,經過一小時的炆煮後,又係袁生試味的時候,試味後個評語係"味道幾好,唔錯唔錯"


聽到袁生話味道唔錯,咁我係廚房整咁耐都冇白費,不過袁生轉頭又話,而家有東坡肉,但我又唔想食飯,不如煮米線,我頂...唔食飯又唔早講,不過好彩我未落米,另外雪櫃仲有少少小棠菜,有濃湯寶雞湯味,一於方方便便整個雞湯米線,加埋東坡肉,嘩...好滿足呀~~~




2012年8月7日 星期二

沙蔘玉竹栗子雞湯 <附食譜>

最近袁太真係懶到出汁,除左放工疲倦到唔想煮飯外,大多數都係天氣熱的關係所致,大家知喇,咁熱的天氣仲要屈係廚房到煮飯,真係好辛苦,但見到部電腦實在有太多食譜仲未公開,就算幾唔得閒,幾疲倦都要拿拿臨清晒d食譜

好喇,今日要post的食譜就係沙蔘玉竹湯,呢個湯已經係7月尾的時候煲架


之前飲沙蔘玉竹湯都係去買一包包湯料番屋企煲,今次就去藥材鋪自己買沙蔘玉竹,另外去雞檔買雞胸殼,再加埋栗子一齊煲,湯味道濃郁,真係好好味


不過袁生就有個問題,話點解會買雞胸殼煲,好簡單,其實本來袁太諗住買雞脾肉,點知雞檔呀姐話用雞胸殼煲湯好香,所以咪信呀姐,試下用雞胸殼煲,果然雞味好濃郁 !


2012年8月3日 星期五

叉燒炒三絲 <附食譜>

每晚放工番到屋企已經係晚上八點幾的時間,雖然好似好夜,但又想煮飯,所以平時都會盡量煮d比較簡單的菜式,大家就會問,點解唔出街食又或者買外賣 ???

唉...袁太就至唔鐘意買外賣,所以就算番到屋企幾疲倦都會選擇煮飯,成日食外賣都冇益,
今日仲衰,公司既野做極都做唔完,攪到成八點幾先收到,番到屋企都差不多九點,好彩下午時份,已經叫袁生放工幫我買定d餸,番到屋企要拿拿臨開工先得

所以都簡簡單單煮d餸就算,叫左袁生幫我買叉燒,椰菜,甘旬,將佢地切晒絲就埋一碟就完成,真係簡單又好味


其實袁太之前係唔鐘意用甘旬煮菜,但唔知點解,最近又好鐘意,都唔知發左咩顛,以前唔鐘意食既野,而家就唔抗拒,但以前鐘意食既野,而家就變得麻麻地,唔通我痴左線 ???

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......