2013年9月28日 星期六

金華火腿紅棗冬菇鮮雞湯 < 附食譜>

年紀越大就漸漸要為身體打打起,得閒的時候就要煲有益湯水補補身子,平時的我好喜愛飲雞湯,記得做女(回到未嫁時)的時候,媽咪久唔久就煲俾我飲,始終雞湯對女性好有益呢,
不過媽咪多數會用竹絲雞,而我 ...... 當然用新鮮肥美雞,雖然新鮮雞一定會俾竹絲雞多油份,但用新鮮雞感覺會香好多

其實初初買雞係想整雲吞雞,但又冇時間自己包雲吞,應該係話袁生唔得閒同我包至真,又唔係好想買現成,所以轉一轉材料,簡簡單單用金華火腿,冬菇同紅棗煲個靚雞湯,食前再加上娃娃菜,真是美味之極了


但最怕男人唔喜愛雞湯,仲要俾佢見到窩湯油淋淋咁,不過好彩袁生冇咩投訴,當然喇,因為我留左隻大雞脾俾佢 !

2013年9月25日 星期三

DIY狗狗乾洗粉

家中老狗BB最近經常皮膚癢癢,抓到有少許地方損了,真係心痛死我囉,而且某些地方變得好敏感,如果同佢沖涼又驚損既地方會痛痛,何況狗狗都唔可以日日沖涼,所以袁太就為左BB整左DIY乾洗粉,乾洗粉內仲加左薰衣草及茶樹油,這個配方有抗菌防敏作用,而且微量的香薰油是不會傷害狗狗,真係全天然DIY架 !



DIY狗狗乾洗粉
材料 : 粟粉<100g>,蘇打粉<1茶匙>,香薰油(薰衣草,茶樹)<10滴>



用法 :
-將乾洗粉灑在狗狗身上,按約1分鐘,然後先用直梳,後用針梳梳順狗毛便可




用乾洗粉梳順狗毛後的BB白左又乾淨左 !

2013年9月24日 星期二

薑蔥肉碎蠔仔生菜包 <附食譜>

袁生一向喜愛食蠔,平時我一向都係吉吉島買一大包廣島蠔回來,因廣島蠔大大隻,無論炆,炸,焗,炒 ...... 樣樣都得,仲唔會縮水添,不過今次我想整生菜包,如果用咁大隻蠔都幾麻煩,都係用蠔仔啱FEEL D,一向買蠔仔都會去魚檔,用籃裝住個D呢

不過有次自從買完回家煮,簡直腥到想嘔,自次就轉去超市買蠔仔,想不到超市的蠔仔比街市還要大隻,而且味道一D都唔腥,令到我呢位一向唔喜愛係超市買餸的人改觀了 !


2013年9月21日 星期六

我家狗狗BB - 12歲生日了

又到9月21日喇,大家知唔知今日係咩日子呢 ??? 

係我家狗狗BB的12歲生日,豬豬,生日快樂,錫BB錫到燶的我當然要為BB整晚餐兼蛋糕,不過由於今日要上班,所以只係整左一碟蝴蝶粉同一個蛋白蛋糕俾BB,希望個衰仔唔好介意

自從BB三個月大的時候買回家到現在,原來唔經唔覺已過了這麼多年,真係日日見住都唔覺大得咁快,BB的晚餐用了南瓜,翠玉瓜,肉碎來拌蝴蝶粉,味道清淡D,對年老狗狗健康都好D,而蛋糕方面只係簡簡單單的蛋白蛋糕,蛋糕面加上日本甜薯蒸好搓成的甜薯波,再加上骨頭型的迷你狗糧,骨頭型狗糧放上12粒係蛋糕面,代表BB的12歲生日 ! 

好味又健康的蝴蝶粉,BB食到唔停口


用日本甜薯配搭香滑的蛋白蛋糕,見BB食到咁,係咪真係咁好味呢 ???
 

唔需要5分鐘,已經全部KO晒,勁 !

咁重要的日子當然要影全家幅喇 !




2013年9月20日 星期五

杏汁雪耳芝麻湯丸 <附食譜>

大家中秋節過得高唔高興,開唔開心呢,我同袁生就平凡中度過,只係番左娘家吃飯,同奶奶老爺食下飯咁,都冇咩特別,因為袁生呢幾日好似想作病,都係早少少回家休息好D,始終家中還有老狗BB,無理由要BB一支公係屋企做悶悶豬,佢今年已經冇月餅食好可憐架喇,因為袁太唔得閒整,又唔記得左去訂狗狗月餅,所以 ...

好喇,唔知大家中秋的時候有冇食湯丸的習慣呢 ???


袁太年年都有食架,所以今年亦唔例外,仲記得上年整左南瓜湯丸同綠茶湯丸,袁生好似唔係太喜愛,都係整番普通的芝麻湯丸穩陣D,但又唔想用片糖或冰糖煮,太過單調,就決定整個杏汁底,再加潤潤的雪耳,好味道呢

袁生一向好喜愛杏汁,所以呢個甜品湯丸當然合格兼過關 !

2013年9月19日 星期四

冬菇蓮藕粒蒸肉餅 <附食譜>

今日又來整肉餅,冇他既,因為袁生想食,但用咩材料當然係由我來決定喇,平時多數用土魷,鹹蛋多,不過今次就想用比較爽口的材料

這個爽口材料就係 : ........ 蓮藕

用蓮藕來蒸肉餅,爽爽脆脆,口感都唔錯呢,另外肉餅仲加左好少好少份量的薑汁,食落有微微的薑味,都幾得意,其實每次整肉餅我都好驚剁的過程,因為每次都剁到手都殘廢,食飯的時候隻手因為之前剁肉餅的原故,可以話仲震過貓王,袁生次次都話我駛唔駛咁誇張,
但蒸肉餅如果唔自己剁又點會好味呢 !


2013年9月17日 星期二

鮑魚粟米鯊魚骨瘦肉湯 <附食譜>

假期的時候,多數同袁生落街食完早餐後,會去超市行下,行行吉吉島袁生發現有急凍鮑魚仔,就好開心跳下跳下攞左包俾我,叫我煲俾佢飲,要我家大爺親口開聲叫我煲湯真係好難得

 

另外媽咪之前俾左鯊魚骨我都未用完,鯊魚骨有消除腫瘤及防癌作用,而且加左鯊魚骨煲的湯,味道濃濃地,相當唔錯,雖然急凍鮑魚唔係咩貴價鮑,但煲出來的湯水真係一流架 !


其實只用簡簡單單的材料,例如 : 甘旬,粟米,瘦肉已經好好味了 !


椒椒菜甫蒸鯇魚 <附食譜>

永遠都係獨孤一味用薑蔥蒸,真係有點兒悶,其實蒸鯇魚可以有好多做法,今次就試下新嘗試,之前整涼瓜菜甫蛋的時候剩下少許菜甫,再加我近期至愛的紅椒,唔知點解最近好愛紅椒,無論炒飯,整小菜,炆煮,總知煮親咩都要加少少紅椒先安落,何況今次用來蒸魚有少許辣的味道,又有菜甫的鹹味,同鯇魚都夾得到


用鯇魚腩蒸完條魚仲係滑嘟嘟,連平時唔喜愛食魚,因怕魚多骨的袁生都大愛,仲有最緊要做法簡單,又唔需要好長時間烹調,好快就有得食 ! 


 今次蒸魚有紅椒的微辣,菜甫的鹹味~正~ 

2013年9月16日 星期一

雞絲粉卷 <附食譜>

剛過去的星期五 : 9月13日,即是黑色星期五,我會記得這一天

袁太當晚如想uplaod食譜,用完電腦之際當然要關機,點知又想起唔記得將某樣資料SAVE在USB內,又要再開機 ...但好常不想,居然入唔到Window,唔係呀話,電腦大哥,唔該唔好玩我好嗎 ? 我玩唔起架,因有好多公司file同食譜都係入面,試左幾次都開唔到的情況下要向袁生求救,終於 ...

袁生幫我將電腦還原之前模式就可以入到window,但出奇地慢,不過開到都好過冇,拿拿臨將緊要資料SAVE落外置HARD DISK到,今朝又試下開部電腦又瓜左柴,袁生幫我打俾朋友仔叫佢幫我整,因人地係電腦高手,整左大約三個幾鐘,終於令部電腦復活,真係唔該晒,要星期日放假都幫我整,如果唔係袁太都唔可以再同大家分享心得了 !


雞絲粉卷相信大家係酒樓食得多,但自己整又如何呢,用自己喜愛的餡料,可以做出一碟好味過酒樓的粉卷嗎 ???


終於俾我係觀塘區找到粉皮,買左1斤~承為八個大洋~


 
餡料超級豐富呢

2013年9月13日 星期五

涼拌海蜇手撕雞 <附食譜>

上回講過,水餃的湯底係用手撕雞剩下的雞殼,咁手撕雞肉呢 ???

今日就POST手撕雞的食譜同大家分享下先,之前某日,袁生唔知係邊度買左幾包即食海蜇回來,話用來送酒喎,咁我借一包用來整涼拌可以嗎 ???

 

其實呢碟涼拌手撕雞究竟健康定唔健康呢,健康係因為有蔬菜,有手撕雞肉,唔健康係因為涼拌調味料我用左蒸新鮮雞的雞汁去調較,不過袁生覺得味道好得,而且仲相當滿意添,今次整左一大碟,但兩個人都食得晒,因為太美味了 !


袁生買的即食海蜇


起肉的雞殼可用左其他用途,千其唔好掉左佢咁浪費

2013年9月10日 星期二

蟲草花冬菇鮮蝦豬肉餃 - 配金華火腿胡椒雞湯 <附食譜>

剛過去的星期天,袁太晨咁早八點醒左又訓唔番,突然又想包餃餃做晚餐,一於落街市買定材料,不過又要諗下今次用咩材料好呢 ???

以前多數都用木耳同豬肉,袁生當然唔太喜愛,因為有木耳,永遠有益的材料袁生多數唔多好,所以今次就決定用 ...... 冬菇,鮮蝦,豬肉,另外再加多一樣材料

就係 ... 蟲草花


蟲草花大家多數都會用作煲湯,炒或蒸,唔知有沒有人試過用來包水餃呢 ???,

今次袁太只包左22隻,每次食水餃我都好講究究竟用咩湯底好,由於晚餐除左水餃外,還有手撕雞做晚餐,一於用手撕雞剩下的雞殼煲鍋湯底吧,香濃的雞湯再配上自家製餃餃,當然係相當美味喇 !


從未試過用蟲草花做水餃餡料,唔知味道突唔突別呢 ???


每隻水餃都脹卜卜,好可愛呢


上次整手撕雞的時候用剩的雞殼,可以用來煲雞湯

2013年9月7日 星期六

窩心的一碗麵

今日又OT,又成八點幾先收工,日日OT真係人都顛,已經疲倦到唔想煮飯了,求求其其食個公仔麵算數,但番到屋企已經唔想郁,當時由於袁生話未肚餓,所以我就選擇眠一眠,諗住訓30分鐘先起身煮野食,點知 ...

袁生叫我起身的時候已是晚上差不多10:30,我立刻彈起身,大叫 ~死喇,咁夜喇,我而家去煮麵,好快有得食架喇~

袁生話 : 唔駛喇,唔駛煮喇

初時以為袁生自己落街食左野所以先唔駛我煮,但原來 ...

飯枱上有一碗麵,麵上有榨菜,八爪魚腸仔同心型太陽蛋,原來袁生入廚房煮俾我食,雖然只係簡簡單單的一碗麵,但我已經覺得好窩心,而且袁生將腸仔整成八爪魚型,太陽蛋整成心型,真係好有心思呢 ! 



另外袁生仲買左我至愛的紫米紅豆奶茶俾我,多謝老公


2013年9月6日 星期五

蒜蓉蘆筍炒蜆肉 <附食譜>

雖然還未習慣這個新平台,但好慶幸已慢慢上手當中,不過仍然好掛住Yahoo Blog的六百多個舊post,唔知幾時先可以完全搬晒過黎呢 ???

擔心中 ...... >_<

今日又成九點幾先收工,快快手跑去巴士站番超市睇下仲有冇材料買,因袁生話想食住家飯,雖然番到屋企附近超市已是晚上10點多,但好好彩仲有野買,居然仲有大大粒的急凍蜆肉,袁生平時就至喜愛食海鮮類,本應想炒西蘭花既,但醒起雪櫃好似仲有蘆筍,唔煮埋的話真係唔知幾時先可以煮,簡簡單單用蒜蓉炒,話咁快就有得食喇 !


只有蜆肉同蘆筍,簡簡單單加蒜蓉就可以了

2013年9月3日 星期二

避風塘雞翼 <附食譜>

~唉~今日又遲左放工,又買唔到餸番屋企煮飯仔,打俾已放工番左屋企的袁生問佢落唔落街食,又話要睇電視唔想落街,叫我買外賣番去,頂 ... 你唔係唔知我最憎買外賣,我唔賣

突然想起前幾日同百寶箱(雪櫃)入左貨,有足夠材料可以煮個簡單晚餐,之前係吉吉島買左大大隻急凍雞翼,袁生最近好似食左屎鬼死咁喜愛食炸蒜,一於就黎個避風塘雞翼俾佢嘆下


半煎炸的雞翼 + 香辣惹味的避風塘料,真係無得頂,無論送飯送酒都一流呢 !


避風塘料只有紅椒,指天椒同蒜頭,究竟正唔正宗呢 ???

2013年9月2日 星期一

楊枝甘露 <附食譜>

今日係星期一,又係袁太廚房的甜品日,每當星期一我就一定會整甜品慢慢嘆,點解 ??? 大家知喇,由於星期一係最冇心機番工的日子,如果唔食下甜野,點可以有命橕到星期五呢,好似講到誇張左少少,而今日袁太選擇"楊枝甘露",今次係第二次整,之前係Yahoo Blog到post過一次,不過可惜上次芒果有點兒酸,所以決定用水仙芒整,水仙芒又甜又多汁,簡直一流

整好之後雪到凍一凍,呢種天氣下食簡直透心涼,不過 ... 袁太又唔記得左一件事,,上次同自己講,如果下次再整的話一定要加埋雪糕,但到頭來依然都係唔記得 ! 


2013年9月1日 星期日

好唔開心 ...

今日係9月1日,除左學生哥準備開學,亦都係袁生袁太拍拖14週年的日子

雖然結左婚,但婚後每年都依舊會慶祝,不過今年就 ...

我知袁生最近因為工作上的問題導致心情唔好多,所以我都諗住後補慶祝日子

係屋企簡簡單單煮餐家常便飯,煲個老火湯俾袁生下火

我已經成個幾星期冇煲湯俾佢飲喇,點知下午時份我同袁生講落街買餸

佢就好大聲說"又煮,落街食喇",咁唔煮都煲啖湯俾你飲喇

"又煲,我唔飲呀",頂 ... 究竟我做錯D咩 ???

我知你心情唔好,但都唔駛搵我出氣掛,我當時真係好傷心

仲不經不覺喊左出來,我就一支箭咁出左門口,因為我覺得我需要冷靜

冷靜完番屋企,袁生依然係咁,跟住大家嘈左場大交

後來發覺原來袁生根本唔記得今日係咩日子,但當佢知道後都冇咩表示

袁太其實唔太想係呢個平台分享太私人的事,但無奈我真係要搵地方發洩

希望大家唔好見怪

到現在我同袁生都未同大家講過一句說話,估唔到今年的週年紀念會過得咁特別

下個月就係袁生袁太結婚三週年,唔知會唔會有四,五,六,七,八年的出現 ???


要大家係度睇袁太發牢騷,真係唔好意思 !


日式便當 <蔬菜竹輪卷 / 蒜蓉炒雜菜 / 日式醬油雞扒食譜>

研究左成大半晚,終於開始慢慢摸索到Blogspot這個新平台的做法,希望唔需要好長時間就可以上手喇,不過最擔心的莫過於而家仲係,Yahoo Blog的六百多個post,唔知搬家的時候會唔會造成大混亂呢 ???

好喇 ! 袁太係新平台第一個食譜就大玩便當誘惑,係時熱時落雨的天氣下,真係冇咩心情諗食咩,何況我知大家最近都為左搬家的事而冇晒心情兼冇晒胃口,所以晚餐都選擇求求其其吧了,不過求其得來又要美觀些少,咁就整左個便當做晚餐,我同袁生一人一個便當,都幾得意架 !


日式便當有 : 蔬菜竹輪卷 / 蒜蓉炒雜菜 / 日式醬油雞扒 / 白飯

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......