通告

由於Yahoo Blog將於12月關閉了


袁太Blog會於 : http://elanie-kitchen.blogspot.hk/  繼續操作



另外袁太在facebook開了新page

大家可到fanpage like左先，可以大家保持聯繫

因我唔想同大家失散，大家一定要記住我呀 ~~~


https://www.facebook.com/Elaineskitchen

新平台，新開始

突如其來知道Yahoo blog要close了

跌落谷底的心情之下仍然要找新地方搬家

袁太在facebook開左新page之餘

仲係blogspot開左新平台，雖然感覺總是怪怪的

畢竟在Yahoo blog已有6年多時間了

亦同好多Blog友分享過不少生活點滴，烹飪知識及問題

不過最擔心的是一向在Yahoo blog的blog友們

袁太驚驚會同大家失去聯絡 >_<

希望大家會跟住我來到這個新平台，繼續支持袁太喎

而我亦會再這個新平台同大家再分享日常生活點滴

當然唔少得最重要的烹飪心得 ^^

關閉 ???

點解 ... 突然話關閉就關閉 ???

袁太寫左Blog咁多年，已經成為日常生活必做的事

何況係Blog識到一些志同道合的朋友仔，我真係唔想同大家分開

我總覺得就算搬左去新平台，留言同朋友統統都會不見了，現在心情已跌落谷底，灰爆！

梅菜粟米煎肉餅 <附食譜>

肉餅呢樣家常菜一向係我同袁生的至愛，無論土魷蒸，鹹魚蒸，鹹蛋蒸 ... 都一樣無任歡迎，
今次就到梅菜肉餅出埸，記得以前媽媽每當整梅菜肉餅都會再另外加冬菇，味道真係好香無得頂

但人越大反而愛食香口食物，所以不再做梅菜蒸肉餅，改做梅菜 ... 煎 .... 肉餅，再加粟米粒，梅菜的鹹味 + 粟米的甜味，~~~~~oh~~~~~ very good la，一個個餅形肉餅送飯一流

其實肉餅除左袁太以上所講的材料做法之外，唔知大家仲有冇特別的肉餅可以介紹俾袁太試下呢 ??? 又或者肉餅除左蒸，煎，炸，仲有冇其他特別的做法呢 ???

袁生傑作

袁太呢幾日簡直頭痛都不得了，所以唔係好想出食譜，就決定Post其他類別話題

唔知大家第一眼睇張相有沒有特別感覺呢 ???

我的意思係大家覺得兩幅圖似唔似樣呢，大家千其唔好以為係袁太畫，我邊有可能畫得咁靚，其實呢幅圖係袁生畫架，袁生繪圖一向都有番咁上下，好似袁太廚房Blog咁，個Blog的icon圖同背景的袁太Q版圖都係出自袁生手筆

因為我同袁生都喜愛BB呢張相，所以佢放假的時候見得閒，只係用左約2小時就畫好了，袁生好滿意，而我亦都好滿意，我會俾200分，100分係袁生畫功，100分係相片中的模特兒BB喇，相中的BB俾我用毛巾綁住對手，大家唔好覺得係袁太虐待BB喎，係因為BB隻眼發炎，要滴眼藥水，但又唔聽話，成日想掂隻眼仔，所以我咪用毛巾綁住隻手囉

袁生知我會Post張相上Blog，叫我問下其他Blog友覺得佢畫呢幅圖靚唔靚，似唔似喎 !

芒果吞拿魚麥包三文治 <附食譜>

平時番工我唔多會食早餐，但放假的日子我一定會盡量早些少起身享受早餐，大家係咪覺得我好怪呢 ???

一般放假日子，我會九點鐘起床落街買早餐，但今日就自己整三文治，因為 ... 袁生今日有best friend結婚，要做兄弟幫下手，所以佢一早出左門口，我今日就可以好休閒享受一日自由自在，唔駛煮飯的日子

講開早餐，我永遠至愛吞拿魚三文治，買完材料後去超市買狗糧的時候，見到有大大個水仙芒，個水仙芒好似向我揮手咁 "我好甜架，買我番去喇"，見外表橙橙地真係好似好甜咁，突然想到如果將芒果同吞拿魚一齊夾係三文治入面，唔知味道可唔可以夾得到呢 ???

一於買一個番去試下先，平時我好少會去超市買生果，始終覺得一定冇街市咁靚，但呢個水仙芒真係好掂，我一路切一路偷食，真係好鬼死甜，又多汁，之前總覺得芒果三文治配雞絲會夾D，但原來同吞拿魚都幾夾，酸酸甜甜咁，當早餐食好開胃 !

魚肉釀雞脾菇 <附食譜>

最近愛上了雞脾菇，無論炒，煮湯或用來做火鍋都喜愛，但今次我會用魚肉釀，通常只會做魚肉釀豆腐，魚肉釀豆卜等等 ... 但轉做菇菇的話，我相信味道都應該幾特別，其實簡簡單單釀好後乾煎已經好好味，但我又想食D蔬菜，所以 ...

平時袁太廚房唔會見到有韮菜花的出現，因為 ... 袁生唔愛，但我偏偏要買一扎回來，大不了袁生唔食我咪自己食晒佢，將炒好的韮菜花墊底就可以了

袁生食飯的時候問我，點解妳最近成日煮D我唔太好的食物呢 ???

其實都冇咩點解，主要原因咪就係想迫你食多D你唔喜愛的食物，雖然袁生用左斜視的目光望住我，但好乖食左好多韮菜花，抵錫兼抵讚 !

涼瓜菜脯煎蛋 <附食譜>

"涼瓜" - 有人愛，亦有人不愛，唔知大家屬於邊種呢 ???

而袁太就企係愛呢邊，袁生當然係同我攪對抗，企係不愛個邊，其實大部份人唔喜愛食涼瓜的原因都係怕苦姐，只要行出第一步，就會覺得涼瓜其實味道唔錯，不過話雖如此，呢幾句說話我曾經同袁生講過，袁生當然係唔理我喇，仲同我講左一大堆佢所謂的道理

事緣係咁，大約上個月我想整涼瓜做晚餐，袁生一口拒絕"我唔食涼瓜，咁鬼苦，妳千萬不要煮，就算煮左我都唔會食"，大家係咪覺得袁生好鬼串，好鬼賤格呢 ???

當我講，你唔試又點知唔好味呢，點知袁生一句突埋黎，"榴槤夠好味喇，又唔見妳食"，我頂 ... 真係下句都唔知可以講咩好

今日行經街市見涼瓜大大個，就忍唔住買左一個回家整煎蛋做晚餐，食飯時候，我冇提過煎蛋入面有涼瓜，袁生亦都食唔出，到食完之際，我先同袁生開估入面有涼瓜架，但袁生居然冇咩反應，仲話味道唔錯，唔知今次的涼瓜煎蛋攻略可唔可以令到袁生對涼瓜改觀呢 ???

自家製茄汁豆 <附食譜>

唔知大家兒時喜唔喜愛食茄汁豆呢 ???

仲記得以前細路的時候，媽咪多數會買"是蜜味"茄汁豆回來加餸，簡簡單單蒸熱佢都可以送到幾碗飯，自從唔知幾多年前喜愛入廚房之後，就同罐頭好少接觸了(除左午餐肉同五香肉丁之外)，何況今朝訓醒突然痴左條筋想食茄汁豆，大家可能會想，超市一罐細size既十蚊都唔駛，突然想食都好方便(因為袁生都係咁諗)

但大家估錯了，袁太會自家製茄汁豆，因為廚房有黃豆，用來做茄汁豆就啱晒，當朝早番完奶奶到食飯之後，下午時候回到街市買餸，袁生打來叫我記得買茄汁豆，我話買咩呀，我今朝浸左黃豆自己整喎，點知電話中的袁生傳來幾句話 : "黐左線咩，超市有罐頭唔買，咁辛苦自己整，傻架"

超 ... 你咪理喇，而家係我整姐，又唔係叫你幫手整，咁多聲氣做咩呢

自家製茄汁豆的材料其實好簡單

做法亦都唔太難

獨愛 <附香蕉糕食譜> - 簡單免蒸版

香蕉糕係我由細到大的至愛，但每次往往都只會出街買，其實一直想知自己整香蕉糕會否好因難呢 ??? 係偶然情況下發現原來屋企的其中一本烹飪書有香蕉糕的食譜，再加上廚房有晒所有材料，所以急不及待立即開工，最初以為會好難整，但好好彩俾我想像中容易

不過好可惜係冇人同我做白老鼠，因袁生唔多喜愛食香蕉糕，唉 ... 咁唯有自己做白老鼠，嘩 ... 嘩 ... 好味道呀，雖然係第一次整，但有晒香蕉糕的甜味同軟軟地的感覺

我將香蕉糕切成比較細粒，一啖一個，等我下次整多少少份量，番去俾爹地媽咪試下先，因爹地都係一個喜愛食香蕉糕的人，"正"

薑汁豬頸肉黃薑炒飯 <附食譜>

前日剩左冷飯放係雪櫃，所以今晚就簡簡單單整左炒飯做晚餐，炒飯呢樣野可以話好簡單，亦都可以話好複雜，炒得濕唔好食，最好炒得乾身少少，我就最喜愛，由細到大每當食炒飯我一定要加雜豆，而炒飯就一定會用雞蛋

我今次依然會用雜豆，不過就唔用雞蛋，因我係整黃薑飯炒底，再加煙肉碎，少許菜，仲有爽口彈牙的薑汁焗豬頸肉粒一齊炒，一大大碗炒飯做晚餐已經好滿足，我同袁生一人一大碗"飽飽"

當我想問袁生味道如何之際，個衰佬居然話好似炒得唔夠乾身，唔夠乾身 ??? 我已經炒到粒粒分明，唔黐鑊囉喎，何況我覺得食落口都唔係濕，都唔知係袁生要求高定係我唔喜愛人家對我煮的食物有投訴呢 ???

雜錦串燒 <附食譜>

3號，8號，再轉3號，唔知大家今次有冇再俾天文台玩到氹氹轉呢 ???

當今朝七點幾起身的時候，用手機上網睇下最新風暴消息先，其實最主要都係想知道8號係咪仍然生效，知道仲係8號，當然繼續訓，訓到大約十點又醒左，依然仲係8號，心諗應該多數唔駛番工掛，就好開心同袁生落街食早餐，點知番到屋企睇電視居然話天文台會於下午兩點前後會改發3號，嘩 ... 講到咁尷尬

咁究竟係兩點前 ??? 定係兩點後呀 ??? 好大分別喎，點知點幾鐘就轉左3號，冇計喇，我同袁生都要上班，仲諗住係屋企可以休息下，咁夜晚餐飯點算呢 ???

 

放工番到去街市又收晒，又唔想食杯麵，所以就打俾已放工灰在家的袁生幫忙睇下廚房或者雪櫃有咩可以煮，點知都係得煙肉，雞翼，蘆筍，冬菇，豆腐，急凍秋刀魚，菠蘿等等 ...

呢幾樣材料究竟可以煮D咩呢 ??? 係諗唔到的情況下，最簡單就係整串燒，雖然全部都係用雪櫃的剩餘物資，但袁生見到我可以轉化為好味的串燒，真係服到我呢個老婆五體投地，大家可能會問，晚餐只係食申燒會唔會唔夠飽呀，我可以同大家講"唔會"，其實我一整都整左十幾串，兩個人食已經好夠，夠晒飽了 !

雜錦串燒(六小串)包括有 :
鹽燒冬菇，黑胡椒豆腐，煙肉蘆筍卷，椒鹽燒雞翼，醬油燒秋刀魚，烤菠蘿


事前準備 : 串燒竹籤用熱水煮一煮先好用

照燒雞扒豬骨湯底拉麵 <附食譜>

平日放工想煮飯的時候，一般都只會煮普通或簡單的家常菜，因始終時間有限，所以如果想煮比較長時間的食物，當然要留番放假的日子先可以實行，而放假的是日晚餐係"豬骨湯底拉麵"

大家係咪想破口大罵，袁太，食拉麵隨時都可以食喇，需唔需要等到放假先食，大家可以冷靜少少聽我講埋先，我知食拉麵係好簡單，但如果我話湯底係由自己煮呢，其實一般食拉麵通常都會買現成回來，自己去熬製湯底真係想都冇想過，但袁生成日話超市買回來一D都唔好味，又話最近咁熱夜晚都唔想食飯，袁生講到咁，大家話試問我點可以再買現成拉麵的湯底回來呢 ??? 所以最佳方法就係自己煮 ...

拉麵湯底首選一定係豬骨味，袁太足足煮左6小時，所以呢碗豬骨湯的味道濃郁，簡直超級好味

再加上大家都喜愛的雞扒，拉麵配菜我一定會選擇雞蛋，木耳同粟米粒，再加上雪櫃仲有竹笛，即係獅子狗

一碗望上去簡簡單單的拉麵，其實真係花左唔少時間去烹調，袁太經常覺得烹飪係一種興趣同樂趣，唔係想俾人知我煮得一手好菜，而係想身邊的人食得開心，健康同滿足，我就會開心到爆燈了 !

杞子圓肉菊花茶 <附食譜>

最近唔知係咪天氣太熱呢 ???

出街做事的時候都覺得暈暈地，何況有時出入一冷一熱的地方，身體差D都好易中招，唔係喉嚨痛就好似訓極都唔夠，唔止係我，就連袁生都有少許唔舒服，所以我就焗左菊花茶飲下，再加有益的圓肉同杞子，唔駛問一定好味

不過今次就唔係用煲的方法，而係簡簡單單咁焗出味，早一日浸係熱水內，放涼入樽放雪櫃就可，呢個菊花茶足足焗左12小時

我就選擇早晚各一杯，袁生個份我就入樽雪凍佢俾佢帶番公司慢慢飲，唔駛好耐袁生已經打俾我話已經飲晒了，真係多謝捧場

係咁炎熱的天氣之下，日日都出咁多汗，得閒整有益的飲品保護身體，好過飲咁多汽水喇，大家話係咪 ???

香芹絲蒸桂花魚卷 <附食譜>

唔知大家有沒有發覺袁太最近變左一個蘆筍怪，無論之前的蒸排骨，又或者炒菜，都喜愛用蘆筍，最近已經好少食菜心或者生菜了，好似今日咁，又黎蘆筍做晚餐，不過唔係炒，唔係墊底，而係用來做卷卷

最初想整豬肉卷，但之前已經買左雞扒，所以 ... 唔食咁多肉，就不如用袁生至愛的材料，係桂花魚，去魚檔叫叔叔幫我起肉兼切片，真係幫我慳左唔少功夫，唔該晒 ^v^

但咁細塊魚片再要卷其他材料，都咪話唔辛苦，企左係廚房滴晒汗，先整左八舊魚卷咁大把 !

魚卷裡面仲有蘆筍同冬菇，再用芹菜絲綁住魚卷，清清地幾好味架，芹菜的味道同魚都幾夾，最緊要袁生喜愛就OK !

豉汁蒸排骨 <附食譜>

好耐都冇整過蒸排骨了，所以 ...

平時袁太比較喜愛食梅子蒸排骨，因為媽咪最喜愛這種整法，所以真係由係食到大，但最近真係好少lu，點解 ??? 平時工作又忙，已經好耐冇番娘家食飯了，何況袁生一向唔太喜愛酸味味的餸，所以梅子呀，檸檬呀呢類食材好少會係袁太廚房出現

其實蒸排骨最好味同最簡單就一定係用豉汁，以前的我會用蒜蓉，豆豉回家自己剁，但我最近上網好多Blog友都說大孖醬園的豆豉醬好味，咁啱前幾日去觀塘做野，當然去大孖到逛一逛，由於趕住做野的關係，所以去到只係主攻蒜蓉豆豉醬，對我來說一樽太過大了，因唔係成日煮，好在可以買細細包，細包裝都可以煮好多餐

另外以前會買急凍排骨，但今次就買新鮮既，始終新鮮一定會比急凍好，仲有加埋至愛的蘆筍墊底

好喇，係時候等袁太講下對大孖醬園的感覺，講真我都覺得大孖醬園的豆豉醬味道真係唔錯，好味過超市買個幾款大型牌子，等我下次再試下大孖的其他醬料先 !

芝士蔬菜焗菇菇 <附食譜>

最近天氣日日都落大雨，雖然落雨冇咁熱，有少少涼風，但放工番到屋企都唔想煮飯，如果仲要我係廚房入面進行煎炒煮炸的活動，我一定會死，但唔煮又冇飯開，因為我係一個唔喜愛買外賣的人，所以就用簡單的烹調方法去製作晚餐，大家估唔估到係咩呢 ???

時間到 ... 答案係 ... 焗爐

只要將有關材料處理好，放入焗爐開製就可以，夏天的最好食材就係蔬菜，唔知大家的男朋友或者老公喜唔喜愛食蔬菜呢 ??? 我家的袁生同蔬菜都唔知係咪有仇，叫佢食多D有益有營養的蔬菜真係好難，仲難過叫小朋友食，所以今次就買左蔬菜，再加埋菇菇一齊焗

另外秘密武器係芝士，因為袁生喜愛芝士，希望有芝士的帶動下袁生會食多少少蔬菜 !

棉花雞...翼 <附雞翼去骨法及食譜>

突然間好想食釀雞翼，至愛當然係糯米釀雞翼，不過最衰袁生唔食糯米，但以前整的時候釀過蝦膠，又唔想重複嘗試，後來想想不如釀蔬菜，即係青瓜，甘旬之類呢，點知袁生又話好Dry，唉 ... 點解佢咁鬼麻煩架

咁究竟釀咩好呢 ???

思前想後突然醒起袁生平時喜愛食棉花雞，如果將做法稍為作少少更改，即係將魚肚同冬菇釀入去骨的雞翼裡面，唔知係有創意定係古怪

至於雞翼去骨的重要任務就要交俾袁生負責，講真袁生去骨真係叻過我，唔駛15分鐘已經整到每隻雞翼都靚仔晒，真係麻煩晒袁生囉，Thank You !

整釀雞翼之前，就當然要準備同雞翼去骨喇，材料有8隻已解凍的靚雞翼 + 廚房剪

袁生的雞翼去骨示範圖

Step 1 ~ 2 : 用廚房剪將雞翼連接的關節位剪開

Step 3 : 將雞翼打直，用手指將雞肉向下反及退下來

Step 4 : 再用廚房剪將雞骨附近的雞肉剪開

Step 5 : 最後只要轉動雞翼骨數次，雞翼骨便會輕易脫落

唔駛15分鐘袁生就幫我攪掂8隻雞翼了，隻隻都靚靚仔仔，辛苦晒，抵錫 !