冬瓜鯽魚排骨湯

袁生膝頸最近又開始痛，做老婆既梗係要上網search下資料喇

發覺原來膝頭痛多數係肌肉勞損多，咁應該係袁生以前年青的時候跑步所致

或者可能勞損左自己唔知，總知一句講晒，三十幾歲人七十幾歲身體，唉 ...

袁太仲發覺原來膝頭痛有好多食物唔可以食架

例如 : 貝殼類，菇菌類，蟹，龍蝦，菠菜，大豆芽，紫菜，燒鴨，燒鵝，內臟等等 ...

最好就食多d纖維

例如 : 西芹，西蘭花，花膠，海參，薯仔，蘿蔔，蕃茄都有益架

另外紅酒，啤酒就一定唔可以飲

~呀~用魚湯煲湯都好有效架，所以就去左街市買條鯽魚煲湯

再加冬瓜，排骨一齊煲，碗湯煲到奶白色，好香魚味，落少少鹽就已經好夠味

初時仲驚袁生唔鐘意，因為驚佢會話腥

點知袁生都話好好飲，唔知飲左啖湯之後，隻腳會唔會好d呢 ???



材料 : 冬瓜<1斤>，鯽魚<1條>，排骨<$20>，生，熟薏米<少許>，蜜棗<2粒>

冬瓜去籽連皮切件排骨飛水，薏米洗淨備用

>鯽魚洗淨，燒紅鑊，爆香薑片，下鯽魚煎至兩面金黃色，加入適量熱水煮滾至奶白色

煲內放入適量水及蜜棗，待滾後加入做法<2>鯽魚連湯，排骨，生，熟薏米用大火煲30分鐘

再加入冬瓜煮滾，轉慢火煲2小時，下少許鹽調味

飲用時隔去湯渣即可

燒汁三文魚豬肉串燒

好耐冇整過串燒喇，不過整之前梗係要問下袁生先

袁生話 : 想食咪整囉，不過妳放工番到黎都夜囉喎

唔緊要喇，如果妳唔驚夜開飯的話^v^

初時諗住整雞肉串燒，但袁生話鐘意豬肉多d喎，OK，咁就整豬肉

見冰箱仲有幾條三文魚柳，一於叫袁生攞出黎幫我解凍先

一舊豬肉，一舊三文魚，咁就整左一串串三文魚豬肉串燒

而汁料方面就用左燒汁，樽燒汁係吉吉島買既，真係好好味架

袁太整左10串，好味到兩個人都唔夠食，而且做法都好簡單

大家有時間都可以試下架 !

椰子栗子圓肉雞湯

夏天咁熱的天氣，煲下椰子湯都唔錯架，甜甜地夠晒潤

 

不過如果用椰子煲湯梗係一定要加埋雞喇

袁太除左例牌買雞腳外，雞檔嬸嬸話用埋雞胸殼，d湯會好好味個喎，好喇 ! 

一於試下用雞胸殼煲湯，另外材料就有 : 栗子，圓肉，幾粒螺頭，蜜棗

今次個湯係冇落其他肉類，反而覺得好好味，椰子圓肉好香，雞味好濃

真係一試就愛上了

就連袁生唔鐘意甜湯的人都覺得好味道，仲飲左兩大碗咁多添 !

材料 : 椰子<1個>，栗子<16粒>，螺頭<4粒>，圓肉<12粒>，雞腳<4隻>，雞胸殼<1隻>，蜜棗<2粒>

椰子切件，雞胸殼洗淨飛水備用

雞腳去甲後飛水，放入冰水內備用

煲內放入適量水及蜜棗，待滾後加入栗子，圓肉，螺頭用大火煲30分鐘

再加入椰子，雞胸殼，雞腳煲30分鐘後轉慢火煲2小時，下少許鹽調味即可

BB端午節有粽食

端午節我地要食粽，咁狗狗呢 ??? 

原來狗狗都有粽架，不過係雞肉整的小粽

袁生係日式超市見到就即刻買俾BB，而且仲有一個公仔送添

BB見到一定好開心既姐

好喇 ! 到左端午節呢日，BB獨家享用的小粽子終於可以開，就由袁生負責開 !

BB都不知幾鐘意食，不過今次就俾住幾粒佢食先，費時食得多又嘔 !

袁生買左冰條 ^v^

~好熱~好熱~救命呀，夏天除左飲凍飲之外，其實食冰條係一個唔錯的選擇

今日袁生食lunch的時候，附近的日式超市由於狗糧有折扣的關係

就打俾袁太問需唔需要買狗糧俾BB

當然要喇，不過唔好買咁多，因為都幾重，放工搭車番屋企就會拎得好辛苦

點知袁太番到屋企就見到袁生買左好多狗糧，真係夠BB食幾個月囉

不過袁生除左買狗糧，仲買左幾包冰條回來

好囉，屋企有冰條，夜晚就唔駛熱得咁淒涼，快快趣放係冰箱

今晚就有得食喇 !
 

鮑汁煮雞

最近真係熱到就快溶喇，攪到都冇心情upload blog

以前袁太都唔係咁怕熱，但今年真係頂唔順，唔好話出街

係屋企都熱到係咁出汗，呢個夏天都唔知點樣過，但部電腦積落咁多食譜

點都要拿拿臨post晒上黎先安落

某一日袁太想食雞，但又唔想去燒味店買現成雞

所以就去左雞檔買左半隻雞，買左番屋企先諗下點整

好喇 ! 買左番去究竟點處置隻雞好呢 ???

又係時候打開雪櫃搵靈感，見到有支鮑魚汁

係喎 ! 之前舊個支用晒，見超市特價買左支番黎都未開過，咁一於用黎煮鮑汁雞

呢個鮑汁雞做法好簡單，而且味道都唔差架

不過由於袁太唔太識斬雞，所以隻雞俾我斬到好似碎屍 !

白汁洋蔥豬扒

屋企廚房每時每刻都有幾罐金竇湯看門口

因有時放工放的原故，但又唔想落街食，開罐金寶湯就咩問題都解決了

何況最近袁太成日要去醫院，來來回回番到屋企都已經係夜深

又想煮餐飯俾袁生食，唔通日日都叫外賣咩 ???

就算袁生肯，我都唔肯，所以就選擇煮比較快捷的餸菜

而百寶箱(雪櫃)有豬扒，只要簡簡單單買個洋蔥，本菇，再加上金寶湯

唔需要好長時間已經整好呢碟"白汁洋蔥豬扒"

以前整豬扒多數整洋蔥豬扒，袁生都話袁太整得味道比較淡

反而今次的白汁豬扒，袁生相當滿意 !

XO醬海鮮炒飯

最近袁生袁太日日都去醫院探袁生妹妹，妹妹今次又要做開腦手術

今次已是第三次了，但眼見妹妹今次真係好辛苦

當做完手術推入病房個刻

雖然大家都知道今次手術好成功，但袁生都擔心到流眼淚了

由於病房每次只可以兩個人入去，所以奶奶同袁生入去先，然後到我

當我入去探妹妹的時候，妹妹握住我隻手不停喊

話傷口好痛，又擔心自己的小朋友，又說唔想奶奶同哥哥(袁生)擔心

所以只可以向我傾訴，此刻連我都眼濕濕

只可以同妹妹講，手術做完休息多d就冇事，唔好咁擔心

所以呢幾日成日去醫院，都冇咩時間煮飯

諗住屋企有咩材料就煮咩食就算

好好彩雪櫃有冷飯，帶子，蝦仁同鰻魚

一於用來炒飯就最好不過，再加上袁生至愛的XO醬

嘩 ... 好惹味，希望呢碟炒飯可拎到袁生心情好番些少 !

鮑汁海參魚肚炆鴨腳 <附食譜>

袁太的感冒差唔多好得七七八八，所以今晚有精神post食譜，好似好耐冇炆過鴨腳，袁生平時好鬼鐘意食鴨腳，其實炆鴨腳最好就係用冬菇，但好可惜袁生而家暫時唔可以食菇菌類，
所以唯有轉用其他材料，都係個句，屋企有咩就用咩，雪櫃有海參，魚肚，就用佢地做材料，再去街市買埋小棠菜

而汁料方面，梗係用鮑汁，蠔油炆1小時就完成，真係好味道呢 !

上海肴肉 <附食譜>

記得上次母親節用屋企人出去食飯的時候，食左一道肴肉的冷盤，袁生話幾好食，既然袁生話味道唔錯，袁太梗係要搵日係屋企試下整

材料好簡單，只需要鹹豬手，雞湯，魚膠粉就可以

雖然唔知出面食個d做法係點，但味道都幾似，而袁生個評語就係 : 味道唔錯，但冇出面食既咁實，話始終都係出面食好味d

其實係因為做法根本唔同，定係雪的時間唔夠長所致呢 ???

節瓜螺頭雞腳排骨湯

冰箱有螺頭，決定用黎煲湯，不過例牌都係用節瓜

因為袁生至愛的就係節瓜

肉類方面當然用排骨喇，永遠覺得用排骨煲湯係最好味既

除左用排骨外，絕對唔少得的其中一樣材料~雞腳~

~煲呀~煲呀~煲左兩個多小時，一定夠晒火喉

呢個湯真係有好多湯渣，有節瓜，螺頭，排骨同雞腳

只係食湯渣已經飽飽了 !



材料 : 節瓜<2個>，螺頭<6粒>，雞腳<4隻>，排骨<$25>，南北杏<少許>，蜜棗<2粒>

排骨，螺頭出水，節瓜去皮切大件

雞腳去甲後出水，放入冰水備用

煲內放入適量水及蜜棗，南北杏，待滾後加入排骨，螺頭用大火煲30分鐘

再加入節瓜煲滾，再加入雞腳煲1 1/2小時，最後下少許鹽調味即可

蕃茄沙樂美腸水牛芝士Pizza

好耐冇係屋企整pizza喇，袁生某日放工係太古買左包辣味沙樂美腸

見幾平咁就買左包，放左係雪櫃幾日，都唔知用黎檀咩好 ???

袁太見今日係屋企無無聊聊好得得閒，咁就不如整pizza做晚餐

以前袁太一定會買現成pizza皮，但廚房仲有高筋麵粉，就決定自己搓pizza皮

就連茄醬都自己整，而餡料就當然用袁生買番黎的沙樂美腸喇

再加埋煙肉同水牛芝士，點解會用水牛芝士 ???

因為有時睇烹飪節目，好多時都係用水牛芝士焗pizza，所以就想試下係距真係咁好味


今次袁太自製pizza好成功，不過水牛芝士好似唔係好夠，但味道真係very good

燕麥百花蒸豆腐

得閒食下豆腐清清地都唔錯，不過要袁生食豆腐都幾難

因為袁生係一個食肉獸，簡直係無肉不歡

所以就用袁生喜愛的蝦膠做材料，用來蒸豆腐都最好了

另外再加上燕麥，健健康康

唔講都唔知蝦膠入面加左料，起碼袁生食左都唔知

大家知喇，食煙的人士一定好抗拒健康有益的食物

當豆腐蒸好後加上豉油，wow ... ，簡直好味到呢 ......

咁好味的百花蒸豆腐，袁生又點會唔喜愛呢 ???

京蔥蒜蓉魚露焗雞扒

冰箱有兩塊雞扒，決定用來做晚餐，最初想簡簡單單乾煎雞扒

但平時袁太好驚驚煎雞扒，因經常煎到雞皮燶晒，入面還是生的

所以out左用煎的方法，咁不如蒸 ??? 又唔得喎，因為除左雞扒外

另外一樣餸都係蒸，無理由兩個餸都係用同一種做法

費時又俾袁生投訴喇

所以唯一方法就係用焗爐，袁太好喜愛京蔥味，一定要加埋京蔥一齊焗先得

唔記得以前聽咩人講過，用魚露醃雞扒好好味喎，就決定試一試

個雞扒足足焗左40分鐘，但依然滑嘟嘟

不過魚露味就唔太突出，最緊要係袁生話用焗的方法去整雞扒

雞扒好夠味，又多汁，滑滑的，仲叫我下次整多次俾佢食添 !

川貝海底椰瘦肉湯

究竟幾時先會病好 ???

已經睇左兩次醫生，都依然係咁咳，係屋企都還好，一出街就真係唔掂

條氣好唔順，咳到唔停，日日都要帶口罩見人

不過每次帶口罩出街，其他人好似覺得妳有菌咁，會同妳保持距離

驚死會傳染到俾佢，不過繼續咳落去都唔係辦法

所以就打俾媽咪問下可以煲咩湯，媽咪話煲川貝應該唔錯

咁就去街市買材料，見有一包包的湯包賣，發現有川貝海底椰潤肺湯包買

 

就買左一包番去煲黎飲，另外再加甘旬，瘦肉就可以

但飲完後依然咳得好利害~救命呀~究竟仲有咩辦法可以止咳呢 ???

材料 : 川貝海底椰潤肺湯包<1包>(川貝，海底椰，淮山，雪耳，太子參，玉竹片，龍牙百合，南北杏，陳皮，甘旬<1條>，瘦肉<$15>，蜜棗<2粒>

瘦肉飛水，川貝，雪耳浸水，甘旬去皮切件備用

煲內放入適量水及蜜棗，待滾後加入瘦肉，湯包所有材料(除雪耳)，用大火煲30分鐘

再加入甘旬，轉慢火煲 1 1/2小時，最後加入雪耳煲30分鐘，下少許鹽調味即可

蝦醬牛肉炒通菜

最近係街市見到有通菜賣，就買左半斤回家

 

初時想簡簡單單整腐乳通菜，因為袁生喜歡

 

我記得以為係超市見過有椒絲腐乳的現成醬包賣

 

但好可惜而家已經找不到了，袁太亦有想過買一樽細腐乳自己整

 

但實在有太多唔同牌子的腐乳醬，都唔知邊款先好味道

 

所以都係打消念頭，轉用蝦醬整

 

如果用蝦醬炒通菜就一定唔少得加埋牛肉，何況蝦醬牛肉炒通菜

 

袁生都好愛呢

 

不過今次好似重手左少少，袁生話鹹左D !

 

上湯紹菜雞卷

突然心血來潮想食雞扎，因為平時已經唔多去飲茶

 

就算飲茶都唔會叫呢個點心，所以決定自家製，無奈袁生話可唔可以唔用腐皮

 

改用紹菜喎

 

得 ... 你開到聲當然可以喇

 

餡料方面就會跟雞扎一樣，用火腿，魚肚同雞

 

包好後再加少少上湯一齊蒸，~嘩~好好味呢

 

就連袁生都大讚，不過下次我都係想用腐皮整多次 !

 

 

煙三文魚凱撒沙律

袁生上次係IKEA食過煙三文魚沙律就愛上了

要袁生鐘意食一樣野其實都幾難架，某一晚，袁太諗住自己整pizza做晚餐

問袁生仲想食d咩，佢居然話想食煙三文魚凱撒沙律喎

凱撒沙律我識整，但凱撒沙律既沙律汁就唔太識

都係拿拿臨上網search下有冇沙律汁的做法先，雖然上網搵到好多

但總是覺得做法好似怪怪地

袁太突然醒起我老闆烹飪咁叻，一於就打電話問下先

老闆就俾左個沙律汁做法我，我就跟住做

不過我本身食凱撒沙律係唔鐘意加沙律汁，所以只有袁生食過

袁生話個沙律汁味道唔錯，幾特別喎 !

菊花蜜糖水

袁太回來了，雖然感冒仲未好番，今日仲去睇多次醫生添

醫生仲好好開左未來兩日的假紙俾我，等我可以好好休息下

雖然食左藥個人冇咩精神，但由於還有太多食譜未發佈

所以一定要清清佢

又或者如果袁太再唔upload blog的話，我驚大家會唔記得我

好喇，講番今次主題先，就係"菊花蜜糖水"

其實係我感冒前整落既，初初本來諗住學blog友月兒整杞子桂圓茶

但後來發覺喉嚨突然劇痛

所以整蜜糖水滋潤下，菊花有清熱解毒，蜜糖有潤喉功效 !

袁太病了,blog暫休幾日

袁太要係度同大家講聲唔好意思，因為我病了，患上感冒

喉嚨劇痛兼骨痛得好利害

今日仲頂唔順攞左半日假去睇醫生雖然冇發燒

但食完藥之後真係好冇精神，所以袁太決定等食完藥好番先再upload blog

希望大家唔好見怪

我諗大約兩，三日後就會自動出現，請見諒 !