2018年2月8日 星期四

蠔油炆豬皮




每次我呀媽打邊爐必然會買豬皮 , 必然次次都食唔晒 , 必然會將次次食唔晒的豬皮俾袁太再進行加工程序 , 不過豬皮呢樣野 , 我除左用黎做火鍋外 , 一般都係會用黎煮咖哩或者用蠔油炆 ......



不過今次反而唔想用咖哩煮 , 雖然袁生袁太平時好喜愛食咖哩 , 不過最近感覺自己好鬼熱氣 , 都係暫時唔好食咁辛辣的食物會好d , 所以唔用咖哩煮 , 就轉用簡單的蠔油煮 , 煮的時間都唔駛一粒鐘 , 不過就要焗下d豬皮 , 等豬皮完全吸收汁料的味道 , 大家知喇 , d豬皮索晒汁真係好鬼死正 , 咁就會變得超級好味道 , 呢個蠔油炆豬皮可以當下午茶  , 又或者晚餐加餸都同樣得 , 真係好方便 , 仲平靚正添 ^^



材料 : 豬皮 , 薑 , 蔥 , 蒜頭 , 乾蔥頭 , 冰糖 , 酒 , 胡椒粉 , 水




豬皮用水沖一沖洗乾淨 , 薑去皮切條 , 蔥洗淨切段及幼絲 , 將豬皮放入鑊中 , 加入薑絲 , 蔥段及酒 , 再加入水用中火煮滾 , 蓋上蓋用中火煮10分鐘 , 再熄火焗20分鐘 

















期間將蒜頭 , 乾蔥頭分別去衣切細粒 , 焗好的豬皮盛起切成細片 , 燒紅鑊 , 爆香蒜粒及乾蔥粒有香味後 , 加入豬皮拌勻數分鐘 , 再加入調味料 , 胡椒粉及冰糖拌勻 , 加入2杯水份量拌勻 , 用中火煮滾後蓋上蓋轉慢火煮10分鐘






















1小時後將豬皮連汁放入細煲內 , 蓋上蓋焗至少1小時 , 食前用慢火慢慢煮熱即可










 
材料
豬皮4塊 , 薑 , 蔥 , 蒜頭1個 , 乾蔥頭4粒 , 冰糖 , 酒 , 胡椒粉 , 水2杯



做法
1. 豬皮用水沖一沖洗乾淨 

2. 薑去皮切條 , 蔥洗淨切段及幼絲 

3. 將豬皮放入鑊中 , 加入薑絲 , 蔥段及酒 , 再加入水用中火煮滾

4. 蓋上蓋用中火煮10分鐘 , 再熄火焗20分鐘 

5. 期間將蒜頭 , 乾蔥頭分別去衣切細粒 , 焗好的豬皮盛起切成細片

6. 燒紅鑊 , 爆香蒜粒及乾蔥粒有香味後 , 加入豬皮拌勻數分鐘 

7. 再加入調味料 , 胡椒粉及冰糖拌勻 , 加入2杯水份量拌勻 

8. 用中火煮滾後蓋上蓋轉慢火煮10分鐘  

9. 1小時後將豬皮連汁放入細煲內 , 蓋上蓋焗至少1小時 , 食前用慢火慢慢煮熱即可 




今次的蠔油炆豬皮焗左3粒鐘入晒味 , 用黎當小食或者煮個麵當車仔麵都得 , 買豬皮一定要買厚身既先好味呢 ^^




18 則留言:

  1. 呢個炆豬皮冇得頂呀

    回覆刪除
  2. 我未試過用豬皮打邊爐。

    回覆刪除
  3. 這個正, 我大仔好喜歡食豬皮.

    回覆刪除
  4. 我今年都食左好多豬皮,因為老DAD買左返嚟

    回覆刪除
  5. 豬皮索晒汁,正

    回覆刪除
  6. 我鐘意食豬皮

    回覆刪除