芹菜雞絲雜果沙律

袁生之前想食沙律，但又冇時間整，見今日得閒冇野做就去買材料整沙律

袁生知道有沙律食都不知幾開心，成個大細路咁

平時袁太整沙律通常都係用雜果，薯仔，蘋果就完成

今次亦都唔例外，用番呢幾種材料，不過再加埋芹菜同雞絲

突然覺得個沙律變得好健康

而之前記得電視講過沙律如果加煉奶同洋蔥會更加好

但因為袁氐唔太愛洋蔥，所以只係加少少煉奶一齊拌勻

原來加左煉奶的沙律真係好味好多，而且仲滑好多

整整下仲整左一大兜份量，袁生可以慢慢嘆了 !

黑芝麻蜜糖焗蕃薯 <附食譜>

之前係吉吉島買左包蕃薯放係雪櫃，其實袁太都唔記得有包蕃薯，係星期日個時清理雪櫃先見到，不過好彩仲未變，呢d咁靚的蕃薯究竟點整好呢 ???

問袁生梗係話冇所謂，見最近天氣開始涼涼地，咁不如試下係屋佐烤蕃薯，其實只不過係用焗爐整，熱辣辣一定好好味，如果焗蕃薯的話，點可以唔加埋蜜糖一齊焗呢，另外再加少少黑芝麻，製作過程唔駛30分鐘，已經有得食喇

平時袁生唔太鐘意食甜野，但都話好好味，攪到袁太鬼死咁開心，不過講真味道真係唔錯架，等我下次再整過，拎d俾媽咪用奶奶試下先 !

海港城聖誕反斗奇兵

好快又到聖誕喇!
一到呢d時候周圍都會有聖誕燈飾,
袁生袁太就好鍾意周圍去影相,
今年第一站就係尖沙咀,
而尖沙咀的主題就係"反斗奇兵"
我地兩公婆好鍾意三眼仔架,
咁梗係要同三眼仔影多d相喇!
不過真係好多人,
仲撞正有畢業生影相添!
所以袁生袁太都好無奈影夠就走喇!
因為我地最唔鍾意多人的地方,
不過唔知今年聖誕燈飾,
除左尖沙咀呢度靚之外,
唔知仲有邊到值得去影呢?

久違了~雞蛋仔~

星期日的時候,
袁生去左奶奶到飲早茶,
因為袁太見唔係好舒服,所以就唔去喇!
袁太食完個早餐之後又就去訓覺,
訓到袁生差唔多一點鐘番黎的時候先識醒,
不過最估唔到袁生居然會買野俾袁太食,
就係袁太至愛的"雞蛋仔"
講開雞蛋仔真係好耐冇食過,
真係好懷念,
何況今次係袁生買既,
真係特別好食...

六寶豆腐花

袁生平時真好鬼鍾意食豆腐花,
每個星期都要食碗熱豆腐花先安落,
不過其實除左食甜豆花之外,
袁太平時都鍾意用豆腐花黎煮餸,
滑o都o都的豆花,
用黎送飯真係一流架,
平時只會用肉碎,再加少少蠔油黎整已經好好味,
不過今次就用色彩繽紛的材料黎做...



何謂色彩繽粉???
有黑色,有綠色,又有橙色...
咁點解又叫做六寶呢
因為除左豆腐花外,
用左六樣材料一齊煮,所以咪就咁叫六寶囉!
不過其實全部都係屋企雪櫃有的材料,
只要去豆腐鋪買碗淨豆花就可以,
煮到一碟好味又健康的餸菜喇,
袁太覺得個煮法好簡單,
而袁生就好似細路仔咁食得好開心!



~六寶豆腐花~食譜

材料 : 豆腐花-1碗 / 海參-2條 / 甘旬-半條 / 仿飽片-10片 / 瑤柱-2粒 / 蝦仁-8隻 /
                               菜心莖-適量 / 清雞湯(500ml)-1盒                     

 

 

1.所有材料切粒備用.

2.豆腐花放上碟加半盒雞湯,隔水用大火蒸約5分鐘.

 

3.鑊中加入少許雞湯,將海參,瑤柱煮約15分鐘,撈起.

4.燒紅鑊,將菜心莖,蝦仁,甘旬粒,飽片炒熟後加入少許雞湯,鹽煮至淋身後,將海參,瑤柱落鑊一齊兜勻.
5.將所有材料放在豆腐花上即可.

細路仔飯--雜豆魚柳粒火腿炒飯

袁太今日炒左個細路仔飯,
點解會叫細路仔飯,
咪因為以前細細個,
媽咪炒飯的時候都係用呢d材料,
咁媽咪個時叫細路仔飯囉,
所以袁太由細到大都係咁叫,
都叫到慣晒lu,
不過人大左喇,都要改番個正常d的名,
所以就叫做"雜豆魚柳粒火腿炒飯"喇!



不過平時袁太係屋企好少炒飯食架,

一來因為袁生本身唔太鐘意食炒飯,

二來覺得炒飯好麻煩,
同埋好難會炒得好食,
通常都會炒到濕淋淋咁,

不過今次又炒得幾乾身!
最緊要係材料簡單又好味!
簡直perfect~~~
炒左一大碟,就連BB都可以食添!

~雜豆魚柳粒火腿炒飯~食譜

材料 : 冷飯-2碗 / 雜豆-半包 / 魚柳-1條 / 雞蛋-2隻 / 火腿-3片

                      醃料 : 鹽 , 黑椒碎 , 麻油 - 少許                                         
 

 

1.魚柳洗淨,用醃料醃30分鐘. 

2.火腿切細片,雜豆用滾水煮一煮,撈起備用.
3.開鑊將魚柳煎香,待魚柳熟透後,撈起.

4.燒紅鑊落油,將打發的雞蛋炒熟,加入冷飯一同兜勻,待飯同蛋液拌勻後,再加入雜豆,魚柳,火腿片快手兜勻,
   下少許鹽調味,即可.