迷你芝士腸包 <附食譜>

~好耐好耐~冇整個麵包，突然心血來潮係屋企無無聊聊就去廚房取材料搓包包，一於整我至愛的腸仔包，不過腸仔方面就用袁生至愛的芝士腸，如果成功的話仲可以俾袁生明天做早餐添，唔知袁生有冇意見呢 ???

袁太自己一個係屋企~搓呀搓~發酵再發酵，經過兩個幾鐘頭的時間，終於可以入焗爐，我記得以前焗麵包就一定焗到麵包面金黃色的地方會好硬，真係唔知點解 ???

所以我今次就企定定係焗爐前望住成個焗的過程，覺得個腸仔包焗得最靚的時候立刻關掉焗爐，取出待涼後即刻試食，今次賣相唔錯之外，而且麵包非常軟棉棉，新鮮出爐熱辣辣我已經K.O左3個，等袁生放工回來之後，見到我整左腸仔包，就話 : 個樣好似咁硬，唉 ... 你可唔可以食左先講呢

當袁生咬第一啖的時候，即時跌晒眼鏡，入面好鬆軟喎，真係估佢唔到，所以話真係唔可以單睇外表而決定個味道得唔得，袁生已經叫我留起兩個俾佢明天做早餐了 !

雪菜肉絲上海麵 <附食譜>

上星期五袁生公司Annual Dinner，所以袁太夜晚餐飯就自己攪掂，一個人費時煮飯，而且袁生唔番屋企食，我梗係食D平時袁生唔食，但我鐘意食的食物，例如 : 好似上海麵

袁生平時就一定唔會食上海麵，其實上海麵我可以話由細食到大，因為以前媽咪成日都煮上海麵，所以今次就決定照足媽咪以前咁整，簡簡單單用雪菜肉絲，不過印象中我以前唔太鐘意食雪菜，因為總是覺得好鹹，但食食下又覺得幾好味，係咪人越大，食野的味道同感覺會有所不同既呢 ???

簡簡單單一碗雪菜肉絲上海麵，再加一支甘旬蔬菜汁，袁太已經覺得好滿足了 !