青紅蘿蔔栗子雪耳排骨湯

今日袁太又煲青紅蘿蔔湯,
其實都知袁生唔太鍾意,
不過冇辦法喇!
因為青紅蘿蔔多選擇,
用咩材料一齊煲都咁好味,
而袁太今次依然都係用栗子黎煲,
因為煲湯的栗子實在太好味喇!
除左用栗子,因為最近天氣開始涼涼地,
所以加埋雪耳一齊煲,
不過袁生又唔鍾意食雪耳既,
但用雪耳煲出黎的湯真係好潤架!
另外,今次唔用瘦肉湯,
改用排骨煲,
排骨煲完簡直超腍,好味道!

~青紅蘿蔔栗子雪耳排骨湯~食譜

材料 : 青蘿蔔-1條 / 紅蘿蔔-1條 / 栗子-12粒 / 雪耳-1個 / 排骨-$25 / 蜜棗-2粒 / 南北杏-少許

做法:

1.排骨飛水,雪耳浸水至發大,洗淨芽剪細,備用.

2.青,紅蘿蔔去皮切件.

3.煲內放入適量的水,凍水落蜜棗,南北杏.

4.待滾後,加入栗子,排骨用大火煲30分鐘,再加入紅蘿蔔,青蘿蔔用大火煲30分鐘.
5.轉慢火煲30分鐘後加雪耳,再用慢火煲30分鐘,下少許鹽調味,即可.
                    

GNC葉酸

袁生袁太結婚差唔多一週年,
時間真係過得好快,
袁太的朋友好多都知袁太一直想為袁生生番個b,
但經過一年的時間,
袁太的肚仲未有起色,
雖然身體的人個個都話袁太結左婚都唔係好耐姐,
唔駛咁急生bb,
何況仲後生,慢慢黎囉!
其實袁太都知生bb的事,
係唔可以俾咁大壓力自己,
當你越想有就反而冇,
可能抱住順其自然的心態,就會有驚喜呢?
不過袁太同袁生都鍾意小朋友,
所以希望可以生番個龍b,
咁袁太已開始計劃懷孕,
係懷孕前,梗係要買葉酸食喇!
如果食葉酸,梗係食GNC喇!
希望可以好快有好消息喇!

8號風球

袁生袁太都冇諗過今日會掛8號風球,
因為天文台次次都掛3號就落波,
今朝起身開電視睇,
知道掛8號之後,幾開心!
因為袁太本身由明天至下星期一都放假,
咁而家加多左一日假,
咁袁太咪連放五日,實在太"正"喇!
不過係8號風球的情況下,
袁生袁太起身後,冇再訓覺,
就落左樓下食早餐,
然後袁生仲陪袁太買餸添!
係街市行番屋企路程,
袁生一路拖住袁太隻手,
話驚袁太會俾風吹走喎!
都唔知袁生幾時變得咁細心...



今日難得放假係屋企,
仲可以叫袁生幫手執下間屋,
最緊要今日有時間俾我upload埋d食譜,
真係好耐冇試咁優閒的一日!

京蔥炒金錢展片

袁太今日本來想炒駝鳥片,
但去到急凍店居然話今日冇入貨,
咁點算,可以轉炒咩呢?
正當袁太係度煩惱之際,
急凍店的呀姐就提議袁太,
不如試下炒金錢展片,好好味架!
金錢展片
平時只會用黎整水,用黎炒就真係未試過,
咁袁太就一於信呀姐,
買番包番去試下炒,睇下係咪真係咁好味,
居然出乎意料之外,
袁生袁太都覺得幾好味,
都覺得用金錢展炒係好食過用駝鳥片同肥牛炒,
估唔到呀姐真係冇介紹錯!



~京蔥炒金錢展片~食譜

材料 : 金錢展片-1包 / 京蔥-1條

                     
醃料 : 生抽 , 油 , 糖 , 生粉 , 老抽 , 胡椒粉 - 少許
                      獻汁 : 生抽 , 糖 , 老抽 , 生粉 , 水 - 少許
 

1.金錢展片加入醃料醃15分鐘.
2.京蔥斜切成薄片.
3.燒紅鑊,炒金錢展片至半熟,撈起.
4.將京蔥落鑊炒一陣,再將金錢展片回鑊,加入獻汁煮濃,最後灑上麻油,即可..

袁太極力推介的make up base

係女性的都知道化妝前一定要用base,

因為可以阻隔化妝品對皮膚的傷害,

不過市面上有咁多種make up base,

袁太就一定會用有控油同保濕既,

因為袁太的皮膚,

就T字位要控油,其他部份就要保濕,

之前用過其他牌子的make up base都唔好,

唯獨呢支真係好啱袁太用,

呢支base係袁太之前係旺角的靚靚化妝品個到發現架!





個sales仲話呢支base除左有保濕功效,

仲可以修飾毛孔,

話用耐左仲可以修護受損皮膚,

呢支30g的base有2種顏色,

袁太就選擇左自然色,

雖然只用左大約半個月,

用左之後發現毛孔真係平滑左,

不過修膚皮膚的功效還未明顯,

同埋個妝都可以keep好耐,

不過一支30g都成$3xx,

雖然袁太覺得有少少貴,

但終於搵到一支適合自己用的base,

貴少少都值得喇!





而袁太的化妝步驟:make up base>>遮瑕膏>>上碎粉>>再加少少胭脂>>畫眉>>唇彩

就可以出街見人喇!