自家製瑞典肉丸 <附食譜>

我平時好喜愛去IKEA食肉丸，因為又平又好味，但番工的地點附近又冇IKEA，冇理由專程去買包肉丸番屋企架 ???

所以決定自家製，其實自家製一D都唔難，整定一大碟仲可以放係雪櫃保存數天，今日就簡簡單單整好肉丸後加我至愛的紅莓醬做晚餐，簡單到連飯都可以唔駛煮，真係好方便，雖然唔駛煮飯，但都要煮意粉，因為袁生唔喜愛紅莓醬，所以就另外加個意粉俾佢

總括來說，雖然自家製肉丸係美味，但味道總不及IKEA肉丸好，但袁生反而喜愛這款 !

食剩的肉丸可在煎熟後盛起放涼放入冰箱冷藏數天

香辣豬肉年糕一丁麵 <附食譜>

大約幾個月前同袁生去韓食家食晚餐，不過由於當時唔係太肚餓的關係，所以只食左石頭飯同泡菜煎餅，但見到隔離枱叫左碗豬肉湯麵，又好似好正，不過真係食唔落，就將當時見到的畫面重新係袁太廚房裡面複製一次，既然係自家製作，就可以將辣的程度調到最低，不過韓式食物唔辣又唔好吃，咁就整住小辣先

 

另外仲有一個問題，韓式店所用的麵應該會係辛辣麵，但袁太本身唔太喜愛辛辣麵，如果將辛辣麵轉一丁麵會唔會好怪呢 ??? 當然唔會，都係麵姐，唔知複製品同原創的味道同賣相會唔會好大出入呢 !

兒時回憶@Shatin Inn Rest

<Shatin Inn Rest>，唔知大家有冇去過呢度食野呢 ???

記得細細個的時候，一家四口(阿爹，媽咪，家姐同我)，大約每兩個星期的星期日，總是一家開開心心由爹地揸車由屋企出發，去食lunch，以前的時代喜愛去這些古舊的地方食野多過去酒樓飲茶，但自從拍拖，做工後，唔好話一家人揸車周圍去外，就連見面飲茶都少了

其實我一直都再想去食，但奈何要約齊人真係一件好難的事，所以見某日夜晚得閒，就同袁生提議不如去Shatin Inn食野，袁生"OK"，因袁生從未去過，但冇車喎，可以點去呢 ???

所以就膽粗粗打去問下，點知接電話的小姐好好禮貌，以下係袁太同職員對話 :

職員 : ~喂~

袁太 : 係咪Shatin Inn呀 ???

職員 : 係，有咩可以幫到妳

袁太 : 我想問下妳地餐廳地址係邊呀 ???

職員 : 大埔道7咪半 ，妳係咪揸事黎 ???

袁太 : 唔係呀，所以打黎問下有咩其他車可以到達

職員 : 妳會係邊個地區過黎 ???

袁太 : 深水土步

咁個職員就教我可以係深水土步邊度搭巴士，係邊個站落車，然後點樣行，唔駛好耐，袁太已經到步了，不過唔知係咪平日的關係，晚上七點幾去到食到大約九點鐘，都係得一兩枱的客人，而食物方面，雖然冇以前的咁好食，但都唔太差，我就最喜愛古古舊舊的餐廳，職員有禮貌，座得耐又唔會摧妳走，不過就比較多蚊左D !

大大個Shatin Inn牌，餐牌款式唔算太多

   

袁生居然唔飲酒

叫完食物袁生例牌係度打機

店內環境古舊~I Like It~

晚上七點幾，但沒有太多客人

一定要飲的珍多冰，還記得以前好好飲架，但現在就比較淡味

碟的款式同以前沒有改變

袁生點了~加多加多~，味道唔錯，有我至愛的蝦片

袁生又點了~巴東椰汁辣椒牛肉，味道不及其他的印尼餐廳咁好味，有少許硬

袁太指定要食炒河，呢間炒河真係咁多年味道不變，~正~

至愛串燒出場了，羊肉，豬肉每款5串，醬汁超好味

袁生好似食得好滿足咁喎

大家有興趣可以去試下

韓式泡菜五花腩肉拌生菜 <附自家製小辣泡菜食譜>

又偷懶左幾日冇開電腦，事緣因為平時放工夜，番到屋企食完飯都唔想郁，何況BB最近身體又唔多好，所以袁生袁太係屋企都會寸步不離BB的視線範圍之內，因為睇少佢一陣，BB就一定會攪攪震

好喇 ! 記得前幾日整左泡菜放係雪櫃，袁生以前好喜愛簡簡單單泡菜拌飯，但今日又話想用黎炒，當然冇問題喇，去街市買左條靚靚五花腩，一於整泡菜五花腩肉

其實簡簡單單泡菜腩肉 + 白飯已經流晒口水，但袁生又話天氣熱唔想食飯，咁唯有轉生菜包喇，其實拌生菜都好好味，何況自家製泡菜係屬於小辣程度，而且五花腩肥瘦均勻，真係好味道架，不過今次份量好似少左D，兩個人都唔係好夠食添 !

自家製泡菜(小辣版)

青紅蘿蔔豬展雞腳湯 <附食譜>

老火湯時間到了~~~

今次主角係由細飲到大的煲湯主要材料~青紅蘿蔔~ 袁太想問下大家 : 平時喜愛青蘿蔔多D，還是紅蘿蔔多D呢 ???

我就喜愛青蘿蔔，仲記得細個的時候好憎食紅蘿蔔，要我食一舊都想死，不過年齡漸漸大了，發覺原來紅蘿蔔都唔係咁難食，不過講開青紅蘿蔔湯，我一定耍加埋雞腳一齊煲，總是覺得味道會濃郁好多，仲有滋潤的無花果，一碗多湯渣又好味的老火湯有得飲喇 !

雪糕班戟 ~Oreo曲奇味,榴槤味,荔枝味,朱古力味~ <附食譜>

前幾日假期的時候，袁生突然有個要求，話天氣熱，想食雪糕班戟，都好橫掂我都想食，本身想整士多啤梨雪糕班戟，但我知袁生係唔喜愛士多啤梨，咁就轉一轉雪糕的味道，整整下就變左四色雪糕班戟

雪糕口味分別有 : Oreo曲奇味~我至愛~，榴槤味~救命，好臭呀，係袁生至愛~

另外仲有大家都愛的荔枝味同朱古力味，由班戟皮到雪糕，都係袁太一手一腳整，雖然班戟係包得比較樣衰D，但食落好好味，我朋友仔成日問我，妳係一個唔食榴槤的人，仲咁好整榴槤味的雪糕俾老公食

唉 ... 冇辦法喇，鬼叫袁生喜愛食榴槤咩，所以我整呢個榴槤味的雪糕真係做足功夫架，帶晒口罩，手套去整，但依然都覺得成身榴槤味，真係頂唔順，拿拿臨去廁所洗手，都唔知洗左幾多次，袁生知道我整榴槤味雪糕俾佢食都不知幾感動，仲大叫好好味，仲多謝我呢個老婆唔食榴槤都整俾佢食

傻喇，只要你想食咩，只要開口講聲，我一定會整俾你食既 !

日本帶子牛奶蒸水蛋 <附食譜>

今晚本來同袁生番去同老爺奶奶食飯，點知約六點幾收到奶奶，致電通知，今晚飯局要取消了，因為奶奶突然有事做唔得閒，但我冇去街市買材料煮晚飯喎，咁點算呢 ???

見廚房有雞蛋，不如整水蛋做晚餐喇，橫掂天氣炎熱，袁生呢幾日都冇咩胃口，水蛋滑溜溜容易入口，冰箱仲有煙肉，仲有大大粒日本帶子，呢款帶子永遠係袁生至愛，一於用來做水蛋材料，另外仲有北海道牛奶，加少少落去蛋液到拌勻，蒸完的水蛋有好香的牛奶味

一人一碗唔駛爭，雖然蒸水蛋熱辣辣，但香濃的牛奶味 + 滑嘟嘟的水蛋，真係好好味，好滿足 !