雪菜粉皮 <附食譜>

炎炎夏日真令人冇晒胃口，晚餐都諗唔到究竟煮咩好 ??? 問袁生的話，佢一定冇咩意見可以俾到我，不過每當咁既悶熱天氣，最好就整涼拌，一來製作方便，二來凍冰冰，一定可以為身體稍為降下溫

由於係九龍城上班的關係，大定知道九龍城真係可以話咩都有得賣，今日lunch time的時候經過某間賣上海食品的老店舖，就想到不如買包粉皮整涼拌今晚做晚餐，順便買多包雪菜

唔知點解我好喜愛去上海店舖買雪菜，雖然覺得同一般街市豆腐店買的雪菜唔係大太分別，
但總是覺得味道係有少少唔同，當然始終還是覺得上海店買的係好味D，呢個粉皮做法真係相當簡單，唔需要好長時間已經可以完成 !

 

滑滑雞 <附切雞瀨食譜>

平時如果有時候食下午茶，我一定會去大型連鎖快餐店食碗切雞或油雞瀨粉，但越食就覺得越唔抵，價錢不斷加價之餘，仲要份量少到咩咁，瀨粉就多，但雞的份量簡直少到想喊，一係就俾雞翼，一係就隻雞一D肉都冇，得雞皮吊住D骨，食完個次之後真係唔想再幫襯呢D所謂的下午茶，所以就決定自己係屋企整

自己整的話除左隻雞一定啖啖肉外，仲可以去埋骨，用雞骨去煲個湯底，用黎煮瀨粉，一定會好好味，何況自己整白切雞其實一D都唔難，雞肉仲好嫩滑添，再加上我至愛的薑蓉"正"

西洋菜鴨腎鯽魚湯 <附食譜>

發覺原來差唔多有兩個星期冇煲湯俾袁生飲，我平時就喜愛煲湯多過滾湯，因為始終覺得煲湯的選擇同配搭會多D，但夏天究竟煲咩湯好呢 ???

天氣悶悶熱熱咁，有時又落雨，有時又咁好陽光，最近比較鐘意用鯽魚煲湯，鯽魚湯的湯水甜甜地，最重要係同咩材料都好夾，夏天的首選就係煲菜湯，唔好問我點解，因我自己都想知

本來想煲冬瓜，但見冬瓜唔太靚仔，見有西洋菜賣，咁不如煲西洋菜湯，講開西洋菜湯，唔知點解好多人都會用鴨腎，唔理咁多一於照跟，另外用豬骨，鯽魚一齊煲，味道超正

因有鯽魚的甜味，鴨腎的鹹味，西洋菜少少的苦味，味道好夾，不過記得以前袁生講過唔鐘意食西洋菜個喎，但今次又見佢食，於是就同袁生講，你以前話過唔食西洋菜，點解而家又食呢 ???

袁生的答案 : 我以前有講過咩 ??? 我可以100%肯定袁生真係有講過，不過佢話冇就冇喇 !

健康...不健康??? <附五色蔬菜炒餐肉食譜>

最近放工又夜左，本來諗住打俾袁生問下想食咩，買外賣做晚餐就算，點知 ... 袁生居然話想我煮飯食，嘩 ... 究竟今日發生什麼事 ??? 袁生會自動自覺叫我煮飯，真係世界變

不過附近街市已經收晒，咁究竟我可以煮D咩呢 ???

其實諗煮咩之前係咪應該諗下屋企有咩可以煮先呢，之前超市午餐肉減價入左貨，雪櫃好似仲有少許蔬菜剩，咁就好簡單咁將佢地一齊炒，快捷又方便，不過罐頭一向俾我感覺都唔太健康，成日食對身體都唔太好，但我又同有益的蔬菜一齊炒

咁究竟呢碟餸係健康定唔健康呢 ??? 攪到我自己都好矛盾添，不過正所謂好又一餐，唔好又一餐姐，最主要袁生冇投訴就得喇 !

蝦仁煎蛋餅 <附食譜>

是日推介~袁生袁太至愛~煎蛋餅

平時由於放工比較夜，又唔喜愛出街食飯的我，就算明知煮得夜先有飯開，但都要硬住俾袁生鬧的危機，因為平時我放工番到屋企都八點幾，如果再煮飯的話，真係唔知幾點先有飯食，但就算放夜晚12點，都阻唔到我點都要煮飯的熱誠

好喇，講番正題先，由於蛋餅做法比較簡單，所以我好多時都會整黎做晚餐，只要將蛋餅的材料偶然轉一轉，就已經可以做出唔同的味道了，仲可以用自己喜愛的材料，大家話係咪幾好呢，而今次就選用袁生袁太都愛的煙肉，茄子同蝦仁，味道真係無得頂~正~

雜菌炒羊肉 <附食譜>

我一向都好喜愛雜菌，無論焗雜菌，雜菌湯我統統都愛， 反而袁生以前都唔太愛菇菌類，不過經過時間的洗禮，袁生漸漸喜愛菇菌了，所以今日又整菇菇做晚餐

本來想炒牛肉，不過大家知喇，我今時今日都仲係唔可以食牛肉，但又唔想炒雞肉或豬肉，所以就向羊肉入手，係急凍店買包火鍋羊肉片，再加我近期至愛的本菇，雞脾菇同磨菇，快快手炒埋一碟，真係又簡單又好味

袁生都不知食得幾開心，買左一大包羊肉，我都係食左幾塊，其他既已經係晒袁生個肚入面 !