2013年5月24日 星期五

西洋菜鴨腎鯽魚湯 <附食譜>

發覺原來差唔多有兩個星期冇煲湯俾袁生飲,我平時就喜愛煲湯多過滾湯,因為始終覺得煲湯的選擇同配搭會多D,但夏天究竟煲咩湯好呢 ???

天氣悶悶熱熱咁,有時又落雨,有時又咁好陽光,最近比較鐘意用鯽魚煲湯,鯽魚湯的湯水甜甜地,最重要係同咩材料都好夾,夏天的首選就係煲菜湯,唔好問我點解,因我自己都想知


本來想煲冬瓜,但見冬瓜唔太靚仔,見有西洋菜賣,咁不如煲西洋菜湯,講開西洋菜湯,唔知點解好多人都會用鴨腎,唔理咁多一於照跟,另外用豬骨,鯽魚一齊煲,味道超正


因有鯽魚的甜味,鴨腎的鹹味,西洋菜少少的苦味,味道好夾,不過記得以前袁生講過唔鐘意食西洋菜個喎,但今次又見佢食,於是就同袁生講,你以前話過唔食西洋菜,點解而家又食呢 ???

袁生的答案 : 我以前有講過咩 ??? 我可以100%肯定袁生真係有講過,不過佢話冇就冇喇 !


西洋菜鴨腎鯽魚湯



材料 : 西洋菜<1斤>,鴨腎<3個>,豬骨<$28>,鯽魚<1條>,蜜棗<3粒>,薑<3片>


做法 :
1. 西洋菜浸鹽水20分鐘後洗淨,豬骨,鴨腎出水備用

2. 煲內放入適量水,加入蜜棗,豬骨,鴨腎煲滾

3. 燒紅鑊,爆香薑片,將鯽魚洗淨抹乾水份下鑊中煎至兩面金黃色,放入湯中用大火煲30分鐘

4. 再加入西洋菜後轉慢火煲2小時,最後加少許鹽調味即可


3 則留言:

  1. 寧靜中的不寧靜2013年5月24日 上午6:57

    好奶白色~~~~魚都係要煎一煎先放湯先變白~
    你一講起鴨腎.....好想食鴨腎瘦肉粥~~!~以前細個成日食~
    [版主回覆05/25/2013 21:52:47]螺頭雞粥+瑤柱,我都鐘意!
    [寧靜中的不寧靜回覆05/25/2013 06:38:25]以我NNNN咁多年, 僅餘既記憶.....好似係有少少鹹架~
    而家就鍾意螺頭雞粥...+瑤柱~
    [版主回覆05/24/2013 11:00:24]煲魚湯的時候將條魚煎金黃色,呢個步驟真係唔懶得,鴨腎瘦肉粥我未食過喎,係咪好似菜乾豬骨粥咁鹹鹹地呢...

    回覆刪除
  2. 個魚湯好足料bor~~ 魚湯好健康呀~~
    [版主回覆05/25/2013 01:54:11]魚湯真係好有益,又健康!

    回覆刪除
  3. 正呀!老梁好中意飲魚湯~~
    我搵日都試下煲先!不過一定要WKEND先得啦,因為平日好難買定條魚呢~
    你D鴨腎係用乾定新鮮架~
    [版主回覆05/25/2013 21:49:51]新鮮既好少用黎煲湯!
    [梁少奶 ^v^回覆05/25/2013 15:41:36]其實新鮮同乾有冇大分別架~
    [版主回覆05/25/2013 14:04:18]鴨腎係乾既,係雜貨店買!

    回覆刪除