蒜蓉蒸開邊虎蝦

繼續post平安夜晚餐的食譜喇,
其中一樣就係蒸蝦,
不過唔係細細隻的基圍蝦,
而係大大隻的虎蝦,
因為知袁生鐘意食,
所以幾貴都會買,
一盒得6隻,都成$138,
一次煮晒真係好肉赤,
不過一諗到袁生如果見到有虎蝦食,
一定開心到暈!



袁太買左咁大隻虎蝦番黎究竟會點整呢
梗係將佢開邊蒜蓉蒸喇!
大大隻,啖啖肉,
好香的蒜蓉味,
實在太好味喇~~~~~
本來有6隻就一人3隻,
但袁太見袁生太鐘意喇,
所以袁太俾多隻袁生食,
袁生真係笑咪咪,好開心咁喎!



~蒜蓉蒸開邊虎蝦~食譜

材料 : 虎蝦-6隻 / 蒜蓉 , 蔥粒 - 適量

1.蒜頭去衣剁碎後,用少許牛油加少許生油用慢火爆香,放入冰箱冷凍1小時備用.

 

2.虎蝦解凍剪掉鬚後,從背部至尾部界開(不要界斷)取走蝦腸,清洗乾淨抹乾水份,將每隻蝦均勻地放上蒜蓉.

3.把虎蝦排放在碟上,隔水用大火蒸約5分鐘.

4.最後灑上蔥粒,滾油及少許生抽即可.

紐西蘭大菇拌牛油芝士法包

呢隻紐西蘭燒烤菇之前整過一次,
簡直超好食,
呢種菇好香,就咁炒都已經好好味,
之前第一次整的時候,
用橄欖油,芝士,菠菜黎焗,
袁生袁太食到唔停得口,
不過價錢都幾貴,
係吉吉島買,
一包有四至五隻,價錢就$35.9一包,
所以袁太唔係咩特別日子都好少整呢種菇,
不過上次平安夜的晚餐,
袁太第一時間就諗到用大菇黎做前菜,
連同法包一齊食,
法包另外加左牛油,芝士略烘過,
一齊食的感覺超正,
袁生俾左100分滿分呢個大菇拌法包添!
平時袁生好少可俾滿分架!
咁即係唔駛袁太講,
大家都知應該會好美味喇!

~紐西蘭大菇拌牛油芝士法包~食譜

材料 : 紐西蘭燒烤菇-3隻 / 法包-4片 / 車打芝士 , 牛油 - 適量

                      調味料 : 黑胡椒 , 鹽 , 橄欖油 - 適量

 

1.紐西蘭燒烤菇較易出水,先將菇焗一焗,鎖住水份.   

2.燒烤菇掃上調味料後,以180C焗約8-10分鐘,待涼後切粒備用.

3.法包放入鑊中(要乾鑊),烘至兩面微熱,金黃色後,將其中一面加入牛油,芝士至溶解,撈起備用.
4.燒紅鑊,下燒烤菇粒炒熱後,加少許鹽,芝士碎調味兜勻,放上碗中.
5.將碗放在碟的中央,牛油芝士法包放在碗的周圍即可.

 

平安夜晚餐

又到平安夜喇!時間真係過得快,
袁生袁太都好似以前一樣,
唔會去街慶祝,
因為唔鐘意咁多人的地方,
所以晚餐方面,
袁太就要用下d腦汁,
炮製平安夜大餐俾袁生食,
經過袁太的思考後,
已決定個meau喇!
~就係~
前菜:炸芝士火腿雲吞
         紐西蘭大菇拌牛油芝士多士
主菜:煎牛扒拼蒜蓉蒸開邊蝦
湯:忌廉海鮮湯
呢餐平安夜晚餐袁太足足整左2小時,
梗係喇!
又要包,又要炸,又要焗,又要煎,又要蒸,又要煲,
真係咩方法都用盡,
到上枱的時候,
袁生好似好滿意,
仲即刻攞部電話出黎影低佢,
然後post上facebook,
話係老婆煮的平安夜晚餐,
令到袁太覺得好sweet,
不過食完平安夜晚餐後,
又要諗聖誕節晚餐用聖誕蛋糕喇!

咸湯丸

點解袁太會整咸湯丸
其實因為媽咪冬至之前打電話俾袁太,
話睇報紙見到專欄講過,
冬至前食咸湯丸,
冬至個日食甜湯丸,
先鹹後甜喎,
但袁太都唔係好明點解,
不過算喇!
橫掂媽咪話如果袁太食的話,
就包湯丸俾我拎番屋企,
冇所謂喇!
不過袁太叫媽咪唔好包咁大粒,
1毫子咁大size就ok架喇!
點知媽咪俾我的時候,
嘩...唔駛咁大粒喎!
包到成個一蚊咁大,
不過媽咪包的湯丸點都好過袁太自己包,
而咸湯丸的湯,本應用紹菜既,
但袁太唔食得,
所以就改用生菜煮,
另外仲有蝦米,冬落,瑤柱,同埋個主角:湯丸
其實只不過係滾個湯再加湯丸一齊煮姐,
不過湯丸實在太大粒喇!
好鬼飽呀!

媽咪包的超大粒湯丸