老王瓜牛大力瘦肉湯

呢幾日袁太係街市見到好多太太買牛大力,
袁太梗係唔執輸買埋一份喇!
但究竟牛大力有咩功效,
有咁多太太都買黎煲湯呢
以袁太咁八的性格,
梗係問下老闆有咩好處喇!
oh,i see...
原來牛大力係有清熱潤肺,消炎止咳的功效,
橫掂袁生平時食咁多煙,
袁太最近又成日咳,
煲呢個湯就啱晒喇!



但用牛大力煲湯究竟另外要加咩材料一齊煲呢?
老闆介紹可以用老王瓜,
咁袁太就聽老闆講用老王瓜,
但煲出黎袁生就唔太鍾意,
話味道怪怪地喎,
可能味道甘甘地掛,
不過老實講,袁太都覺得味道太甘,麻麻地好飲...

~老王瓜牛大力瘦肉湯~食譜

材料 : 老王瓜-1個 / 赤小豆,扁豆-適量 / 牛大力-適量 / 甘旬-1條 / 瘦肉-$10 /

                               蜜棗-2粒 / 粟米-1條

做法:

1.將瘦肉飛水,切件備用.

2.老王瓜洗淨切件,牛大力洗淨切片,甘旬去皮切件.

3.煲內放入適量的水,放入蜜棗,赤小豆,扁豆,瘦肉,粟米煲30分鐘.
4.再加入老王瓜,牛大力,甘旬煲30分鐘,再轉慢火煲1 1/2小時,下少許鹽調味,即可.

鮑魚螺頭栗子排骨湯

呢個湯係星期日煲的,
剛剛過左既星期六,
袁太成晚都訓唔著,
終於呆下呆下就天光先訓到,
不過只訓左3個鍾就起身去買早餐,
食完早餐一陣,就開始做家務,
洗床單,洗被,抹廚房,洗廁所,抹地同埋清潔雪櫃喇!
嘩...好忙呀!
清潔雪櫃的時候,
發現冰箱原來仲有半包鮑魚同埋螺頭,
應該係之前係吉吉島買左一大包番黎淨係煲過一次,
如果唔係抹個雪櫃,
都唔記得仲有鮑魚同埋螺頭係度,
橫掂袁生鐘意飲的湯,
所以就決定今次煲埋佢!



用鮑魚螺頭煲出黎的湯真係好清甜,好好味,
其實除左袁生鐘意之外,
袁太都好鐘意架!
今次個湯除左有鮑魚,螺頭之外,
另外加埋栗子,排骨一齊煲,
呢碗湯真係夠晒料,
淨係飲碗湯都夠晒飽!

~鮑魚螺頭栗子排骨湯~食譜

材料 : 鮑魚(中)-4個 / 螺頭(細)-4個 / 紅蘿蔔-1條 / 栗子-12粒 / 史x生清雞湯(500ml)-1盒 /
                                        排骨-$22 / 蜜棗-2粒

做法:
1.鮑魚,螺頭出水備用.
2.紅蘿蔔切件,將排骨飛水,備用.

3.煲內放入史x生清雞湯及適量,水及蜜棗,待滾後,加入栗子,排骨用大火煲30分鐘.
4.再加入鮑魚,螺頭,紅蘿蔔煲30分鐘後,再轉慢火煲1小時,下少許鹽調味,即可.
    

爛蛋牛肉煲仔飯

好好地點解唔叫窩蛋牛肉煲仔飯,
要叫爛蛋呢???
本來袁太將隻蛋倒落牛肉餅上的時候,
隻蛋係好完整架,
唔知點解拎左出飯廳,諗住影相個時,
一打開僬蓋就見到隻蛋已經爛左喇!
袁太真係當堂"O"晒嘴,
煲飯即時扣左唔少分,
但都要影低佢Post上Blog同大家分享...



不過其實天氣又唔係咁凍,
點解袁太會無端端整煲仔飯呢?
好簡單,咪因為袁太突然間想食,
所以問左袁生之後,
就可以去買材料整喇!
袁太入廚咁耐都係第一次整煲仔飯架咋,
平時食煲仔飯,
一係就出街食,一係就食媽咪整的,
初時以為係屋企自己整會好麻煩,
但原來都好容易整,
雖然始終一定唔夠街個d咁好食,
但袁太都覺得味道唔錯,
最緊要係袁生都話幾好味,
不過份量好似多左少少,
兩個人都食唔晒!



~爛蛋牛肉煲仔飯~食譜

材料 : 免治牛肉-200g / 雞蛋-1隻 / 白米-1.5杯 / 水-2杯 / 蔥粒-適量 / 煲仔飯豉油-2湯匙
                      醃料 : 蠔油 , 生抽 , 生粉 , 雞粉 , 麻油 , 胡椒粉 , 糖 , 水 - 少許

 

1.免治牛肉加入醃料醃1小時.

2.白米洗淨後放入小瓦煲內加水煲15分鐘.

3.將免治牛肉放上飯面,蓋上瓦煲蓋煮至水份收乾(大約8分鐘).

4.熄火後即刻打入雞蛋.
5.淋上已預熱的煲仔飯豉油,最後灑上蔥粒,即可.