生炒牛肉飯

第一次整生炒牛肉飯,好味道

上次煮飯的時候剩左好多米
冷飯最好用黎做咩
梗係用黎炒飯喇
不過平時袁生唔多鍾意食炒飯
但話之佢喇
唔通掉晒d冷飯咩,咁浪費
所以決定整碟生炒牛肉飯食下
材料簡單,做法亦都好簡單
何況呢幾日天氣又凍番
有碗熱辣辣的炒飯係面前都唔錯架
同埋自己整可以控制油份,鹹味
點都健康d
而且味道仲好好添!



~生炒牛肉飯~


材料:
免治牛肉-$20/冷飯-1碟/生菜-半個/雞蛋-2個/蔥-適量

醃料:
生抽,糖,生粉,麻油-適量


做法:
<1>
免治牛肉加入醃料醃30分鐘.

<2>
生菜切絲,蔥切粒,雞蛋打發好備用.

<3>
燒紅鑊,將免治牛肉落鑊炒至8成熟後盛起.

<4>
再燒紅鑊,將蛋液落鑊快炒後加入冷飯炒散,再加入免治牛肉兜勻.

<5>
加少許鹽,生抽調味,最後加入生菜絲,蔥粒炒多約1分鐘即可.

                                                               

叉燒豆乾炒青豆角粒

好耐冇食豆角喇,所以就整個炒豆角食下

初時諗住買深色豆角
但好出奇地整個街市都冇得賣
平時唔食個時就多到冇人買
真濕滯
咁冇計喇,唯有轉買青豆角
再加上叉燒,豆乾一齊切粒炒
用黎撈飯真係好味道
最好就係一碟餸裡面
又有肉類,又有蔬菜,又有豆類
簡直可以滿足晒三個願望!

~叉燒豆乾炒青豆角粒~


材料:

叉燒-$15/豆乾-3塊/青豆角-$5/雞湯-適量


做法:
<1>
分別將叉燒,豆乾,青豆角(去頭尾)切粒.

<2>
鑊中注入適量雞湯,下青豆角粒煮約5分鐘,盛起.

<3>
燒紅鑊,爆香叉燒後加入豆乾粒,青豆角粒兜勻,下少許鹽調味即可.



 

栗子花生雞腳湯

袁太發覺原來有好多食譜仲未post上blog,大鑊喇!

由於袁太最近晚晚都煮飯
同埋最近又病病地
唔經唔覺積下積下有好多食譜
真係未來一個月唔煮飯都有食譜可以upload上blog
見呢幾日精神好番d
真係要俾心機加加油,盡快完成d食譜
唔講無聊野,講番個湯先
呢個湯材料好簡單
基本上所有材料都黎自屋企的雪櫃
淨係落街市買瘦肉同雞腳就ok
既簡單又方便
不過袁生話呢個湯比較鹹左少少
唔知係咪袁太重手左
落多左鹽呢

~栗子花生雞腳湯~



材料:
栗子-16粒/冬菇-8隻/瑤柱骨-2塊/雞腳-4隻/瘦肉-$10/花生-適量/蜜棗-2粒

做法:
&lt;1&gt;
瘦肉飛水,瑤柱骨洗淨後出水備用.

&lt;2&gt;冬菇浸一晚,花生浸水30分鐘,栗子放入滾水中煮5分鐘後去皮.


&lt;3&gt;
雞腳去甲後出水,放入冰水備用.

&lt;4&gt;
煲內放入適量的水,放入蜜棗,花生,待滾後加入瑤柱骨,瘦肉,冬菇,栗子用大火煲30分鐘後轉慢火煲1小時,再加入雞腳煲30分鐘,下少許鹽調味即可.

                                                              

蝦膠釀雞翼

有袁生幫我將雞翼去骨,其他步驟就等我黎喇

上回講到袁生話食蝦膠釀雞翼
亦都好乖咁幫我將雞翼去骨
不過袁太買左10隻雞翼
袁生都整左差唔多半小時
如果換轉係我的整的話
分分鐘都唔知要整幾耐先可以去晒骨
當袁生去骨的時候
袁太就係廚房醃定d蝦膠
等袁生整好後就等我完成埋佢
雖然只得10隻雞翼
但袁太都炸左好耐,因為驚唔熟又會俾袁生鬧
費時整得唔好
就俾人話浪費晒佢d心機
不過今次蝦膠釀雞翼真係好好食
可能係袁生有幫手的關係掛
不過得10隻都好鬼飽!

~蝦膠釀雞翼~




材料:

去骨雞翼-10隻/蝦膠-$20


做法:
<1>
蝦膠加少許鹽,雞粉略醃.

<2>
將蝦膠釀入雞翼內,再以生抽,鹽,糖拌勻醃30分鐘.

<3>
燒紅鑊,將雞翼落鑊用慢火炸8-10分鐘至發脹及熟透.



 

肚又痛,人又暈...

啱啱去柴灣做完野,搭地鐵番公司途中
突然覺得好肚痛
痛的程度簡直利害
終於頂唔順未到站都落車
一出地鐵係月台仲衰
對眼睇野蒙查查,感覺好似就黎低
個一刻真係好驚
驚如果真係暈低左,會唔會冇人理
當時月台都幾多人
不過眼前淨係叫到好多人迎面而行
因為已經蒙到睇唔清楚
後來見到月台好似有地方座
就暈下搖下咁行過去
座低後個肚依然好痛
不過睇野就慢慢清楚番
但成個人就不停係咁標汗
由其係塊面,標汗標到咩咁
座左約5分鐘,個肚開始冇咁痛
就搭番地鐵番公司
而家暫時都冇咩事
不過真係未試過肚痛痛成咁
又暈又標汗,嚇死人咩!