青瓜魚肚煮蝦

簡簡單單的青瓜魚肚煮蝦

袁生袁太未結婚前已經一齊住左幾年
到而家結左婚
雖然生活同以前冇咩變化
但偶然都好掛住媽咪煮的餸
仲記得以前媽咪成日都會整青瓜煮餸
以前的我講真唔多鍾意呢樣餸
但最近慢慢愛上了
因發覺清新的青瓜配上鮮蝦仁,味道真係好好
何況最近天氣咁熱
用青瓜煮餸都幾好架
不過由於都係驚袁生唔鍾意(因袁生平時喜愛食濃味食物)
所以就加埋袁生喜愛的魚肚
好意外反而袁生都鍾意呢個青瓜煮法
雖然袁太覺得味道唔錯,因用左濃湯寶幫手(媽咪係唔用既)
但始終味道一定唔夠媽咪煮既好味!

~青瓜魚肚煮蝦~


材料:

青瓜-1條/鮮蝦仁-1包(超市買)/魚肚-3條/鮮雞濃湯寶-1個

醃料:
生粉,糖,生抽,麻油,水-適量

做法:

<1>


魚肚浸軟搓乾水份,燒滾水將魚肚煮約5分鐘後切片備用.

<2>

鮮蝦仁加入醃料醃30分鐘,青瓜去皮洗淨切件.

<3>

鑊中加入水及鮮雞濃湯寶煮滾,加入青瓜,魚肚用大火煮至腍身.

<4>

再加入蝦仁兜勻煮熟,加少許鹽調味即可.